ވަޒީފާއިން ވަކިކޮށްފައި ތިބި މީހުންގެ މައްސަލަތައް ބެލުމުން ސަބް ކޮމެޓީއެއް އެކުލަވާލައިފި
29 ޖުލައި 2019 | ހޯމަ 13:04ސަބް ކޮމެޓީގައި ފަސް މެމްބަރުން ހިމެނޭ
ިމިނިވަން މުއައްސަސާތަކުގެ ކޮމެޓީގެ ތެރެއިން
ސިވިލް ސަރވިސް ވަޒީފާއިން ވަކިކޮށްފައި ތިބި މީހުންގެ މައްސަލަތައް ބެލުމުން އަންނަ މިނިވަން މުއައްސަސާތަކުގެ ކޮމެޓީން، އެކޮމެޓީގެ ސަބް ކޮމެޓީއެއް އެކުލަވާލައިފިއެވެ.
މިމައްސަލަ ބެލުމަށް ސަބް ކޮމެޓީއެއް އެކުލަވާލީ، ހޯމަ ދުވަހު ބޭއްވި ކޮމެޓީގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ. ސަބް ކޮމެޓީއެއް އެކުލަވާލަން ހުށަހެޅުއްވީ އިސްދޫ ދާއިރާގެ މެމްބަރު އަލީ ހަމީދެއެވެ. އަދި މިކަމަށް ތާއީދުކުރެއްވީ އިނގުރައިދޫ ދާއިރާގެ މެމްބަރު ހަސަން އަހުމަދެވެ.
ސަބް ކޮމެޓީގެ މެމްބަރުންނަކީ ތިނަދޫ ދެކުނު ދާއިރާގެ މެމްބަރު އަބްދުﷲ ހަނީފް، އިސްދޫ ދާއިރާގެ މެމްބަރު އަލީ ހަމީދު، ވިލިމާލެ ދާއިރާގެ މެމްބަރު އަހުމަދު އުޝާމް، ގުރައީދު ދާއިރާގެ މެމްބަރު އިބްރާހިމް ރިޒާ އަދި އައްޑޫ މީދޫ ދާއިރާގެ މެމްބަރު ރޮޒެއިނާ އާދަމްއެވެ.
މުގައްރިރު ރޮޒެއިނާ ވިދާޅުވީ ކޮމެޓީގެ ޒިންމާއަކީ ސިވިލް ސަރވެންޓުންނާއި އެ ތަންތަނުގެ ވެރިންނާ އެހުރިހާ ބޭފުޅުން ޒިންމާ އަދާކޮށްފައިވޭތޯ ބެލުމާއި، ޒިންމާ އަދާނުކުރާ ކަމަށްވާނަމަ، އެބޭފުޅުން ބަދަލުކޮށްގެން ޒިންމާ އަދާކުރާނެ ބަޔަކު އެތަންތަނަށް އައްޔަންކުރުން ކަމަށެވެ. ސިވިލް ސާރވިސް ކޮމިޝަނާ ގުޅިފައިހުރި މަސައްކަތްތައް ކުރާއިރު، މުއައްޒަފުން ވަކިކޮށްފައި ހުރީ ކިހިނެތްތޯ ބެލުމާއި، ޖަވާބުދާރީވުމަށް ފުރުސަތު ދީފައިވޭތޯ ވެސް ބަލާނެ ކަމަށް މެމްބަރު ރޮޒެއިނާ ވިދާޅުވިއެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ސިވިލްސަރވިސް ވަޒީފާއިން ގިނަ ބަޔަކު ނުހައްގު ގޮތުގައި ވަނީ ވަކިކޮށްފައެވެ.
