ރޮނާލްޑޯ ފަދަ މޮޅު ކުޅުންތެރިޔަކަށްވާން ބޭނުން: ފެލިކްސް

ޕޯޗުގަލްގެ ތަރި ކްރިސްޓިއާނޯ ރޮނާލްޑޯފަދަ ކުޅުންތެރިޔަކަށް ވާން ބޭނުންވާކަމަށް ޕޯޗުގަލްގެ ޒުވާން ކުޅުންތެރިޔާ ފެލިކްސް ބުނެފިއެވެ.

ގިނަ ބަޔަކު ގަބޫލުކުރާ ގޮތުގައި ފެލިކްސް އަކީ ރޮނާލްޑޯއަށްފަހު ޕޯޗުގަލްގެ ފުޓުބޯޅައިގައި އެންމެ ވިދުންގަދަ ތަރިއަށް އޭނާ ވާނެ ކަމަށެވެ. އެގޮތުން ނިމިދިޔަ ސީޒަނުގައި ފެލިކްސް ދެއްކި މޮޅު ކުޅުމާއިއެކު، އޭނާ ވެގެން ގޮސްފައިވަނީ ޔޫރަޕްގެ ބޮޑެތި ކްލަބްތަކުން އެންމެ ގަދައަށް ފާރަލީ ކުޅުންތެރިޔާއަށެވެ. އެގޮތުން އޭނާ ވަނީ ސްޕެއިންގެ ގަދަ ބާރެއްކަމަށްވާ އެތްލެޓިކޯ މެޑްރިޑްއަށް އެ ކުލަބުގެ ރިކޯޑް އަދަދެއް ކަމަށްވާ 126 މިލިއަން ޔޫރޯއަށް ބަދަލުވެފައެވެ.

އެތްލެޓިކޯއިން ޕްރިސީޒަނުގައި އެންމެ ވިދުންގަދަ ކުޅުންތެރިޔާއަކަށް ވެސް ފެލިކްސް ވެގެން ދިޔައިރު އޭނާ މި ސީޒަނުގައި މޮޅު ކުޅުމެއް ދައްކާނެ ކަމަށް އެތްލެޓިކޯގެ ކޯޗު ވަނީ ބުނެފައެވެ.

އީއެސްޕީއެންއަށް ދިން އިންޓަވިޔުއެއްގައި ފެލިކްސް ބުނީ ރޮނާލްޑޯއަކީ ތަފާތު މޮޅު ކުޅުންތެރިޔެއް ކަމަށާއި އޭނާ ކްލަބާއި ގައުމީ ޓީމުގެ އިތުރުން ހޯދައިފައިވާ އިންޑިވިޖުއަލް ކާމިޔާބީ ތަކުން އެކަން ފެންނާނެ ކަމަށެވެ. މީގެ އިތުރުން ފެލިކްސް ބުނީ ރޮނާލްޑޯ ހޯދައިފައިވާ ކާމިޔާބީތައް ހޯދުން އެއީ ކޮންމެ ކުޅުންތެރިޔެއްވެސް ހޯދަން ބޭނުންވާނެ ކާމިޔާބީތަކެއް ކަމަށާއި އޭނާ ވެސް ރޮނާލްޑޯ ފަދަ ކުޅުންތެރިޔަކަށް ވާން ބޭނުންވާ ކަމަށެވެ.

ފެލިކްސް އެތްލެޓިކޯ މެޑްރިޑް އިހުތިޔާރު ކުރީ އެކުލަބަށް ކުޅެމުން އަންނަ ފޯވާޑުންގެ ސަބަބުން ކަމަށް އޭނާ ވަނީ މި އިންޓަވިއުގައި ބުނެފައެވެ.

ބެންފީކާގެ ޒުވާން ޓީމަށް ދެ ސީޒަން ކުޅެފައިވާ ފެލިކްސް އޭނާގެ ސީނިއަރ ކެރިޔަރު ފެށީ މިދިޔަ ސީޒަނުގައި ބެންފީކާގެ ސީނިއާ ޓީމުންނެވެ. އެގޮތުން އޭނާ ވަނީ މިހާތަނަށް އެޓީމަށް ކުޅުނު 43 މެޗުގައި 20 ލަނޑު ކާމިޔާބު ކޮށްފައެވެ.

މީގެއިތުރުން ފެލިކްސް ވަނީ ބެންފީކާއާއެކު ލީގު ހޯދުމުގެ އިތުރުން ޔުއެފާ ޔޫތު ލީގުގެ ދެވަނަ ވެސް ހޯދާފައެވެ. އަދި ޕޯޗުގަލް ގައުމީ ޓީމަށް މެޗެއް ކުޅެފައިވާ ފެލިކްސް ވަނީ ޕޯޗުގަލް ޓީމާއެކު ޔުއެފާ ނޭޝަންސް ލީގުވެސް ކާމިޔާބު ކޮށްފައެވެ.