އެލައިޑްގެ "ގްރީން ފޯ ގުޑް" އިނީޝިއޭޓިވްގެ އައު ޕްލެޖްތައް ލޯންޗްކޮށްފި

އަންސާނާ އިހުރުގައި ކުރިޔަށްދިޔަ 10-10 ޑައިވް އިވެންޓް ރަސްމީކޮށް ހުޅުވުމުގެ ރަސްމިއްޔާތުގައި އެލައިޑް އިންޝުއަރަންސް ކުންފުނީގެ "ގްރީން ފޯ ގުޑް" އިނީޝިއޭޓިވްގެ އައު ޕްލެޖްތައް ލޯންޗްކޮށްފިއެވެ.

މި އިނީޝިއޭޓިވް ލޯންޗްކޮށްދެއްވާފައިވަނީ ބަންޔަން ޓްރީ ގްރޫޕްގެ ސަސްޓެއިނަބިލިޓީ ޑިރެކްޓަރ އަދި ބަންޔަން ޓްރީ ގްލޯބަލް ފައުންޑޭޝަންގެ ކޯޑިނޭޓިންގ ޑިރެކަޓަރ ސްޓީވް ނިއުމަންއެވެ.

މި އިނީޝިއޭޓިވްގެ ދަށުން އެލައިޑުން މިފަހަރު ތައާރަފުކޮށްފައިވަނީ ތިމާވެއްޓާއި ރައްޓެހި ކޮތަޅާއި ފުޅި އަދި މީގެ އިތުރުންވެސް އޮފީސް މާހައުލުގައި ކަރަންޓާއި ކަރުދާސް ބޭނުންކުރާ މިންވަރު މަދުކުރުމާއި، އޮފީސް މާހައުލަކީ ތިމާވެއްޓާއި ރައްޓެހި ތަނަކަށް ހެދުމަށް ކުރެވޭ ގިނަގުނަ އެހެން މަސައްކަތްތައްވެސް ވަނީ ތައާރަފު ކުރެވިފައެވެ.

މީގެ އިތުރުން އެލައިޑުން، ވަނީ އަލަށް ތައާރަފުކުރެވުނު ތަކެތި ލޯންޗްކުރުމަށްފަހު ޑައިވް ހަރަކާތުގެ ޝަރަފުވެރި މެހެމާނު ބަންޔަން ޓްރީ ގްރޫޕްގެ ސަސްޓެއިނަބިލިޓީ ޑިރެކްޓަރ ސްޓީވް ނިއުމަން އަށް ހަދިޔާކޮށްފައެވެ.

މިހަފްލާގައި ވާހަކަ ދައްކަވަމުން އެލައިޑް އިންޝުއަރަންސްގެ މެނޭޖިންގ ޑިރެކްޓަރ ޝަފާޒު ވަނީ 10-10 އަށް 10 އަހަރު ފުރޭ މުނާއްސަބާތާއި ގުޅިގެން ހޫނު މަރުހަބާއެއް ދަންނަވާފައެވެ. އަދި ވިދާޅުވި ގޮތުގައި "ގްރީން ފޯ ގުޑް" އަކީ ވަރަށް ފުޅާ ދާއިރާއެއްގައި ކުރިޔަށްގެންދިޔުމަށް ރާވާފައިވާ ޕްލޭނެއް ކަމަށާއި އެގޮތުގެ މަތިން ގައުމަށާއި، ރައްޔިތުންގެ އިތުރުން އަޅުގަނޑުމެންގެ ވަށައިގެންވާ މާހައުލާއި ކަނޑުގެ ދިރުންތަކަށްވެސް ރައްކާތެރިކަމާއި އަޅާލުން ކަށަވަރުކުރުމަށް ގިނަ ކަންތައްތަކެއް މުސްތަގުބަލުގައި ވެސް މި އިނީޝީއޭޓިވްގެ ދަށުން ތައާރަފުވެގެންދާނެ ކަމަށެވެ.

"ޕްރިމިއަމް ފޯ ގުޑް" އަކީ އެލައިޑްގެ އިޖްތިމާއީ ޒިންމާގެ މަސައްކަތްތައް ކުރުމަށްޓަކައި ބްރޭންޑް ކުރެވިފައިވާ ޕްރޮޖެކްޓެވެ. އެގޮތުން މިޕްރޮޖެކްޓްގެ ދަށުން ކުރެވިފައިވާ މައިގަނޑު މަސައްކަތްތަކުގެ ތެރޭގައި މަލަހިނި ސޭންޑީ މިޝަން، ސްކޫލްތަކުގެ ޑިޖިޓަލައިޒޭޝަން ޕްރޮގްރާމާއި އުރީދޫ އަދި ޔޫ.އެން.ޑީ.ޕީއާއި ގުޅިގެން މާޅޮހުގައި ގާއިމްކުރެވުނު ކޮމިއުނިޓީ ޑިވެލޮޕްމަންޓް ހަބް ސެންޓަރު ފާހަގަކޮށްލެވެއެވެ.