އިންޓައާއެކު ކާމިޔާބު ހޯދަން ބޭނުން: ސަންޗޭޒް
3 ސެޕްޓެމްބަރު 2019 | އަންގާރަ 15:32ސަންޗޭޒް އިންޓައަށް ބަދަލުވީ ލޯން އެއްބަސްވުމެއްގެ ދަށުން
އެލެކްސަސް ސަންޗޭޒް
އިންޓަ މިލާނާއެކު ކާމިޔާބު ހޯދަން ބޭނުންވާ ކަމަށް އެ ކްލަބަށް ދާދި ފަހުން ބަދަލުވި ޗިލީގެ ފޯވާޑް އެލެކްސަސް ސަންޗޭޒް ބުނެފިއެވެ.
އިންޓަ ޓީވީއަށް ދިން އިންޓަވިއުއެއްގައި ސަންޗޭޒް ބުނީ، އިންޓައަށް ބަދަލުވީ ކޮންމެވެސް ކާމިޔާބީއެއް އެޓީމަށް ހޯދައިދިނުމުގެ އަޒުމުގައި ކަމަށާއި، އެކަން ހާސިލުކުރަން ކުރެވެން އޮތް ހުރިހާ ކަމެއް ކުރާނެ ކަމަށެވެ.
ސަންޗޭޒް ބުނީ، ކޮންމެ ލީގަކީވެސް ތަފާތު ލީގެއް ކަމަށާއި، އެގޮތުން ޕްރިމިއާ ލީގުގެ ކުޅުމާ ސްޕެނިޝް އަދި އިޓަލީ ލީގުގެ ފުޓުބޯޅަ ތަފާތު ކަމަށެވެ. ނަމަވެސް އޭނާ ބުނީ، ޓީމުގެ ކުޅުންތެރިން ވަރަށް އެއްބާރުލުން ދޭ ކަމަށެވެ.
މީގެއިތުރުން ސަންޗޭޒް ބުނީ، ޓީމު އެކަތިގަނޑެއް ގޮތުގައި މަސައްކަތް ކޮށްފިނަމަ، ކާމިޔާބު ހޯދޭނެ ކަމަށާއި، އެކަމަށް އެންމެން މަސައްކަތް ކުރަން ޖެހޭ ކަމަށެވެ.
މީގެ ކުރިން ބާސާ އަށް ވެސް ކުޅެފައިވާ ސަންޗޭޒް ވަނީ އެ ކްލަބާ އެކު ވެސް ގިނަ ކާމިޔާބީތައް ހޯދާފައެވެ. ބާސާގައި ކާމިޔާބީތައް ހޯދުމަށް ފަހު ސަންޗޭޒް ބަދަލުވީ އާސެނަލަށެވެ.
ސަންޗޭޒް ވަނީ އާސެނަލް އަށް ކުޅުނު 166 މެޗުގައި 80 ލަނޑު ކާމިޔާބު ކޮށްފައެވެ. އާސެނަލް ދޫކޮށް ސަންޗޭޒް ޔުނައިޓެޑަށް ބަދަލުވެފައި ވާއިރު، އޭނާ ވަނީ މިހާތަނަށް ޔުނައިޓެޑަށް ކުޅުނު 45 މެޗުގައި ފަސް ލަނޑު ކާމިޔާބު ކޮށްފައެވެ.
ޗިލީގެ ގައުމީ ޓީމަށް ކުޅުނު 130 މެޗުގައި 43 ލަނޑު ކާމިޔާބު ކޮށްފައިވާ ސަންޗޭޒް ވަނީ އެ ޓީމާއެކު ކޮޕާ އެމެރިކާ ކާމިޔާބު ކޮށްފައެވެ.
