ގެލެކްސީ ފޯލްޑް ނެރުން ސެޕްޓެމްބަރަށް ފަސްކޮށްފި

ސަމްސަންގ ގެލެކްސީ ނޯޓް 10 (ގެލެކްސީ ފޯލްޑް)ގެ ސްކްރީނުގައި ޓެކްނިކަލް ބޮޑެތި މައްސަތަކެއް ހުރިކަން ފާހަގަ ކުރެވިގެން، އެ ފޯނު އަންނަ ސެޕްޓެމްބަރުގައި ނެރުމަށް ފަސްކޮށްފިއެވެ.

ފޯލްޑަށް ދިމާވި މައްސަލަ ގިނަ ދުވަސްތަކެއްގެ މަސައްކަތުން ހައްލުކޮށް، ސެމްސަންގުން ވަނީ ފޯނު ވަރަށް ރަނގަޅަށް ޓެސްޓްކޮށްފައި ކަމަށް މީޑިއާ ތަކުގައި ރިޕޯޓު ކޮށްފައިވެއެވެ. އެ ކުންފުނީގެ އޮފިޝަލުންނާ ހަވާލާދީ މީޑިއާތަކުން ބުނެފައިވާ ގޮތުގައި ސެޕްޓެމްބަރުގެ ކުރީކޮޅު ގެލެކްސީ ފޯލްޑް ބާޒާރަށް ނިކުންނާނެއެވެ.

4.6 އިންޗީގެ އަދި އެއްކޮށް ހުޅުވައިލުމުން 7.3 އިންޗީގެ ޓެބްލެޓަކަށް ބަދަލުވާ އެ ފޯނު ސެމްސަންގ ކުންފުނިން ބޭނުންވަނީ، ޗައިނާގެ ވާވޭ ކުންފުނީގެ ފަތްޖެހި ފޯނު "މޭޓް އެކްސް" ސެޕްޓެމްބަރުގެ ތެރޭގައި ނެރުމުގެ ކުރިން، ބާޒާރަށް ނެރޭށެވެ. ގެލެކްސީ ފޯލްޑަކީ ހަ ކެމެރާ ވެސް އެކުލެވިގެންވާ ފޯނެކެވެ.

ސެމްސަންގ އިން އުފައްދާފައިވާ ފަތްޖެހި ފޯނުގެ ސާމްޕަލް މިދިޔަ ފެބްރުއަރީ މަހު ދައްކާލިއިރު، އެ ކުންފުނިން ވަނީ އެ ޒާތުގެ ފޯނު ތައްޔާރުކޮށް، އެންމެ ފުރަތަމަ ދައްކައިލުމުގެ ޝަރަފު ވެސް ހޯދާފައެވެ.

އެ ކުންފުނިން ކުރިން ނިންމާފައި އޮތީ އެޕްރީލް މަހުގެ 26 ގައި ފޯނު ރަސްމީކޮށް ނެރެ، ވިއްކަން ފެށުމަށެވެ. ނަމަވެސް އެ ކުންފުނިން ނެރުނު ގެލެކްސީ އެފްގެ ޓެކްނިކަލް މައްސަލަތަކެއް ހުރި ކަމަށް ބުނެ މީޑިއާގައި ދައުރުވި ރިވިއުތައް ރަނގަޅުނުވުމުން ފޯނު ނެރުން މަޑުޖައްސާލީއެވެ. އަދި ކުރިން ނަގާފައި ހުރި އޯޑަރުތައް ކެންސަލް ކުރުމަށް ފަހު އޯޑަރު ނެގުން ވެސް ވަނީ ހުއްޓާލާފައެވެ.

އޮގަސްޓު މަހުގެ 7 ވަނަ ދުވަހު ބާއްވާ ސެމްސަންގގެ ބޮޑު އިވެންޓްގެ ތެރޭގައި މި ފޯނު ދައްކައިލުމުގެ ފުރުސަތު ވެސް ބޮޑެވެ. އެ އިވެންޓްގެ އެންމެ ހާއްސަ ކަމަކަށް ވެގެންދާނީ ގެލެކްސީ ފޯލްޑް އާންމު ކުރުމެވެ.