މާލޭގައި ދިވެއްސަކާ ކައިވެނި ކޮށްގެން ދިރިއުޅެމުން ދިޔަ ޔަމަނުގެ ރައްޔިތެއް ކަމަށްވާ ޔާސިރު ޔަހުޔާ ސޯލިހު ރާއްޖެއިން ފޮނުވާ ނުލެވިގެން އުޅެނީ އޭނާގެ ފަރާތުން ލިބެންޖެހޭ އެއްބާރުލުން ނުލިބިގެން ކަމަށް މޯލްޑިވްސް އިމިގްރޭޝަނުން ބުނެފިއެވެ.

ޔާސިރު ކޯޓު އަމުރެއްގެ ދަށުން ހައްޔަރު ކޮށްފައިވަނީ މާޗް3، 2017 ގައި ސައުދީ އަރަބިއްޔާގެ ރަސްގެފާނު ރާއްޖެއަށް ކުރައްވަން އުޅުއްވި ދަތުރުފުޅާ ދިމާކޮށެވެ. އޭރު އޭނާ މަސައްކަތް ކުރަމުން ދިޔައީ އަހުމަދިއްޔާ ސްކޫލާއި، އަރަބިއްޔާ ސްކޫލްގެ އަރަބި ޓީޗަރެއްގެ ގޮތުގައެވެ.

ޔާސިރުގެ މައްޗަށް ފުލުހުން ހޯދި ހެއްކާއި ގަރީނާގެ މައްޗަށް ބިނާކޮށް އޭނާ ހައްޔަރު ކުރުމަށް ނެރުނު ކޯޓު އަމުރުގައިވާ ގޮތުން ބޭރުގެ ޓެރަރިސްޓް ޖަމާއަތަކާ ގުޅިގެން ހަނގުރާމަތަކަށް ރާއްޖެއިން މީހުން ފޮނުވާ ކަމުގެ ތުހުމަތު އޭނާގެ މައްޗަށް ވަނީ ކޮށްފައެވެ. އެ އަމުރުގައި އޭނާގެ މައްޗަށް ވަނީ ޓެރަރިޒަމްގެ ތުހުމަތު ކޮށްފައެވެ.

ޔާސިރު ހައްޔަރު ކުރުމަށް ފަހު އޭރު ފުލުހުން ވަނީ އޭނާގެ ޕާސްޕޯޓް ހަވާލު ކުރުމަށް އެދިފައެވެ. ނަމަވެސް އޭނާ ވަނީ ޕާސްޕޯޓަކީ ޔަމަނުގެ ދައުލަތުގެ އެއްޗެއް ކަމަށާއި އެއީ ދިވެހި ދައުލަތުގެ އެއްޗެއް ނޫން ކަމަށް ބުނެ ޕާސްޕޯޓް ދިނުމަށް ދެކޮޅު ހަދާފައެވެ. އޭގެ ފަހުން މިހާތަނަށް ވެސް އޭނާގެ ޕާސްޕޯޓް އިމިގްރޭޝަނާއި ހަވާލު ކޮށްފައެއް ނުވެއެވެ.

އިމިގްރޭޝަންގެ މިޑިއާ އޮފިޝަލް ރާއްޖެއެމްވީއަށް ވިދާޅުވީ ޔާސިރު ހިފަހައްޓާފައިވަނީ އިމިގްރޭޝަން ގާނޫނުގެ 21 ވަނަ މާއްދާއިން އިމިގްރޭޝަން ކޮންޓްރޯލާއަށް ލިބިގެންވާ ބާރުގެ ދަށުން ކަމަށެވެ.

އެމާއްދާގައިވާ ގޮތުން ރާއްޖޭގައި ހުރުމުގެ ހުއްދަ ބިދޭސީއަކަށް ދީފައިވަނިކޮށް، ނޯޓިސް ދިނުމަށް ފަހު، އެ ހުއްދަ ބާޠިލު ކޮށްފިނަމަ، އެ ހުއްދަ ބާޠިލުވާ ދުވަހުންފެށިގެން އޭނާ ރާއްޖޭގައި ހުރެގެން ނުވާނެއެވެ. ބިދޭސީއަކު ވަގުތުން ރާއްޖެއިން ފުރައިގެން ދެވޭނޭގޮތެއް ނެތިގެން ރާއްޖޭގައި ހުންނަންޖެހިއްޖެނަމަ، އޭނާ ފުރައިގެން ދަންދެން ކޮންޓްރޯލަރ އޮފް އިމިގްރޭޝަން އެންޑް އެމިގްރޭޝަނުން ކަނޑައަޅާ ތަނެއްގައި ބެހެއްޓިދާނެ ކަމަށް އެގާނޫނުގައި ވެއެވެ.

އިމިގްރޭޝަނުން ބުނީ ޔާސިރު ރާއްޖެއިން ބޭރަށް ފުރުވާލުމަށް ނިންމީ އޭނާ ރާއްޖޭގައި ބެހެއްޓުން އެއީ ގައުމީ ސަލާމަތަށް ހުރި ނުރައްކަލެއް ކަމަށް ވާތީ ކަމަށެވެ.

ޔާސިރާ ބެހޭގޮތުން ހޯމް މިނިސްޓަރު އިމްރާންއަބްދުﷲ ވެސް މީގެ ކުރިން ވިދާޅުވެފައި ވަނީ އޭނާއާއި ގުޅޭ މައުލުމާތު ހާމަކުރުމަކީ ރާއްޖޭގެ އަމަން އަމާންކަމާއި ރައްކާތެރިކަމަށް ކޮންމެ ވެސް ވަރަކަށް އޮތް ގޮންޖެހުމެއް ކަމަށެވެ. އަދި އޭނާ ބަހައްޓާފައި ވަނީ ޑީޕޯޓް ކުރެވެންދެން ބަހައްޓާ ޖަލެއްގައި ކަމަށް އިމްރާން ވިދާޅުވެފައި ވެއެވެ.

ޔާސިރު މިހާރު ހުރީ އިމިގްރޭޝަނުން އަންގައިގެން ހުޅުމާލޭގައި ބިދޭސީން ބަންދު ކޮށްފައި ބައިތިއްބާ ހުޅުމާލޭ ޑިޓެންޝަން ސެންޓަރު ހުޅުމާލެ ޖަލުގައެވެ. މައުލޫމާތު ލިބިފައިވާ ގޮތުގައި ޔާސިރުގެ ވޯކް ވިސާއާއި އޭނާގެ މެރިއޭޖް ވިސާ ވެސް އިމިގްރޭޝަނުން ވަނީ ކެންސަލް ކޮށްފައެވެ.