ލ. ދަނބިދޫ ޕަވަރ ހައުސް ގައި ހިނގި އަލިފާނުގެ ހާދިސާ އެއްގެ ސަބަބުން އެރަށުން ކަރަންޓު ކެނޑިފައިވާތީ އެ ރަށަށް ކަރަންޓު ދިނުމަށް ކުރަން ޖެހޭ ހުރިހާ މަސައްކަތެއް ކުރަމުންދާ ކަމަށް އެ ފެނަކަ ކޯޕަރޭޝަން އިން ބުނެފިއެވެ.
ފެނަކަ އިން މިހެން ބުނެފައިވަނީ އޮގަސްޓް މަހުގް 9 ވަނަ ދުވަހު ކުރި ޓްވީޓެއްގައެވެ.
ދަނބިދޫ އިންޖީނުގޭގައި އަލިފާނުގެ ހާދިސާ ހިނގާފައިވަނީ ދުވަހުގެ ހުކުރު ދުވަހުގެ ރޭ 08:25 ހާއިރު ކަމަށް އެ ރަށު ކައުންސިލުން ވަނީ ރާއްޖެ އެމްވީ އަށް މައުލޫމާތު ދެމުން ބުނެފައެވެ. ރޯވެ ބޭނުން ނުކުރެވޭ ވަރަށް އަނދާފައިވަނީ އިންޖީނުގޭގައި ބޭނުންކުރި ދެ ޖަނަރޭޓަރު ކަމަށާއި މި ހާދިސާގެ ސަބަބުން މިހާރު ރަށުން ވަނީ އެއްކޮށް ކަރަންޓު ކެނޑިފައި ކަމަށް ވެސް ކައުންސިލުން ވަނީ ބުނެފައެވެ. ކައުންސިލުން ބުނީ ރޯވި ޖަނަރޭޓަރުތަކުގެ ތެރެއިން އެއް ޖަނަރޭޓަރަކީ ހުކުރު ދުވަހު ހަވީރު އޯވަހޯލް ކުރި ޖަނަރޭޓަރެއް ކަމަށެވެ. އަދި މިހާރު ރަށަށް ކަރަންޓު ދިނުމަށް އިތުރު ޖަނަރޭޓަރެއް ވެސް ނެތްކަމަށް ކައުންސިލުން ވަނީ މައުލޫމާތު ދީފައެވެ.
މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެ އެވެ.
