އިންޓަނެޓްގެ އަގު ކުޑަ ކުރެވިގެން ނޫނީ ޑިޖިޓަލް ޓެކްނޮލޮޖީގެ ހަގީގީ މަންފާއެއް ނުލިބޭނެ!

އާންމު ރައްޔިތުން އިންޓަނެޓަށް ކުރަންޖެހޭ ހޭދަ ކުޑަކުރެވިގެން ނޫނީ، ޑިޖިޓަލް ޓެކްނޮލޮޖީގެ ހަގީގީ މަންފާ ނުލިބޭނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވިދާޅުވެއްޖެއެވެ.

އުރީދޫގެ "މޫލީ" އިފްތިތާހް ކުރުމުގެ ގޮތުން ކުރުނބާ މޯލްޑިވްސްގައި ކުރިއަށް ގެންދިޔަ ރަސްމިއްޔާތު ޝަރަފްވެރިކޮށްދެއްވާ ވާހަކަ ދައްކަވަމުން ރައީސް ސޯލިހް ވިދާޅުވީ އިންޓަރނެޓާއި ޑިޖިޓަލް ޓެކްނޮލޮޖީ އަކީ އޭގެ ޒާތުގައި އަސާސީ ހިދުމަތް ކަމަށާއި އެއާ ނުލާ ދިވެހި ޒުވާނުންނަށް ދިރި ނޫޅެވޭނެ އެއްޗެހި ކަމުގައެވެ. އެހެންކަމުން އިންޓަރނެޓް ހިދުމަތުގެ އަގުތައް އަތްފޯރާފަށަށް ތިރިކޮށްގެން ނޫނީ ޑިޖިޓަލް ޖަޒީރާ ރާއްޖޭގެ އައްސޭރި އަތު ނުވާނެ ކަމުގައި އެމަނިކުފާނު ވިދާޅުވިއެވެ.

ރައީސް ސޯލިހް އިތުރަށް ވިދާޅުވީ އިންސާނީ ވަސީލަތްތައް ތަރައްގީކުރުމަށް އެންމެ އިސް ދައުރެއް އަދާކުރަނީ ޓެކްނޮލޮޖީ ކަމުގައެވެ. އަދި ޑިޖިޓަލް ޓެކްނޮލޮޖީގެ ބޭނުން އެންމެ ބޮޑަށް ހިފަނީ، ތައުލީމީ ދާއިރާއާއި ސިއްހީ ދާއިރާގައި އިންސާނުން ބިނާކުރުމަށް ކަމުގައި ފާހަގަ ކުރެއްވިއެވެ.

އިތުރަށް ވާހަކަފުޅު ދައްކަވަމުން ރައީސް ވިދާޅުވީ އުރީދޫއަކީ، ރާއްޖޭގައި ކާމިޔާބުކަމާއެކު ފޮރިން އިންވެސްޓްމެންޓްތައް ހިންގޭނެ ކަމުގެ ނަމޫނާއެއް ކަމުގައެވެ. އެފަދަ ކިތަންމެ އިންވެސްޓްމެންޓެއް މިހާރު ވެސް ރާއްޖޭގައި އެބަ ހިންގާކަމަށާއި އެ އިންވެސްޓްމެންޓްތަކުން ލިބޭ ފައިދާއަށްވުރެ، ރާއްޖެއަށް ލިބޭ މަންފާ ވަކިން ކުޑަނޫންކަން، އުރީދޫން ސާބިތުކޮށްދެއްވާފިކަމުގައެވެ. ސަރުކާރުންތިބީ ފޮރިން އިންވެސްޓަރުންނަށް މަރުހަބާ ކިޔަން ތައްޔާރަށް ކަމަށް ރައީސް ވަނީ ވިދާޅުވެފައެވެ.

އުރީދޫއިން ބުދަ ދުވަހު އިފްތިތާހް ކުރި "މޫލީ' ޕްލެޓްފޯމަކީ އިލެކްޓްރޯނިކް ވިޔަފާރިއަށް ފަހި މާހައުލަކަށް ވާނެކަމަށް އުންމީދު ކުރައްވާކަމަށް ރައީސް ސޯލިހް ވިދާޅުވިއެވެ.