މާލެއާއި ހުޅުމާލޭގައި އިތުރު ދެ ސުކޫލެއް އިމާރާތް ކުރުމުގެ މަސައްކަތް މި އަހަރު ތެރޭގައި ފެށޭނެ ކަމަށް އެޑިއުކޭޝަން މިނިސްޓްރީން ބުނެފިއެވެ.

މިނިސްޓްރީގެ މަސައްކަތްތަކާ ގުޅޭގޮތުން މީޑިއާތަކަށް މައުލޫމާތު ދެއްވުމަށް ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓްރީގެ ސްޓޭޓް މިިނިސްޓަރ އަހުމަދު ރިޔާޒް ވިދާޅުވީ، މިއަހަރު ތެރޭގައި މާލޭގައި އިތުރު ދެ ސުކޫލެއް އެޅުމުގެ މަސައްކަތް ފެށިގެންދާނެ ކަމަށާއި، އެއީ ދަރުމަވަންތަ ސުކޫލާއި، ހުޅުމާލޭ ފޭސް 2 ގައި އެޅުމަށް ނިންމާފައިވާ ސުކޫލެއް ކަމަށެވެ. އެގޮތުން ދަރުމަވަންތަ ސުކޫލު އިމާރާތް ކުރުމަށް ނިންމަވާފައިވަނީ ވިލާ ކޮލެޖު ކުރިމަތީގައި އޮންނަ ހުސްބިމުގައި ކަމަށާއި، މި ދެ މަޝްރޫއުގެ ވެސް ޑިޒައިނިންގ މަސައްކަތް ފެށިފައިވާ ކަމަށް ރިޔާޒް ވިދާޅުވިއެވެ.

ރިޔާޒް އިތުރަށް ވިދާޅުވީ، މި ދެ ސުކޫލަކީ ވެސް ވަށާޖެހޭ ތައުލީމުގެ ނިޒާމެއް ޤާއިމު ކުރެވިފައިވާ ސުކޫލުތަކަކަށް ވެގެންދާނެ ކަމަށެވެ.

އޭގެ އިތުރުން، ޕީއެސްއައިޕީގެ ދަށުން އެޑިއުކޭޝަން މިނިސްޓްރީގެ ގިނަ މަޝްރޫތަކެއް ކުރިއަށްދާއިރު، އިންޑިއާ ސަރުކާރުގެ ހިލޭ އެހީގެ 3 މަޝްރޫއާއެކު މިހާރު ވެސް 40 މަޝްރޫއެއް ހިމެނޭ ކަމަށާއި، އޭގެ ތެރެއިން ގިނަ މަޝްރޫތަކެއް މިހާރުވެސް އިވެލުއޭޓް ކުރެވި ކޮންޓްރެކްޓަރުންނާއި ހަވާލު ކުރެވިފައިވާ ކަމަށް ރިޔާޒް ވިިދާޅުވިއެވެ. އެގޮތުން 8 މަޝްރޫއެއްގެ ޑިޒައިނިންގ މަސައްކަތް މިހާރު ކުރެވެމުންދާ ކަމަށް ވެސް އޭނާ ވިދާޅުވެފައިވެއެވެ.

މި ސަރުކާރުން ތައުލީމީ ދާއިރާ ކުރިއެރުވުމަށް ބޮޑު އަހައްމިއްޔަތު ކަމެއް ދޭއިރު، ރާއްޖޭގެ ތާރީޚްގައި ވެސް ތައުލީމަށް އެންމެ ބޮޑު ހޭދައެއް ކުރަނީ މި ސަރުކާރުން ކަމަށް ރައީސް އިބްރާހިމް މުހައްމަދު ސޯލިހު ވަނީ ވިދާޅުވެފައެވެ. އެގޮތުން މި ސަރުކާރުން 3.4 ބިލިއަން ރުފިޔާގެ ބަޖެޓެއް ތައުލީމީ ދާއިރާއަށް ވަނީ ކަނޑައަޅާފައެވެ.