ގައުމީ ފިރިހެން ފުޓުބޯޅަ ޓީމު ތަމްރީން ދަތުރެއްގައި ލަންކާއަށް

ގައުމީ ފިރިހެން ފުޓުބޯޅަ ޓީމު ތަމްރީން ދަތުރެއްގައި ސްރީލަންކާއަށް ފުރައިފިއެވެ.

ގައުމީ ޓީމު ލަންކާއަށް ފުރީ 2022 ގައި ގަތަރުގައި އޮންނަ ފީފާ ވޯލްޑް ކަޕް ކޮލިފައިންއަށް ތައްޔާރުވުމުގެ ގޮތުންނެވެ.

ޖުމްލަ 28 ކުޅުންތެރިންގެ ޕްރިލިމިނަރީ ސްކޮޑަކާއެކު ގައުމީ ޓީމު ލަންކާއަށް ފުރިއިރު، މި ދަތުރުގައި ކޮލިފައިންގައި ގުއާމްއާ ދެކޮޅަށް ކުޅޭ މެޗަށް ވިސާ ޖެހުމުގެ ކަންތައްވެސް ކުރިޔަށްގެންދިޔުމަށް ވަނީ ހަމެޖެހިފައެވެ.

ފާހަގަކޮށްލަންޖެހެނީ ޕްރިލިމިނަރީ ސްކޮޑު އެކުލަވާލިއިރު، އެ ސްކޮޑުގައި ތަޖުރިބާކާރު ކުޅުންތެރިން މަދުކަމެވެ. އެގޮތުން މިދިޔަ އަހަރު ރާއްޖޭގެ އެންމެ މޮޅު ކުޅުންތެރިޔާގެ މަގާމު އަދި ރަން ބޫޓު ހާސިލްކުރި އަލީ އަޝްފާގު (ދަގަނޑޭ) އާއި މުހައްމަދު އާރިފް (ބަކާ) އަދި މުހައްމަދު އުމެއިރަށް ސްކޮޑުން ފުރުސަތު ނުދެއެވެ. އަދި ޒުވާން ކުޅުންތެރިޔާ ހަސަން ރާއިފް (ހަންނަ) އަކަށްވެސް ސްކޮޑުން ފުރުސަތު ނުދެއެވެ.

ކޮލިފައިންގައި ގުއާމްއާ ދެކޮޅަށް ރާއްޖެ ކުޅޭނީ ސެޕްޓެމްބަރ މަހުގެ ފަސް ވަނަ ދުވަހު އެގައުމުގައެވެ. ދެވަނަ މެޗުގައި ސެޕްޓެމްބަރ މަހުގެ 10 ވަނަ ދުވަހު ރާއްޖެ ނިކުންނާނީ އަމިއްލަ ދަނޑުގައި ޗައިނާއާ ދެކޮޅަށެވެ.

ކޮލިފައިންގައި ރާއްޖެ ހިމެނޭ ގްރޫޕްގައި ޗައިނާ އާއި ގުއާމްގެ އިތުރުން ދެން ހިމެނެނީ ފިލިޕިންސް އަދި ސީރިޔާއެވެ.