ފްރެންޗް ލީގު: ރެނެސް އަތުން ޕީއެސްޖީ ބަލިވެއްޖެ

ފްރެންޗް ލީގުގައި ރެނެސް އަތުން ޕެރިސް ސެއިންޓް ޖާމަން (ޕީއެސްޖީ) ބަލިވެއްޖެއެވެ.

އާދީއްތަ ދުވަހުގެރޭ ކުޅުނު މެޗުން ޕީއެސްޖީ ބަލިވީ ރެނެސްއާ ވާދަކޮށް 1-2 ގެ ނަތީޖާއަކުންނެވެ.

ރެނެސް ދަނޑުގައި ކުޅުނު މި މެޗު ފެށިގެން ރަނގަޅަށް ކުޅެމުންދިޔައީ ޕީއެސްޖީންނެވެ. އެޓީމުން ވަނީ ރެނެސްގެ ހާފަށް ބާރުބޮޑުކޮށް ހަމަލާތައް އުފައްދާފައެވެ.އެގޮތުން 36 ވަނަ މިނެޓުގައި ޕީއެސްޖީން ވަނީ މެޗުގެ ލީޑު ނަގާފައެވެ. މި ލަނޑު އެޑިންސަން ކަވާނީ ކާމިޔާބު ކޮށްފައިވާއިރު، މި ލަނޑަކީ ރެނެސްގެ ކީޕަރަށް ހެދުނު ގޯހެއްގެ ފައިދާ ނަގައިގެން އޭނާ ކާމިޔާބުކުރި ލަނޑެކެވެ.

ނަމަވެސް ފުރަތަމަ ހާފް ނިމުމުގެ ކުރިން ރެނެސްއިން ވަނީ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ނިއަންގްއެވެ.

ދެވަނަ ހާފް ފެށިގެން މާގިނައިރުތަކެއް ނުވަނީސް ރެނެސްއިން ވަނީ މެޗުގައި ފުރަތަމަ ފަހަރަށް ލީޑު ނަގާފައެވެ. މި ލަނޑު ވަމަވިންގާގެ އެހީތެރިކަމާއެކު ކާމިޔާބުކުރީ ޑެލް ކަސްޓިލޯއެވެ.

މި ލަނޑަށްފަހުވެސް ރެނެސްގެ ފަރާތުން ނުރައްކާތެރި ގިނަ ހަމަލާތަކެއް ވަނީ ފެނިގެންގޮސްފައެވެ. އެގޮތުން ލީޑު ފުޅާކުރަންވެސް އެޓީމަށް ވަނީ ފުރުސަތުތަކެއް ލިބި ބޭކާރުވެފައެވެ.

މި ހާފްގައި ޕީއެސްޖީގެ ފަރާތުންވެސް ހަމަލާތައް ފެނުނު ނަމަވެސް، އެ ހަމަލާތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ.

ލީގުގައި ދެން ޕީއެސްޖީ އަމިއްލަ ދަނޑުގައި ޓޮލޯސްއާ ދެކޮޅަށް ނިކުންނައިރު، ރެނެސް ރަށުން ބޭރުގައި ނިކުންނާނީ ސްޓްރެސްބާގްއާ ދެކޮޅަށެވެ.