އާދިއްތަ އަދި ބުރާސްފަތި ދުވަހުވެސް މަޖިލީހުގެ ޖަލްސާތައް ބާއްވަނީ
މިރޭ ވެސް ޖަލްސާ ބޭއްވުމަށް ގަސްތުކުރައްވާ ކަމަށް ވެސް ރަައީސް ނަޝީދު ވިދާޅުވި
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
އާދީއްތަ އަދި ބުރާސްފަތި ދުވަހު މަޖިލީހުގެ ޖަލްސާތައް ބޭއްވުމަށް ނިންމައިފި އެވެ.
މަޖިލީހުގެ ޖަލްސާތައް، އާދިއްތަ އަދި ބުރާސްފަތި ދުވަހު ނިންމާފައިވާކަން ހާމަކުރެއްވީ ހޯމަ ދުވަހުގެ ޖަލްސާ ފެއްޓެވުމަށްފަހު މަޖިލީހުގެ ރައީސް ދެއްކެވި ވާހަކަފުޅުގައެވެ. އެމަނިކުފާނު ވަނީ އެ ދެ ދުވަހުގައި ޖަލްސާތައް ބޭއްވުމުގެ އިތުރުން ހޯމަ ދުވަހުގެ ރޭ ވެސް ޖަލްސާތައް ކުރިއަށްގެންދިއުމަށް ނިންމާފައިވާކަމަށް ވިދާޅުވެެފައެވެ.
މި ދެ ދުވަހު މަޖިލީހުގެ ޖަލްސާ ބާއްވަނީ ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ބިލުތަކާއި އެޖެންޑާގައި ހުރި ކަންކަން ކުރިއަށް އޮތް ދެ ހަފުތާގެ ތެރޭގައި ނިންމުމަށެވެ. ކުރިއަށް އޮތް ދެ ހަފުތާގައި މަޖިލީހުގައި ކުރަން ޖެހޭ މަސައްކަތްތައް ވަރަށް ގިނަކަން ފާހަގަކުރައްވަމުން ރައީސް ނަޝީދް ވިދާޅުވީ، މަޖިލީހުގެ ތަޅުމުގައި ތިން ބިލަކާއި ދެ ގަރާރެއްގެ އިތުރަށް ކޮމިޓީތަކުން އައި ދެ ރިޕޯޓެއް ނިންމަން ޖެހޭކަމަށެވެ.
އޭގެއިތުރުން ސަރުކާރުން ފޮނުވި ހަ ބިލެއްގެ ފުރަތަމަ ކިޔުން މާދަމާ އިއްވާއިރު މި ދައުރުގައި މަޖިލީހުގައި ހިނގާ އެންމެ ބޮޑު އެއް މަސައްކަތް ކަމުގައިވާ މަސްވެރިކަމުގެ ބިލަށް ބަހުސް ކުރުމަށްޓަކާ މިއަދުގެ ޖަލްސާގައި ވަގުތު ދިނުމުގެ އިތުރުން މިރޭ ވެސް ޖަލްސާއެއް ބާއްވާ، މަސްވެރިކަމުގެ ބިލް ނިންމުމަކަށް ގެންދެވޭތޯ މަސައްކަތް ކުރައްވާނެ ކަމަށް ރައީސް ނަޝީދު ވިދާޅުވިއެވެ.
އާންމުކޮށް މަޖިލީހުގެ ޖަލްސާތައް ބާއްވާނީ ހަފްތާގެ ހޯމަ، އަންގާރަ، އަދި ބުދަ، މި ތިން ދުވަހުއެވެ.
އަންނަ މަހުގެ 1 ވަނަ ދުވަހުން ފެށިގެން މަޖިލީހުގެ މި ދައުރުގެ މަސައްކަތްތައް ނިންމުމަށްފަހު، މެމްބަރުން ޗުއްޓީއަށް ވަޑައިގަންނަވާނެ އެވެ. އަދި ރައްޔިތުންގެ މަޖިލީހުގެ މިއަހަރުގެ 3 ވަނަ ދައުރުގެ ޖަލްސާތައް ފަށާނީ އަންނަ އޮކްޓޯބަރު މަހުގެ ތެރޭގަ އެވެ. ދައުރުގެ ފަހު ޖަލްސާގައި އާންމުކޮށް ކުރިއަށްގެންދަނީ ބަޖެޓްގެ މަސައްކަތްތަކެވެ.
ސަރުކާރުގެ ފަރާތުން ސަޕްލިމެންޓަރީ ބަޖެޓެއް ހުށަހެޅުމަށް ނިންމާފައިވާއިރު، މި ހަފްތާގެ ތެރޭގައި އެ ބަޖެޓްވެސް މަޖިލީހަށް ހުށަހަޅުއްވާނެ ކަމަށް ފިނޭންސް މިނިސްޓަރ އިބްރާހިމް އަމީރު ވަނީ ވިދާޅުވެފަ އެވެ. އެ ބަޖެޓް ހުށަހެޅުމާއެކު މި ދައުރުގައި އެ މަސައްކަތްވެސް މަޖިލިހުން ނިންމަންޖެހޭނެ އެވެ.
