ގައުމީ 16 އަހަރުން ދަށުގެ ފިރިހެން ފުޓުބޯޅަ ޓީމު ގަތަރަށް ފުރައިފިއެވެ.

ޒުވާން ޓީމު ގަތަރަށް ފުރީ އެ ގައުމުގެ ވެރި ރަށް ދޯހާގައި އޮންނަ 16 އަހަރުން ދަށުގެ އިންޓަނޭޝަނަލް 4 ނޭޝަންސް ކަޕްގައި ވާދަކުރުމަށެވެ.

މި މަހުގެ 25 އިން 29 ގެ ނިޔަލަށް އޮންނަ މި މުބާރާތުގައި ރާއްޖެއިން މުޅިން އަލަށް ވާދަކުރާއިރު، މުބާރާތުގައި ރާއްޖެއިން ވާދަކުރަން ނިންމީ 15 އަހަރުން ދަށުގެ ސާފް ޗެމްޕިއަންޝިޕްގައި ވާދަ ނުކުރަން ނިންމުމަށް ފަހުއެވެ.

މައުލޫމާތު ލިބޭ ގޮތުގައި ސާފް މުބާރާތުގައި ރާއްޖެއިން ބައިވެރި ނުވާން ނިންމީ ގަތަރުގައި އޮންނަ މުބާރާތާ ތާރީހު ދިމާވުމުގެ އިތުރުން، ގަތަރުގައި އޮންނަ މުބާރާތުން ރާއްޖެއަށް ފައިދާކުރާނެތީއެވެ.

ގަތަރުގައި ފަށާ މުބާރާތަށް ރާއްޖެ ނިކުންނާނީ އާ ކޯޗު މުހައްމަދު ނިޒާމް (ނިޒާމްބެ) ގެ އިރުޝާދުގެ ދަށުންނެވެ. މުބާރާތުގައި ރާއްޖޭގެ އިތުރުން ވާދަކުރަނީ ޖޯޑާން އާއި އިންޑޮނޭޝިއާ އަދި ގަތަރެވެ.

ޒުވާން ޓީމު ވަނީ ދާދި ފަހުން އައްޑޫ ސިޓީގައި ޔުއެފާގެ އެހީގެ ދަށުން ބޭއްވި 15 އަހަރުން ދަށުގެ މުބާރާތުގައިވެސް ވާދަކޮށްފައެވެ. އެ މުބާރާތުގައި ރާއްޖޭގެ އިތުރުން ވާދަކުރީ ބުޓާނާއި، ސައުދީ އަރަބިޔާ އަދި ލެޓްވިޔާއެވެ.