ފެނަކާއިން ދަނބިދޫ އަށް ކަރަންޓު ފޯރުކޮށްދީފި
މުޅި ރަށަށް ކަރަންޓު ދެވުނީ ފަތިހު 5:45 ހާއިރު
އަލިފާނުގެ ހާދިސާ ހިނގީ ހުކުުރު ދުވަހުގެ ރޭ
ލ. ދަނބިދޫ އިންޖީނު ގޭގައި ހިނގި އަލިފާނުގެ ހާދިސާގައި އެ ރަށުގައި ކަރަންޓު ކެނޑިފައި އޮތުމަށް ފަހު މިހާރު މުޅި ރަަށަށް ކަރަންޓު ފޯރުކޮށްދެވިފައިވާ ކަމަށް ފެނަކާ ކޯޕަރޭޝަން އިން ބުނެފިއެވެ.
އިންޖީނުގޭގައި ބޭނުންކުރާ ދެ ޖަނަރޭޓަރުގައި އަލިފާން ރޯވެ އަނދާ އަޅިއަށް ވެފައިވަނީ ހުކުރު ދުވަހުގެ ރޭގެ ވަގުތެއްގައެވެ. ހާދިސާ ގައި އެއްވެސް މީހަކަށް އަނިޔާވެފައިނުވާއިރު، އެ މައްސަލަ ހިނގަން މެދުވެރިވި ސަބަބު މިހާތަނަށް ހޯދިފައެއް ނުވެއެވެ.
ދަނބިދޫ ކައުންސިލްގެ ނައިބު ރައީސް އަހުމަދު ޝަރީފް ރާއްޖެ.އެމްވީ އަށް ވިދާޅުވީ އަލިފާން ރޯވީ، އިންޖީނު ގޭގައި ބޭނުން ކުރާ ތިން ޖަނަރޭޓަރުގެ ތެރެއިން ދެ ޖަނަރޭޓަރު ކަމަށާއި، މިހާރު ރަށަށް ކަރަންޓު ފޯރުކޮށްދެނީ އެންމެ ޖަނަރޭޓަރަކުން ކަމަށެވެ.
އަދިވެސް ކޮންމެވެސް ވަރަކަށް ކަރަންޓު ކެނޑޭ ކަމަށް އޭނާ ވިދާޅުވި އެވެ. އެ ހާދިސާ ހިނގި ހިސާބުން ފެށިގެން ރައީސް އޮފީހުގެ މިނިސްޓަރު މުހައްމަދު ޝިފާޒްގެ އެހީތެރިކަން ލިބިފައިވާކަން އޭނާ ވަނީ ފާހަގަކުރެއްވިއެވެ.
ފެނަކައިން އެ ރަށަށް ކަރަންޓު ފޯރުކޮށްދިނުމުގެ މަސައްކަތް ހުކުރު ދުަވަހުގެ ރެއިން ފެށިގެން ކޮށްފައިވާއިރު ހޮނިހިރު ދުވަހު ފެނަކާއިން ކޮށްފައިވާ ޓްވީޓެއްގައި ބުނީ، ފަތިހު 5:45 ހާއިރު މުޅި ރަށަށް ކަރަންޓު ފޯރުކޮށްދެވިފައިވާ ކަމަށެވެ.
ކަރަންޓު ދޭން ފެށުމާއި އެކު އިތުުރު ޖަނަރޭޓެއް އެ ރަށަށް ގެންދިޔުމުގެ މަސައްކަތް އެ ކުންފުނިން ދަނީ ކުރަމުންނެވެ.
ޖަނަރޭޓަރު މިހާރު ލޯޑުކޮށް ދަނބިދޫ އަށް ފޮނުވާލެވިފައިވާ ކަމަށާއި، ހޮނިހިރު ދުވަހުގެ ރޭގެ ވަގުތެއްގައި އެ ރަށަށް ގެންދެވޭނެ ކަމަށް ފެނާކައިން ވަނީ ބުނެފައެވެ.
