ރާއްޖެއަށް އަލަށް، ސެމްސަންގް ގެލެކްސީ ނޯޓް 10 އަދި ނޯޓް +10 ތައާރަފްކޮށް، ދިރާގު ކަސްޓަމަރުންނަށް ޕްރީ އޯޑަރ ކުރުމުގެ ފުރުސަތު ހުޅުވާލައިފިއެވެ.

ބުދަ ދުވަހުގެރޭ ދިރާގު ހެޑްކުއާޓާސްގައި ބޭއްވި ހާއްސަ ރަސްމިއްޔާތެއްގައި އެ ކުންފުނިން ވަނީ ސެމްސަންގާއި ގުޅިގެން ދެ ޑިވައިސް ވެސް ދައްކާލާފައެވެ.

މި ފޯނުތައް ލޯންޗުކޮށްދެއްވީ ދިރާގުގެ ޗީފް މާކެޓިންގް އޮފިސަރ މަހުމޫދް ދެއްސަރ އަދި ސެމްސަންގް އިންޑިއާ އިލެކްޓްރޯނިކްސްގެ ޑައިރެކްޓަރ ވައި. ކޭ ހްވާންގް އެވެ.

އެ ރަސްމިއްޔާތުގައި ގެލެކްސީ ނޯޓް 10 ގައި ހިމެނޭ ހާއްސަ ފީޗަރތައް ދައްކާލާފައިވާއިރު، އެ ފޯނުން ކުރާ ވީޑިއޯތައް ލައިވްކޮށް ފޯކަސްކޮށް ބްލަރކޮށް ހެދޭކަން ފާހަގަކޮށްލެވެއެވެ. އަދި ދުރުން އިވޭ އަޑުތައް އަޑުބާރުކޮށް އަޑުއަހާލެވޭ ފަދަ ހާއްސަ ފީޗަރ އެއްވެސް މި ދެ ފޯނުގައި ހިމެނެއެވެ.

ދިރާގުގެ ފަރާތުން ވާހަކަދައްކަވަމުން މަހުމޫދް ދެއްސަރ ވިދާޅުވީ މި ފޯނު ކަސްޓަމަރުންނަށް ދައްކާލުމަކީ ވަރަށް އުފާވެރި ކަމެއް ކަމަށެވެ.

މީގެ އިތުރުން، ދެ ފޯނުގައިވެސް އެސްޕެން އެއް ހިމެނެއެވެ. އެސްޕެންގެ އެހީގައި ގިނަ ކަންތައްތަކެއް ކުރެވޭއިރު، ފޯނާއި ކިތަންމެ ދުރުގައި އެސްޕެން އޮތް ނަމަވެސް އެއަރ ސެންސަރސްގެ އެހީގައި ފޯނުގެ ސްކްރީނުގައި ނުޖެހި އެބޭނުންވާ ކަމެއް ކޮށްލެވެއެވެ.

ގެލެކްސީ ނޯޓް 10 އަދި +10 ގައިވެސް ހިމެނޭ އެންމެ ހިތްގައިމު ފީޗަރ އެއްގޮތުގައި ފެނިގެންދިޔައީ ދެ ފޯނުގެވެސް ބެޒެލް ވަރަށް ހަނިކަމެވެ. އެގޮތުން ސްކްރީން ފުޅާވެފައި ބޮޑުކަން ފާހަގަކޮށްލެވެއެވެ.