ސްޕީކާރޒް ސަމިޓުގައި ޕާކިސްތާނާއި އިންޑިއާއާއި ދެމެދު ބަހުގެ ހަމަލާތަކެއް
1 ސެޕްޓެމްބަރު 2019 | އާދީއްތަ 08:36މައްސަލަ ހޫނުވީ ކަށިމީރު މައްސަލާގައި ޕާކިސްތާނުން ވާހަކަދައްކަން ފެށުމުން
އިންޓަޕާލިމެންޓްރީ ސައުތް އޭޝިއަން ސްޕީކަރޒް ސަމިޓު
އިންޓަޕާލިމެންޓްރީ ސައުތް އޭޝިއަން ސްޕީކަރޒް ސަމިޓުގައި ޕާކިސްތާނާއި އިންޑިއާއާއި ދެމެދު ބަހުގެ ހޫނު ހަމަލާތަކެއް ދީފިއެވެ.
ދެ ގައުމުގެ ދެމެދުގައި ބަހުގެ ހޫނު ހަމަލާތަކެއް ދީފައިވަނީ ޕާކިސްތާނުގެ ގައުމީ މަޖިލީހުގެ ނައިބު ރައީސް ގާސިމް ސޫރީ ތަގުރީރުކުރެއްވިއިރު އަމާންކަމަށް އަލިއަޅުވާލާ ދެއްކި ވާހަކައަކާއި ގުޅިގެންނެވެ. އެމަނިކުފާނު ވިދާޅުވީ ފަލަސްތީނުގައި ތިބި މުސްލިމުންނާއި، ރޮހިންގާ މުސްލިމުންނާއި, ކަޝްމީރު ރައްޔިތުންގެ ހާލަތު ނުފެންނަކަމަށް ހަދައިގެން ނުތިބެވޭނެ ކަމަށެވެ.
ކަޝްމީރުގެ ރައްޔިތުންނާއި ގުޅިގެން އެމަނިކުފާނު ދެކެވުނު ވާހަކައާއި ގުޅިގެން އިންޑިއާއިން ވަނީ ނިޒާމީ ނުކުތާއެއް ނަންގަވާފައެވެ.
ނިޒާމީ ނުކުތާއާއި ގުޅިގެން މަޖިލީހުގެ ރައީސް، މުހައްމަދު ނަޝީދު އަދި އިންޓަ ޕާލަމެންޓްރީ ޔޫނިއަންގެ ސެކްރެޓަރީ ޖެނެރަލް މާޓިން ޗުންގޮންގް, ޕާކިސްތާނުގެ މަޖިލީހުގެ ނައިބް ރައީސް ގާތު ވާހަކަދެއްކެވުން މެދުކަނޑާލެއްވުމަށް އެދިލެއްވުމުންވެސް ވާހަކަދެއްކެވުން ކުރިއަށް ގެންދެވިއެވެ. މިކަމާއި ގުޅިގެން މަޖިލީހުގެ ރައީސް މުހައްމަދު ނަޝީދު ވަނީ ޕާކިސްތާނުގެ މަޖިލީހުގެ ނައިބު ރައީސް ގާތު ވާހަކަދެއްކެވުން ހުއްޓަވާލެއްވުމަށްފަހު ނިޒާމީ ނުކުތާ ހުށަހެޅުއްވުމަށް ފުރުސަތު ދެއްވުމަށް ވަރަށް އަޑުހަރުކޮށް ވިދާޅުވެފައެވެ.
ނިޒާމީ ނުކުތާ ހުށަހަޅުއްވަމުން އިންޑިއާގެ ގާނޫނު ހަދާ މަޖިލީސް، ލޮކް ސަބާގެ ސްޕީކަރު އޯމް ބިރްލާގެ ފަރާތުން، އޭނާގެ ތަރުޖަމާނު ވިދާޅުވީ ކަޝްމީރުގެ މައްސަލައަކީ އިންޑިއާގެ ދާޚިލީ ކަމެއް ކަމަށެވެ. އަދި ޕާކިސްތާނުން ދައްކަމުން ދިޔައީ މުޅިން މި ސަމިޓުގެ "ތީމުން" ބޭރު ވާހަކައެއް ކަމުގައި ވެސް އޭނާ ފާހަގަ ކުރެއްވިއެވެ.
މި ނިޒާމީ ނުކުތާ ހުށަހެޅުއްވުމާއި ގުޅިގެން ޕާކިސްތާނުގެ ވަފުދުން ވެސް ވަނީ ނިޒާމީ ނުކުތާއެއް ނަގާފައެވެ. ނިޒާމީ ނުކުތާ ހުށަހަޅުއްވަމުން ވިދާޅުވީ ދެމެހެއްޓެނިވި ތަރައްގީގެ ލަނޑުދަނޑިތަކާއި ގުޅިގެން މި ސަމިޓުގައި ވާހަކަ ދެއްކޭނަމަ، އެ ވާހަކަ ނުދެއްކެންވީ ކީއްވެގެންތޯ އެ ކަމަނާ ސުވާލުކުރިއެވެ. އެ ވަފުދުން ބުނީ، އިންސާނީ ހައްގުތައް ނިގުޅައިގެން ދެމެހެއްޓެނިވި ތަރައްގީގެ ލަނޑުދަނޑިތައް ހާސިލު ނުކުރެވޭނެ ކަމަށެވެ. އަދި ޕާކިސްތާނުގެ މަޖިލީހުގެ ނައިބު ރައީސަށް ތަގުރީރު ކުރެއްވުމުގެ ފުރުސަތު ދެއްވުމަށް އެދިފައިވެއެވެ.
ތަގުރީރުކޮށް ނިމުމުން އިންޑިއާގެ ފަރާތުން ވަނީ ދެވަނަ ނިޒާމީ ނުކުތާއެއް ނަގާފައެވެ. ނިޒާމީ ނުކުތާ ހުށަހަޅުއްވަމުން ތަރުޖަމާނު ވިދާޅުވީ، ޕާކިސްތާނަކީ ގަތުލުއާމަށާއި ޓެރަރިޒަމަށް ވާގިދޭ ބަޔަކަށް ވާއިރު އިންސާނީ ހައްގުތަކާއި ގުޅިގެން އެއްވެސް އެއްޗެކޭ ކިއުމުގެ ހައްގެއް ނެތް ކަމަށެވެ. މިހެން ދެންނެވުމާއެކު ޕާކިސްތާނުން ވަރަށް އަޑުހަރުކޮށް ވިދާޅުވަމުން ގެންދެވީ ޕާކިސްތާނަކީ އެއްވެސް އިރެއްގައި ޓެރަރިޒްމް އަށް ވާގި ދިން ގައުމެއް ނޫން ކަމަށާއި ޕާކިސްތާނަކީ ޓެރަރިޒްމްގެ ޝިކާރައަކަށް ވެފައިވާ ގައުމެއް ކަމަށެވެ.
މަޖިލީހުގެ ރައީސް ވަނީ، ބައްދަލުވުން މެންދުރުގެ ކެއުމަށް މެދުކަނޑާލައްވާފައެވެ.
