ރައްޔިތުންގެ މަޖިލީހުގެ ބާރުތައް ކަނޑުވާލުމަށް ސަރުކާރުތަކުން މަސައްކަތްކުރިކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު، އެފަދައިން ވިދާޅުވީ، މަޖިލިސް މެމްބަރުންނަށް ބުރާސްފަތި ދުވަހު ބޭއްވުނު ވޯކްޝޮޕް ގައި ވާހަކަފުޅު ދައްކަވަމުންނެވެ.
ރައީސް ނަޝީދު ވިދާޅުވީ، ގާނޫނު ހަދާ މަޖިލީހުގެ މައްޗަށް މަތިވެފައިވާ ޒިންމާ އަދާ ކުރުމަށާއި ކަންކަމުގައި އަޑުއުފުލުމަށް އަބަދުވެސް ދަތިތަކެއް ކުރިމަތިވާކަމަށެވެ. ނަމަވެސް ފާއިތުވި 15 އަހަރުތެރޭގައި މަޖީލީހުން ވަރަށްބޮޑެތި ކުރިއެރުންތަކާއި ކާމުޔާބީތައް ހޯދާފައިވާކަމަށްވެސް ވިދާޅުވިއެވެ.
މެމްބަރުންގެ ޒިންމާއާއި ގުޅެގޮތުން ވާހަކަދައްކަވަމުން ރައީސް ނަޝީދު ވިދާޅުވީ ދައުލަތުގެ ކަންކަން ހިންގާ ގޮތް ބަަލާ، ސަރުކާރު ޒިންމާދާރު ކުރުވުމަކީ މެމްބަރުންގެ ޒިންމާއެއް ކަމަށެވެ. އަދި އެ ޒިންމާގެ މަތިން އަބަދުވެސް ހަނދާންކުރުމަށް މެމްބަރުންނަށް ރައީސް ނަޝީދު އިލްތިމާސްކުރެއްވި އެވެ.
މަޖިލީހުގެ ބޮޑު އަގުލަބިއްޔަތެއް ނިސްބަތްވަނީ އެމްޑީޕީއަށްކަން ފާހަގަކުރައްވާ ރައީސް ނަޝީދު ވިދާޅުވީ ސަރުކާރު ހިންގާ މައި ޕާޓީ އެމްޑީޕީގެ މެމްބަރުން ތިއްބެވީ ރައީސުލްޖުމްހޫރިއްޔާ އިބްރާހިމް މުހައްމަދް ސޯލިހްގެ ރިޔާސީ ވައުދުފުޅުތައް ފުރިހަމަ ކޮށްދެވުމަށް ކަމަށެވެ.
ވެސްޓް މިނިސްޓާރ ފައުންޑޭޝަން އާއި ގުޅިގެން ހިންގޭ ވާރކްޝޮޕް ކުރިއަށް ގެންދެވެނީ ދެ ދަންފަޅިއަކަށް ބަހާލައިގެންނެވެ. ހޮޓެލް ޖެންގައި ކުރިއަށް ގެންދާ ސެޝަންތަކުގައި މެމްބަރުންގެ މައްސޫލިއްޔަތުތައް އަދާ ކުރުން ހަރުދަނާ ކުރާނެ ގޮތްތަކާއި ބެހޭގޮތުން މައުލޫމާތު ދެވޭނެއެވެ.
