ބީޗް ހުސްކުރަން ދިން މުއްދަތު ހަމަވުމުން ބަންދު ކޮށްފި

ހުޅުމާލޭ ބީޗް ސަރަހައްދުގައި ކެފޭ، ރެސްޓޯރެންޓްތައް ހުސްކުރުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީން) ދީފައިވާ މުހުލަތު ހަމަވުމާއެކު އެ ސަރަހައްދު ބަންދު ކޮށްފިއެވެ.

ހުޅުމާލޭ ފޭސް އެކަކާއި ފޭސް ދޭކަށް ބޭނުންވާ ޔުޓިލިޓީ (ފެނާއި ނަރުދަމާ) އެޅުމަށް ބީޗް ސަރަހައްދު ހުސްކުރުމަށް މި މަހުގެ 30 ވަނަ ދުވަހުގެ ކުރިން ވަނީ އަންގާފައެވެ.

އެޗްޑީސީގެ ޑެޕިއުޓީ މެނޭޖިން ޑިރެކްޓަރ މުހައްމަދު އާތިފު ރާއްޖެއެމްވީއަށް ވިދާޅުވީ ބީޗް ސަރަހައްދު ބަންދު ކޮށްފައިވަނީ ދީފައިވާ މުއްދަތު ހަމަވުމުން ކަމަށެވެ.

ހުޅުމާލޭގެ ދެވަނަ ފިޔަވަހީގެ ފެނާއި ނަރުދަމާގެ ނިޒާމު ގާއިމް ކުރުމަށް 25 މިލިއަން ޑޮލަރަށް ހަވާލު ކޮށްފައިވަނީ މާލޭ ވޯޓާ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ)އާއެވެ. އެމަޝްރޫއުގެ ތެރެއިން ދެވަނަ ފިޔަވަހީގެ ފެނާއި ނަރުދަމާގެ ނެޓްވޯކް ގާއިމުކުރުމާއި އެ ތަނުގެ މަގު ހުރަސްކޮށް އަޅަން ޖެހޭ ހޮޅި ލައިންތައް އަޅާނެއެވެ. އެމަޝްރޫއު އެޗްޑީސީއިން އެމްޑަބްލިއުއެސްސީއާއި ހަވާލު ކޮށްފައިވަނީ 2017 ވަނަ އަހަރުގެ ޖެނުއަރީ މަހުގެ ތެރޭގައެވެ.