މަސްތުވާ ތަކެއްޗާއެކު 30 އަހަރުގެ އަންހެނެއް ފުލުހުންގެ ހައްޔަރަށް
ހައްޔަރު ކުރީ ޑްރަގް އެންފޯސްމެންޓް ޑިޕާޓްމެންޓުން އިއްޔެ މެންދުރު 12:45 ހާއިރު ހިންގި އޮޕަރޭޝަނުގައި
ފުލުހުން މީގެ ކުރިން އަތުލައިގަނެފައިވާ ޑްރަގް ތަކެއް
މަސްތުވާތަކެއްޗާއެކު 30 އަހަރުގެ އަންހެނެއް ހައްޔަރު ކޮށްފައިވާ ކަމަށް ފުލުހުން ބުނެފިއެވެ.
ފުލުހުން ބުނީ މަސްތުވާތަކެތީގެ ވިޔަފާރި ކުރާ ކަމަށް ފުލުހުންނަށް ލިބުނު މައުލޫމާތަކާއި ގުޅިގެން ޑްރަގް އެންފޯސްމެންޓް ޑިޕާޓްމެންޓުން އަންގާރަ ދުވަހުގެ މެންދުރު ހިންގި އޮޕަރޭޝަނެއްގައި މަސްތުވާތަކެއްޗާއެކު އަންހެނަކު ހައްޔަރު ކޮށްފައިވާ ކަމަށެވެ.
ކޯޓު އަމުރެއްގެ ދަށުން އެ އަންހެން މީހާ ދިރިއުޅޭގެ ބަލައި ފާސްކުރިއިރު މަސްތުވާތަކެތި އަޅާފައި ހުރިކަމަށް ޝައްކު ކުރެވޭ ދެ ބުލެޓާއި، މަސްތުވާތަކެތި އަޅާފައި ހުރި ކަމަށް ޝައްކު ކުރެވޭ ފުއްޕާ ހަމަކާއި،މަސްތުވާތަކެތި އަޅާފައި ހުރިކަމަށް ޝައްކު ކުރެވޭ ޖޫސްޕެޓީ ކޮތަޅަކާއި ހަތް ރަބަރު ޕެކެޓާއި އަދި ޝައްކުކުރެވޭ ބިޑިއެއް ފެނިފައިވާ ކަމަށެވެ. އެ ތަކެތީގެ ތެރޭގައި 75 ގްރާމް ހެރޮއިންއާއި 17 ގްރާމްގެ ކެނަބިސް ހުރިކަމަށް ފުލުހުން ވަނީ ބުނެފައެވެ.
އެ މައްސަލަ ފުލުހުން ދަނީ ތަހުގީގު ކުރަމުންނެވެ.
