ވޯލްޑް ޓްރެވަލް އެވޯޑް 2019ގައި ފުށިފަރު މޯލްޑިވްސްއަށް ލިބުނު ކާމިޔާބީ އެ ރިސޯޓަަށް ޒިޔާރަތްކުރި 100 އަށްވުރެ ގިނަ ފަތުރުވެރިންނާ އެކު ފާހަގަކޮށްފި އެވެ.
ރާއްޖޭގެ "ލީޑިންގެ ބީޗް ރިސޯރޓް"ގެ އެވޯޑް ފުށިފަރަށް ލިބުމުން ފާއިތުވި ބުދަ ދުވަހު އެކަން ކުލަގަދަ ގޮތެއްގައި ފާހަގަކުރީ އެ ރިސޯޓުގެ ގޮނޑުދޮށުގައި ބޭއްވި، "ސަންސެޓް ކޮކްޓެއިލް އިވެންޓް" އެއް ގައެވެ.
ރިސޯޓަށް ލިބުނު އެވޯޑް ގޮނޑުދޮށާއި ހަމައަށް ޖެޓްސްކީއެއްގައި ގެނައީ، ސަގާފީ ހެދުމުގައި ތިބި ދިވެހި ޒުވާނުންތަކެކެވެ. އަދި ބޮޑުބެރުގެ ހަރަކާތްތަކާއެކު ގޮނޑުދޮށުގައި ތިބި ފަތުރުވެރިންގެ ކުރިމަތިން އެވޯޑް ގެންދިޔައީ ވެސް ސަގާފީ ހެދުމުގައި ތިބި ރިސޯޓްގެ ދެ މުވައްޒިފުންނެވެ.
ފުށިފަރު މޯލްޑިވްސްގެ ޖެނެރަލް މެނޭޖަރ އަހްމަދު ސިއާރް ވިދާޅުވީ އެވޯޑް ލިބުމުން ރިސޯޓަށް ޒިޔާރަތްކުރާ ފަތުރުވެރިން ހިންހަމަ ޖެހޭފަދަ ހިދުމަތެއް ރިސޯޓުގެ ފަރާތުން ފޯރުކޮށްދެވޭކަމުގެ ޔަގީންކަން ލިބިގެން ގޮސްފިކަމަށެވެ. އަދި މި އެވޯޑް ލިބުމުން ރިސޯޓުން ފޯރުކޮށްދެވޭ ހިދުމަތްތައް އިތުރަށް ފުރިހަމަކުރުމަށް ހިއްވަރު ލިބުނުކަމަށްވެސް ސިއާރް ވިދާޅުވިއެވެ.
ސިއާރް އިތުރަށް ވިދާޅުވީ، 49 ވިލާ ރިސޯޓުގައި ހިމެނޭއިރު ރިސޯޓަށް ޒިޔާރަތް ކުރާ ކޮންމެ ފަތުރުވެރިއަކަށްވެސް އެންމެ ފުރިހަމަ ގޮތުގައި ހިދުމަތް ފޯރުކޮށްދިނުމަށް ރިސޯޓުގެ ކޮންމެ މުވައްޒަފަކުވެސް މަސައްކަތް ކުރާކަމަށެވެ.
ޅ. އަތޮޅުގައި ހިމާޔަތް ކޮށްފާ އޮންނަ ފުށިފަރު ކަނޑުގައި އޮންނަ ފުށިފަރު މޯލްޑިވްސްއަށް ޒިޔާރަތްކުރާ ފަތުރުވެރިންނަށް އެ ސަރަހައްދުގައި ޑައިވްކޮށް ކަނޑުގެ ގުދުރަތީ ރީތިކަން ތަޖުރިބާ ކޮށްލުމުގެ ފުރުސަތު ލިބިގެންދާނެއެވެ. ފުށިފަރު މޯލްޑިވްސް ހުޅުވާފާވަނީ 2017 ވަނަ އަހަރުއެވެ.
