ދެ ރައީސުން ދިވެހި ފަންނާނުންގެ މިއުޒިކީ އިދު ބައްލަވައިލައިފި
29 ޖުލައި 2019 | ހޯމަ 03:36ޝޯ ވަރަށް ކާމިޔާބު
ރައީސް ސޯލިހު އާއި ރައީސް ނަޝީދު
މިނިވަން ދުވަހާ ގުޅިގެން އަލިމަސް ކާނިވާ ސްޓޭޖް ސަރަހައްދުގައި ކުރިޔަށް ގެންދިޔަ ދިވެހި ފަންނާނުންގެ މިއުޒިކީ އީދު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ދެކަނބަލުންނާ މަޖިލީހުގެ ރައީސް މުހައްމަދު ނަޝީދު ބައްލަވައިލައްވައިފިއެވެ.
އެ ޝޯ ބައްލަވާލެއްވުމަށް ހެރިޓޭޖް މިނިސްޓަރު ޔުމްނާ މައުމޫނާއި އެ މިނިސްޓްރީގެ އިސްބޭފުޅުންގެ އިތުރުން ފިޝަރީޒް މިނިސްޓަރު ޒަހާ ވަހީދު ވެސް ވަނީ ރައީސް ސޯލިހު އަރިހުގައި ބައިވެރިވެވަޑައިގެންފައެވެ. އެ ޝޯ ކުރިޔަށް ގެންގޮސްފައިވަނީ ރޭގަނޑު ނުވަޔަކުން 12 އަށެވެ.
54 ވަނަ މިނިވަން ދުވަސް ފާހަގަކުރުމުގެ ގޮތުން ގޮތުން މިނިސްޓްރީ އޮފް އާޓްސް ހެރިޓޭޖް އެންޑް ކަލްޗާ އާއި ނެޝަނަލް ސެންޓާ ފޯ ދި އާޓްސް އިން އާދިއްތަ އަދި ހޯމަ ދުވަހުގެރޭ ބޭއްވި އެ ޝޯގައި ރާއްޖޭގެ މަޝްހޫރު ފަންނާނުންގެ އިތުރުން ގިނަ ބޭންޑު ތަކަކުން ވަނީ ތަފާތު އައިޓަމްތައް ހުށައަޅާފައެވެ. އެގޮތުން ޓްރެފިކް ޖޭމް، ގްރެވިޓީ، ސްކައިރޮކް، ހަބޭސް ބޮޑުބެރު ގްރޫޕް، ދަންމާނު ބޮޑު ބެރު ގްރޫޕުގެ އިތުރުން ސިމްބަލިކް ރިކޯޑްސް ފާހަގަ ކޮށްލެވެއެވެ.
ހެރިޓޭޖް މިނިސްޓްރީގެ މީޑިއާ ޑިރެކްޓަރު ނާއިލް ރަޝީދު ރާއްޖެ.އެމްވީ އަށް ވިދާޅުވީ، އެ އިވެންޓު ވަރަށް ''ސަކްސެސްފުލް'' ކަމަށާއި، ހީނުކުރާހާ ވަރަށް ވުރެ ބޮޑު ތަރުހީބެއް ލިބިގެން ގޮސްފައިވާ ކަމަށެވެ. އެ ފަދަ ޝޯއެއް ގިނަ ދުވަސްތަކެއް ފަހުން ބާއްވާފައިވާއިރު، މިއުޒިކަށް އޮތް އޯޑިއެންސް މިހާރުވެސް އެބައޮތްކަން ފާހަގަވެގެން ގޮސްފައިވާ ކަމަށް ވިދާޅުވިއެވެ. ފަންނާނުނަށް ފުރުސަތު ހޯދައިދިނުމަށް އެ މިނިސްޓްރީ އަބަދުވެސް މަސައްކަތް ކުރާނެ ކަމުގެ ޔަގީންކަން ނާއިލް ދެއްވިއެވެ.
