ޔުނައިޓެޑު ދޫކޮށް ލުކާކޫ އިންޓައަށް ބަދަލުވެއްޖެ

މެންޗެސްޓަރ ޔުނައިޓެޑު ދޫކޮށް ބެލްޖިއަމްގެ ފޯވާޑް ރޮމެލޫ ލުކާކޫ އިންޓަ މިލާނަށް ބަދަލުވެއްޖެއެވެ.

ލުކާކޫ އެވަޓަންއަށް ބަދަލުވީ ފަސް އަހަރު ދުވަހުގެ އެއްބަސްވުމެއްގެ ދަށުން 74 މިލިއަން ޕައުންޑަށެވެ. މިއާއެކު އޭނާ ވެގެން ގޮސްފައިވަނީ ތިންވަނައަށް އިޓާލިއަން ލީގުގެ ކްލަބަކަށް ގެނައި އެންމެ އަގުބޮޑު ކުޅުންތެރިޔާއަށެވެ.

އިންޓައަށް ބަދަލުވުމަށް ފަހު ލުކާކޫ ބުނީ، އިންޓައަކީ އޭނާ ބަދަލުވާން ބޭނުންވި ހަމައެކަނި ކްލަބް ކަމަށާއި، ކްލަބް އެންމެ އުހަށް ގެންދިޔުމަށް ކުރެވެން އޮތް ހުރިހާ މަސައްކަތެއް ކުރާނެ ކަމަށެވެ.

ޔުނައިޓެޑުން ވަނީ ކްލަބަށް ލުކާކޫ ކޮށްދިން ހިދުމަތްތަކަށް ޝުކުރު އަދާކޮށް، އޭނާއަށް މުސްތަގުބަލުގައި ކާމިޔާބަށް އެދި ނޫސް ބަޔާނެއް ނެރެފައެވެ.

މީގެ ދެ އަހަރު ކުރިން އެވަޓަން ދޫކޮށް، ލުކާކޫ ޔުނައިޓެޑަށް ސޮއިކޮށްފައި ވަނީ 75 މިލިއަން ޕައުންޑަށެވެ. އޭނާ އަކީ އޭރު ދެވަނަ އަށް ޕްރިމިއާ ލީގުގެ ކްލަބަކަށް ވިއްކާލި އެންމެ އަގުބޮޑު ކުޅުންތެރިޔާއެވެ.

ލުކާކޫ ވަނީ ޔުނައިޓެޑަށް މިހާތަނަށް ކުޅުނު 96 މެޗުގައި 42 ލަނޑު ކާމިޔާބު ކޮށްފައެވެ. އަދި އޭނާ ވަނީ އެވަޓަންއަށް ކުޅުނު 166 މެޗުގައި 87 ލަނޑު ކާމިޔާބު ކޮށްފައެވެ.

ޗެލްސީން 2014 ވަނަ އަހަރު އެވަޓަންއަށް ބަދަލުވި ލުކާކޫ ވަނީ ވެސްޓްބްރޮމް އަށް ވެސް ކުޅެފައެވެ. ޗެލްސީއާއެކު ދެ ސީޒަން ހޭދަކޮށްފައިވާ ލުކާކޫ ވަނީ އެ ޓީމަށް 15 މެޗު ކުޅެދީފައެވެ.

ލުކާކޫ ވަނީ ބެލްޖިއަމް ޓީމަށް މިހާތަނަށް ކުޅުނު 81 މެޗުގައި 48 ލަނޑު ކާމިޔާބު ކޮށްފައެވެ. އަދި އޭނާ ވަނީ އެޓީމާއެކު މިދިޔަ އަހަރު ފީފާ ވޯލްޑް ކަޕްގެ ތިންވަނަ ހޯދާފައެވެ.