ރިލްވާން ގެއްލިފައިވަނީ 2014 ވަނަ އަހަރުގެ އޮގަސްޓު މަހުގެ 8 ވަނަ ދުވަހު
އަހުމަދު ރިލްވާން
މިހާތަނަށް ހޯދިފައިވާ ހޯދުންތަކުން ނޫސްވެރިޔާ އަހުމަދު ރިލްވާން މަރާލާފައިވަނީ ދީނީ ހަރުކަށި ޖަމާއަތަކުން ކަމަށް މަރުތަކާއި ގެއްލުވާލައިފައިވާ މީހުންގެ މައްސަލަތައް ބަލާ ކޮމިޝަނުން ބުނެފި އެވެ.
ނޫސްވެރިޔާ އަހުމަދު ރިލްވާން ގެއްލިފައިވަނީ 2014 ވަނަ އަހަރުގެ އޮގަސްޓު މަހުގެ 8 ވަނަ ދުވަހުގައެވެ.
އަބޫދު ޖަނާ (މ. ޖޯރޖިއާ. ޔާމީން ނައީމް) ވަނީ ސެޕްޓެމްބަރ 2014 ގައި ސީރިޔާގައި މަރުވެފައެވެ.
މިއީ ރިލްވާންއަށް މަރާލާނެކަމަށް ދީފައިވާ އިންޒާރުކަމަށް ގަބޫލުކުރެވޭ ހެކި ކަމަށް ސުއޫދު ވިދާޅުވިއެވެ.
2014 ވަނަ އަހަރުގެ އޮގަސްޓް މަހުގެ 7 ވަނަ ދުވަހުގެރޭ 10:00 އިން ރިލްވާން ހުޅުމާލެއަށް ދަންދެން މުހައްމަދު ހާމިދާއި މުހައްމަދު ސުވެއިދު ރިލްވާންގެ ފަހަތުން ދުއްވިއެވެ. އެދެމީހުން މިހާރު ވަނީ ސީރިއާއަށް ގޮސްފައެވެ.
ކްރިމިނަލް ކޯޓުން ރިލްވާންގެ މައްސަލަ ބެލުމަށްފަހު ކޮށްފައިވާ ހުކުމްގައި ރިލްވާން ހުޅުމާލެއަށް ދިޔަކަމަށް އެނގިފައިނުވާކަން ބުނެފައި ވީނަމަވެސް އޭނާގެ ފޯނުގެ ސިގްނަލް ލިބިފައިވާކަން ބެލި ބެލުމުން އެނގޭކަމަށް ސުއޫދު ވިދާޅުވިއެވެ. ރިލްވާން ރަތްކުލައިގެ ކާރަކަށް އަރުވައިގެން ދިޔައީ 8 އޮގަސްޓްވީ ރޭގެ 1:45 ހާއިރެވެ. ތަހުގީގުން އެނގިފައިވާ ގޮތުގައި އެ ކާރަކީ އާލިފް ރައޫފްގެ ނަމުގައި ރެޖިސްޓްރީ ކޮށްފައިވާ ކާރެކެވެ. އަދި އާލިފް ރައޫފްވެސް ވަނީ އެއީ އޭނާގެ ކާރެއްކަން އެއްބަސްވެފަ އެވެ.
މީހަކު ރަތް ކުލައިގެ ކާރަކަށް އެރުވި ކަމަށާއި ވޭނެއް ލިބިގެން ލައްވާ ހަޅޭކުގެ އަޑު އިވުނު ކަމަށް ރިލްވާން ދިއިރުޅޭ 21 ނަންބަރު ފްލެޓުގެ ފުރަތަމަ ބުރީގައި އުޅޭ އަންހެނަކާއި 28 ނަންބަރު ފްލެޓުގައި އުޅޭ އަންހެނެއްގެ ހެކިބަސް އެކޮމިޝަނުން ނެގިކަމަށް ސުއޫދު ވިދާޅުވި އެވެ.
ރިލްވާން އަރުވައިގެން ދިޔަ ކާރުގެ ކުރީގައިތިބި ދެމީހުންގެ ތެރެއިން އެކަކީ އާލިފް ރައޫފެވެ. އަދި ފަހަތުގައި އިނީ ރިލްވާން ގަދަކަމުން ޑިކީއަށްލި މީހާއެވެ.
ފަހަތުގައި އިނީ އޭނާ ގަދަކަމުން އެރުވި މީހާ ކަމަށާއި އެކާރު ފަހަތުން ސައިކަލުގައި ދެމީހުން ދިޔަ ކަމަށް ސުއޫދު ވިދާޅުވިއެވެ. އަދި ގޮސް ޑިންގީ އަކަށް އެރުވުމަށްފަހު ދެން ކަނޑުގައި ދުއްވާ އެހެން އުޅަނދަކަށް އެރުވި ކަމަށް އޭނާ ވިދާޅުވިއެވެ.
ރިލްވާނަށް ބަޔަކު ފާރަލުމާއި، އޭނާ ހުޅުމާލޭ ފެރީއަށް އަރައި އެ ރަށަށް ގޮސް ގެއާ ހަމަޔަށް ދިޔުމަށް ހޭދަވާނެ ވަގުތާއި އެރޭ ރިލްވާން ގެއްލިފައިވާތީ އެ ކަންކަމަށް ބަލާއިރު ރިލްވާނާމެދު ނުރައްކާތެރި އަމަލެއް ހިންގަން އުޅޭކަން އެނގޭތީ، އެރޭ ރަތް ކާރަށް ގަދަކަމުން އަރުވައިގެން ގެންދިޔައީ ރިލްވާން ކަމަށް އެކަށީގެންވާ ޝައްކެއް ނެތް މިންވަރަށް ގަބޫލުކުރެވޭ ކަމަށް ސުއޫދު ވިދާޅުވިއެވެ.
މިހާތަނަށް ލިބުނު ހޯދުންތަކާއި ހެކި ބަހަށް ބަލާއިރު ރިލްވާން އެރުވީ ޑިންގީއަކަށް ކަމަށާއި ރިލްވާން މަރާލީ ކަނޑު އުޅަނދެއްގައި ކަމަށް ސުއޫދު ވިދާޅުވިއެވެ. އެއީ ކޮން ފަރާތެއްގެ ކަނޑު އުޅަނދެއްކަން އަދި އެ ޑައިރެކްޓް ކުރަމުން އައި އައްޑޫގައި ހުރި ކާކުކަން ވެސް ހޯދާފައިވާކަން ސުއޫދު ފާހަގަކުރެއްވިއެވެ.
ރިލްވާން މަރާލުމުގައި ބައިވެރިވި މީހުން އޭނާ މަރާލަން އުޅުމުން ޝަހާދަތް ކިޔުއްވި ކަމަށާއި އޭނާ މަރާލަން އެއްބަޔަކު ބުނި ކަމަށް ސުއޫދު ވިދާޅުވިއެވެ. އެކަމަކު، ކުށުގެ އަދަބަކަށް އޭނާ މަރަންޖެހޭ ކަމަށް ބުނެ ހިޔާލު ތަފާތުވީ ކަމަށް ބައެއް ހެކިބަސް ލިބިފައިވާ ކަމަށް ސުއޫދު ވިދާޅުވިއެވެ. އެހެންވެ ހެކި ބަހުގެ ފުށުއެރުންތަކެއް އުޅޭ ކަމަށް ސުއޫދު ވިދާޅުވިއެވެ.
ފުލުހުންގެ އިންޓެލިޖެންސްގެ ދެ މީހަކު އިމިގްރޭޝަން ކޮންޓްރޯލަރ ހަސަން އަލީއާ ބައްދަލުކޮށް ރިލްވާންގެ ޕާސްޕޯޓްގެ ކޮޕީއެއް ހޯދުމަށް އެދުނެވެ. އަދި އޭނާ ސީރިއާއަށް ގޮސް މަރުވެފައިވާކަން ދައްކަން ހަސަން އަލީގެ ކިބައިން އެދުނެވެ. ހަސަން އަލީ ވަނީ އެކަމަށް ތަހުގީގީ އިދާރާއަށް ބަޔާނެއް ވެސް ދެއްވާފައެވެ. އެކަމުގައި ޕާސްޕޯޓް ކޮޕީ ހޯއްދަވަން ކުރީގެ ނައިބު ރައީސް އަހުމަދު އަދީބު މަސައްކަތް ކުރެއްވިކަން ހާމަވާ ކަމަށް ސުއޫދު ވިދާޅުވިއެވެ. އަދި އަދީބު އެމްއެންޑީއެފްގެ ސީނިއާ ފަރާތަކަށް ކޮޕީ ހޯދުމަށް އެދުނުކަން ތަހުގީގަށް ވަނީ އެނގިފައެވެ.
އަދީބު ވެސް، ރިލްވާން މައްސަލާގައި ހިމެނޭ މީހަކު ބަންދުން ދޫކޮށްލަން ކްރިމިނަލް ކޯޓުގެ އޭރުގެ ގާޒީ އަދި މިދިޔަ ހަފުތާގައި ސުޕްރީމް ކޯޓުގެ ފަނޑިޔާރުކަމުން ވަކިކުރި އަބްދުﷲ ދީދީ އަށް މެސެޖުކޮށްފައިވެއެވެ. އަދި މި މެސެޖަށް ފަހު އެކަމުގައި ހައްޔަރުކުރި އެ މީހާ ބަންދުން ވަނީ ދޫކޮށްލާފައެވެ.
މީގެ އިތުރުން ރިލްވާން މަރާލުމުގެ ކުރިން ވެސް ފުލުހުން ފާރަލާފައިވާ ކަމަށާއި އެކަމަކީ ރިލްވާނަށް އައި އިންޒާރަކާއި ހެދިކަމަށް ފުލުހުން ބުނެފައިވާކަމަށް ސުއޫދު ވިދާޅުވިއެވެ. ނަމަވެސް އެވާހަކައާއި ފުށު އެރުންތައް ހުރިކަން ސުއޫދު ފާހަގަ ކުރެއްވިއެވެ. ސުއޫދު ވިދާޅުވީ ފުލުހުން ދޭ ޖަވާބާއި ދިމާ ނުވާކަމަށެވެ.
މީގެ އިތުރުން ސުއޫދު ވިދާޅުވީ ޖޫން 24، 2014 ގައި ހުޅުމާލޭގައި މީހަކު ރަހީނު ކުރަން އުޅޭ ކަމަށާއި އެކަމަށް ޑިންގީއެއް ތައްޔާރުކޮށްފައިވާކަމުގެ އިންޓެލް ރިޕޯޓެއް ފުލުހުންނަށް ކުރިން ލިބިފައި އޮތްކަމަށެވެ. އެކަން ފަހުން ބަދަލުކޮށްފައިވަނީ ފުލުހުންގެ ޕޮލިޓިކަލް ސެކްޝަނަށް ކަމަށެވެ. އެކަމުގައި ފުލުހުން ކޯޓަށް ހުށައެޅި ފޯމުގައި ބުނެފައިވަނީ ދައުލަތާއި ދެކޮޅު ހަރަކާތް ހިންގާތީ ފޯނުކޯލުތައް އަޑުއަހާލަން ފާރަލީކަމަށް ސުއޫދު ވިދާޅުވިއެވެ.
ސުއޫދު ވިދާޅުވި ގޮތުގައި އަދީބާއި ފުލުސް ދެ އޮފިސަރުންނަށް އަދުލު އިންސާފަށް ހުރަސް އެޅި ކަމުގެ ދައުވާ ކުރެވެން ޖެހޭނެ ކަމަށެވެ. އަދި އެ ކަމާ ގުޅޭ ގޮތުން ޕްރޮސެކިއުޓާ ޖެނެރަލް (ޕީޖީ)ގެ ލަފައެއް ހޯއްދަވާނެ ކަމަށް ވިދާޅުވިއެވެ.
ރިލްވާނަށް ވީނުވީ ބަލަން ތަހުގީގީ އިދާރާއިން ބަލަން ފެށުމުން ކުރީގެ ރައީސް އަބްދުﷲ ޔާމީން އެ މައްސަލަ ޑައިވާޓް ކުރަން މަސައްކަތް ކުރެއްވިކަން ތަހުގީގަށް ހާމަވާކަމަށް ސުއޫދު ވިދާޅުވިއެވެ. އެގޮތުން، ކާހިނުންނާއި ފާލުބަލާ މީހުން ބޭނުންކޮށްގެން ފަންޑިތަ ހަދައި ރިލްވާން ހޯދަން ކަމަށް ބުނެ މާފަންނު ގެއަކާއި ވިލިމާލެއަށް ދަންވަރުގެ ވަގުތު ފުލުހުން ފޮނުވާފައިވާ ކަން ހާމަވާކަމަށް ވެސް ސުއޫދު ވިދާޅުވިއެވެ.
ސުއޫދު ވިދާޅުވީ ރިލްވާން މަރާލުމަށްފަހު އޭނާގެ ހަށިގަނޑާއި ބެހޭގޮތުން ތަފްސީލު އަދި ދެވެން ނެތީ އެކަމުގައި ފުށުއެރުންތަކެއް ހުރުމުންނެވެ. ރިލްވާންގެ މަރާއި ގުޅިގެން ތިން މީހުން ހެކިބަސް ދިން ކަމުގައި ވިއަސް އެއީ މަރެއް ސާބިތުކުރަން ސާބިތު ހިފޭވަރަށް ހެކި ނެތުމުންކަމަށް ވިދާޅުވިއެވެ. އެއީ ފުރަތަމަ ހެކި ބަހާއި ދެން އޮތް ދެ ހެކި ބަހާ ފަރަގެއް ހުރުމުން އެ ތަފާތަށް ރިއާޔަތް ކުރަން ޖެހޭތީ ކަމަށް ވިދާޅުވިއެވެ.
