އިންޑިއާ އާއި ޕާކިސްތާނުގެ މަޝްރަހު ގޯސްވެފައިވަނިކޮށް ކަރާޗީގައި ޝޯއެއް ހުށައެޅުނު ކަމަށްޓަކައި ލަވަކިޔުންތެރިޔާ މީކަ ސިންގް މާފަށް އެދުމުން ޕާފޯމް ކުރުމުގެ ހުއްދަ އަލުން ދީފިއެވެ.
ޕާކިސްތާނުގެ ކުރީގެ ބޮޑު ވަޒީރު ޕަރްވޭޒް މުޝައްރަފުގެ ގާތް ރައްޓެއްސެއްގެ ހަފްލާއެއްގައި މީކާ ޕާފޯމް ކުރާ ވީޑިއޯއެއް ލީކުވުމުން އޯލް އިންޑިއާ ސައިން ވޯކާސް އެސޯސިއޭޝަން (އޭއައިސީޑަބްލިއުއޭ) ވަނީ މި މަހުގެ 14 ވަނަ ދުވަހުން ފެށިގެން މީކާ އިންޑިއާގައި ޕާފޯމް ކުރުން މަނާކޮށްފައެވެ.
އެކަމާއި ގުޅިގެން ބުރާސްފަތި ދުވަހު މީޑިއާ ވާހަކަ ދައްކަމުން މީކާ ބުނީ، ޕާކިސްތާނަށް ދިޔައީ އެންމެ ރަނގަޅު ދަނޑިވަޅެއްގައި ނޫން ކަމަށެވެ. އެހެން ނަމަވެސް އެ ޝޯ އަކީ ވަރަށް ކުރިންވެސް ދައުވަތު ލިބިފައިވާ ޝޯ އެއް ކަމަށް އޭނާ ބުންޏެވެ.
ސައިން އިން ކޮށްފައިވާ ޓްވީޓެއްގައި ބުނީ، އެކަމާއި ގުޅޭ ގޮތުން މީކާއާ ބައްދަލުކޮށް އޭނާ މާފަށް އެދިފައިވާ ކަމަށެވެ. އަދި އެފަދަ ކަމެއް ތަކުރާރު ނުވާނެ ކަމުގެ ޔަގީންކަން މީކާ ދިފައިވާތީ ޕާފޯމް ކުރަން އަލުން ހުއްދަދީފައިވާ ކަމަށެވެ.
