ޓުއަރިޒަމް މިނިސްޓްރީއިން ރިސޯޓުތަކުން ސީއެސްއާރުގެ ނަމުގައި ފައިސާ ނެގުމަށްފަހު އެ ފައިސާތައް މޯލްޑިވްސް އިންޓަގްރޭޓެޑް ޓޫރިޒަމް ޑިވެޕޮލްމެންޓް ކޯޕަރޭޝަން (އެމްއައިޓީޑީސީ) އެކައުންޓަށް ޖަމާކޮށްފައިވާކަމަށް އެ ކޯފަރޭޝަންގެ މެނޭޖިންގް ޑިރެކްޓާރ މުހައްމަދު ރާއިދު ވިދާޅުވެއްޖެއެވެ.
ރާއިދް މިހެން ވިދާޅުވެފައިވަނީ ބުދަ ދުވަހުގެ ސްޓޭޓް އޯންޑް އެންޓަޕްރައިޒެސް ކޮމިޓީގައި މެމްބަރުން ކުރިމަތި ކުރިވި ސުވާލު ތަކަށް ޖަވާބުދެއްވަމުންނެވެ.
"އެފައިސާ އޭރު ޓުއަރިޒަމް މިނިސްޓްރީއިން ޚަރަދު ކުރެވެން ނެތީތީ އެމީހުންގެ ނަމުގައި ފްރެންޑްލީ ކޮމްޕެނީސްތަކެއް އެބަހުރޭ. އޭގެތެރޭގައި އޮންނަ ފްރެންޑްލީ ކުންފުންޏެއް އެމްއައިޓީޑީސީ އަކީ. އެހެންވީމަ އެމްއައިޓީޑީސީގެ ބަޖެޓެއްވެސް ނޫން، އަދި އެމްއައިޓީޑީސީއިން ނަގާފަ ހުރި ލާރިއެއްވެސް ނޫން. ރިސޯޓުތަކުން ސީއެސްއާރުގެ ނަމުގައި ޓުއަރިޒަމް މިނިސްޓްރީއަށް ލާރި ނަގާފައި އެލާރި މި ވައްދަނީ އެމްއައިޓީޑީސީގެ އެކައުންޓަށް"އެމްއައިޓީޑީސީގެ މެނޭޖިންގް ޑިރެކްޓާރ މުހައްމަދު ރާއިދު
ރާއިދު ވިދާޅުވީ މި މުއާމަލާތަކީ މަނީ ލޯންޑްރިންގް ގެ އަމަލެއް ގޮތުގައި ދެކިވަޑައިގަންނަވާކަމަށެވެ.
ކުރީގެ ރައީސް ޔާމީންގެ ސަރުކާރުގައި އެމްއައިޓީޑީސީ ގެ މެންޑޭޓުން ބޭރު އެތައް ކަމެއް ކޮށްފައިވާ ކަމަށް ފާހަގަ ކުރައްވަމުން ރާއިދު ވިދާޅުވީ ރިސޯޓުތަކުގެ ފައިސާތައް އެމްއައިޓީޑީސީ ގެ އެކައުންޓަށް ޖަމާވެފައިވާ ކަން ކަށަވަރު ވާކަމަށެވެ. އަދި ފައިސާ އެކައުންޓަށް ޖަމާވާއިރު ޓުއަރިޒްމް މިނިސްޓްރީގެ ސިޓީއެއްވެސް ލިބޭ ކަމަށާއި ފައިސާއިން ހަރަދު ކުރަން ވީ ގޮތް އެ ސިޓީގައި ބަޔާން ކޮށްފައި އޮންނަ ކަމަށްވެސް ވިދާޅުވިއެވެ.
ރާއިދު ވިދާޅުވީ ޖުމްލަ 2360441 މިލިއަން ޑޮލަރު 14 ރިސޯޓަކުން އެކި އަދަދު ތަކެއް ދައްކާފައިވާކަމަށެވެ. އަދި އެ ރިސޯޓުތަކުގެ ނަން ހާމަ ކުރުމަށް މެމްބަރުން އެދުމުން ފުރަތަމަ ފަސްޖެހިވަޑައިގެންނަމަވެސް ފަހުން ނަންތައް ވަނީ ހާމަ ކުރައްވާފައެވެ.
ނަންތަކާއި ދެއްކި ފައިސާ ގެ އަދަދު ހާމަ ކުރެއްވުމުގެ ކުރިން ރާއިދު ވިދާޅުވީ، އަތުގައި ހުރި ނަންތަކަކީ ރަށްތަކުގެ ނަންކަމަށާއި އެރަށްތައް މިހާރު ރިސޯޓުތަކަށް ބަދަލު ނުވާ ކަމެއް ސާފުނޫން ކަމަށެވެ.
ނ. ކުރެދިވަރު: 20000 ޑޮލަރު
ނ. ލޯފަރު: 1 މިލިއަން ޑޮލަރު
އިތާފުށި : 1 ލައްކަ ޑޮލަރު
ދިގު ރަށް: 70000 ޑޮލަރު
ހުރަވަޅި ބީޗް ރިސޯޓް: 10000 ޑޮލަރު
ފަސްމެންދޫ: 10000 ޑޮލަރު
މާރަންދޫ: 20000 ޑޮލަރު
މާގައު : 66000 ޑޮލަރު
އުތުރު މާފަރު : 10000 ޑޮލަރު
މިރިއަންދޫ : 10000 ޑޮލަރު
މާމުޓަ: 1 ލައްކަ ޑޮލަރު
އެނބޫދޫ : 1 ލައްކަ ޑޮލަރު
އޮޑަގައްލާ : 5 ލައްކަ
ނަސަންދުރަ ޕެލެސް ހޮޓެލް: 20000 ޑޮލަރު
މި މައްސަލައާއި ގުޅިގެން ވާހަކަ ދައްކަވަމުން ރާއިދު ވިދާޅުވީ މި މައްސަލައާއި ގުޅޭ ސިޓީއެއް އޮޑިޓާރ ޖެނެރަލްގެ އޮފީހަށް ފޮނުވާފައިވާނެ ކަމަށެވެ.
