ސަރުކާރު ސްލޯއެއް ނޫން، ގިނަ ކަންތައްތަކެއް ކޮށްފި: ގާސިމް
21 އޯގަސްޓު 2019 | ބުދަ 18:35ރައީސް ސޯލިހު އަށް ތައުރީފް ކުރެއްވި
ޖޭޕީގެ ލީޑަރު ގާސިމް ރައީސް ސޯލިހާއެކު
ކޯލިޝަން ސަރުކާރުގެ ދުވެލި މަޑު ނޫން ކަމަށާއި، ކުރީ ސަރުކާރަށް ވުރެ ގިނަ ކަންތައްތައް ކުރު މުއްދަތެއްގެ ތެރޭގައި މި ސަރުކާރުން ކޮށްފިކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ޖޭޕީއާ އަލަށް ގުޅުނު ފަރާތްތަކުގެ ފޯމް ހަވާލުކޮށް ދިނުމަށް ބުދަ ދުވަހުގެރޭ މ. ކުނޫޒް ގައި ބޭއްވި ރަސްމިއްޔާތުގައި ގާސިމް ވަނީ ސަރުކާރުގެ ސްޕީޑް ''ސްލޯ'' ކަމަށް ބުނެ ބައެއް ފަރާތްތަކުން ދައްކާ ވާހަކަ އަށް ރައްދު ދެއްވާފައެވެ.
ސަރުކާރު ކޯލިޝަން ލީޑަރުންގެ ތެރޭގައި ހިމެނިވަޑައިގަންނަވާ ގާސިމް ވިދާޅުވީ، ނިމިގެން ދިޔަ ރައީސް އަބްދުﷲ ޔާމީންގެ ސަރުކާރުގެ އިތުރުން ކުރީގެ ރައީސް މުހައްމަދު ނަޝީދުގެ ސަރުކާރުގައި ވެސް އަހަރެެއްވެގެން ދިޔައިރު މާ ގިނަ ކަންތައްތަކެއް ކުރެވިފައި ނުވާކަމަށެވެ. އެހެންކަމުން މިއަދުގެ ސަރުކާރަށް ކަމެއްކޮށްނުދެވޭ ކަމަށް ވާހަކަ ދައްކާ ފަރާތްތަކުން މިދިޔަ ސަރުކާރުން ނިމިގެން ދިޔައިރު ހިންގާފައި ހުރި ކަންތައްތަކާއި މެދު ވިސްނާލަން ޖެހޭ ކަމަށް ވިދާޅުވިއެވެ. އެގޮތުން އެ ސަރުކާރުން ހިންގާފައި ހުރި ނާއިންސާފު ކަންތައްތައް ފާހަގަ ކުރައްވަމުން ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު ވިދާޅުވީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ގެންދަވަނީ ކުރީގެ ސަރުކާރުން އަޅާފައި ހުރި ''ލޯވަޅުތައް'' ބައްދަމުން ކަމަށެެވެ.
ސަރުކާރަށް އަށްމަސް ދުވަސް ވެގެންދާއިރު މާ ގިނަ މަސައްކަތްތަކެއް ނުފެށި ހުރުމަކީ އެއްގޮތަކަށްވެސް ސަރުކާރުން ކަމެއް ނުކުރެވިގެން ލަސްވެގެން އުޅޭ ކަމަށް ބުނަން ޖެހޭ ސަބަބެއް ނޫން ކަމަށް ގާސިމް ވިދާޅުވިއެވެ. ރައްޔިތުން ބޭނުންވާ ގިނަ ކަންތައްތަކެއް އެބަހުރިކަން ފާހަގަކުރައްވަމުން އޭނާ ވިދާޅުވީ، ސަރުކާރަށް ލިބުނު ހުރިހާ ފައިސާއެއް ހަރަދުކުރީ ރައީސް ޔާމިންގެ ސަރުކާރުން ނަގާފައި ހުރި ދަރަނިތައް އަދާކުރަން ކަމަށެވެ.
އެހެންކަމުން ފައިސާ ދައްކާ ނިމުމުން ރައްޔިތުންނަށް ބޭނުންވާ ކަންތައް ސަރުކާރުން ކޮށްދޭނެ ކަމަށް ގާސިމް ވިދާޅުވިއެވެ.
