މިސްރުގައި މިހާރު ކުރިޔަށްދާ އެފްރިކަން ކަޕް އޮފް ނޭޝަންސްގެ ތިންވަނަ ނައިޖީރިޔާ ހޯދައިފިއެވެ.
ނައިޖީރިޔާ އަދި ޓިޔުނީސިޔާ ބައްދަލުކުރާ މެޗް ނައިޖީރިޔާއިން ކާމިޔާބު ކުރީ 1-0 ކުންނެވެ.
މެޗުފެށިގެން ދެ ޓީމުގެ ފަރާތުން ފެނިގެން ގޮސްފައިވަނީ ހަމަހަމަ ކުޅުމެކެވެ. މެޗުގެ ތިންވަނަ މިނެޓުގައި ނައިޖީރިޔާގެ އޮޑިއޮން ވަނީ ލަނޑުޖަހާ ލީޑު ނަގައިފައެވެ.
މިލަނޑާއެކު ޓިޔުނީޝިޔާއިން ވަނީ އެޓީމުގެ ކުޅުން ރަނގަޅު ކޮށްފައެވެ. އެގޮތުން ގާތް ގާތުގައި ޓިއުނީޝިޔާއިން ވަނީ ނައިޖީރިޔާގެ ގޯލާ އަމާޒުކޮށް ގިނަ ހަމަލާތަކެއް އުފައްދައިފައެވެ. ނަމަވެސް ނައިޖީރިޔާގެ ގޯލު ފޫއަޅުވާލެވޭ ގޮތް ވެފައެއްނުވެއެވެ.
މެޗުގެ ދެވަނަ ހާފުގައި ޓިޔުނީޝިޔާގެ ބަޑްރީއަށް ވަނީ ރަނުގެ ފުރުސަތެއްލިބި ބޭކާރުވެފައެވެ. އޭނާ ފޮނުވާލިހަމަލާގެ ހުރަހަކަށްވީ ނައިޖީރިޔާގެ ކީޕަރެވެ.
މި މެޗުގައި ނައިޖީރިޔާގެ ކީޕަރުގެ ފަރާތުން މޮޅު ކުޅުމެއް ފެނިގެން ގޮސްފައި ވެއެވެ.
މީގެ ކުރިން ތިންފަހަރު އެފްރިކާގެ ޗެމްޕިއަންކަން ހޯދައިފައިވާ ނައިޖީރިޔާ، މި މުބާރާތުގެ ތިންވަނަ ހޯދި މިއީ އަށްވަނަ ފަހަރެވެ.
މި މުބާރާތުގެ ފައިނަލުގައި ހުކުރު ދުވަހު ބައްދަލުކުރާނީ ސެނެގާލް އަދި އަލްޖީރިޔާއެވެ.
