ގަން އިންޓަނޭޝަނަލް އެއާޕޯޓް ހިންގަމުން ދަނީ ގެއްލުމުގައި!

ރާއްޖޭގެ ދެކުނުގެ އެންމެ ބޮޑު އެއް އެއާޕޯޓް، ގަން އިންޓަނޭޝަނަލް އެއާޕޯޓް ހިންގަމުން ދަނީ ގެއްލުމުގައި ކަމަށް އައްޑޫ އިންޓަނޭޝަނަލް އެއާޕޯޓްގެ މެނޭޖްމެންޓުން ބުނެފިއެވެ.

ގަން އިންޓަނޭޝަނަލް އެއާޕޯޓް އެކަށީގެންވާ ވަރަށް ނުހިނގާ ސަބަބު ބެލުމަށް ބުދަ ދުވަހު ބޭއްވި ރައްޔިތުންގެ މަޖިލީހުގެ ސްޓޭޓް އޯން އެންޓަޕްރައިޒަސް (އެސްއޯއީ) ކޮމިޓީ އަށް އައްޑޫ އެއާޕޯޓުގެ ބޯޑު މެމްބަރުން ވަނީ ހާޒިރުކޮށްފައެވެ. އެ ކޮމިޓީގައި މެމްބަރުން ވަނީ އެ ބޭފުޅުންނާއި ގިނަ ސުވާލުތަކެއް ކުރިމަތިކުރައްވާފައެވެ.

Advertisement

ކޮމިޓީގައި ވާހަކަ ދައްކަވަމުން އޭއައިއޭގެ އެކްޓިން މެނޭޖިން ޑިރެކްޓަރ ރިމްނާ ހަސަން ވިދާޅުވީ، 2019 ވަނަ އަހަރުން ފެށިގެން ގަން އެއާޕޯޓް ކޮމްޕެނީ ލިމިޓެޑްގެ ނަމަށް ބަދަލުވެ އެމްވީކޭ އިން އެއާޕޯޓާ ހަވާލުވުމަށްފަހު ސަރުކާރުން ހަމައެކަނި އަޅައި ދިނީ ރަންވޭ އެއް ކަމަށެވެ. 2011 ވަނަ އަހަރާ ހަމަޔަށް މުވައްޒަފުންނަށް މުސާރަ ދެމުން ދިޔައީ ސަރުކާރުންނެވެ. ރިމާ ވިދާޅުވީ، އޭގެ ފަހުން ކުންފުނިން މުވައްޒަފުންނަށް މުސާރާދެމުން ދިޔައީ ގެއްލުމުގައި ކަމަށެވެ.

އެއާޕޯޓް ތަރައްގީ ކުރުމަށް ތިން ފޭސްއަކަށް ބަހާލައިގެން ކުރިޔަށް ގެންދިޔަ ފުރަތަމަ ދެ ފޭސްގައި 37.6 މިލިއަން ރުފިޔާ ހަރަދުކޮށްފައިވާއިރު ކުންފުންޏަށް އިތުރު އެއްވެސް އާމްދަނީއެއް ނުލިބޭ ކަމަށް ރިމްނާ ވިދާޅުވިއެވެ. ރިމްނާ ވިދާޅުވި ގޮތުގައި އާމްދަނީ ލިބިފައިވަނީ އޮޕަރޭޝަންސް އިން އެކަނިއެވެ.

އެހާ ހިސާބަށް ކުންފުނީގެ ހާލަތު ގޮސްފައި އޮތުމުން ކުންފުނިން 24 މިލިއަން ޑޮލަރުގެ ލޯނެއް ބީއެމްއެލް އިން ނަގައި، 2018 ވަނަ އަހަރުން ފެށިގެން ލޯނު ދައްކަމުން އަންނަނީ ސަރުކާރުންނާއި ކުންފުނީގެ އެއް ހިއްސާދާރު ކަމަށްވާ ކާސް ހޯލްޑީންގ އިންނެވެ.

އޭއައިއޭ އިން އެސްޓީއޯ އަށް މިހާރު 200 މިލިއަން ރުފިޔާ ދައްކަން ޖޭހެ ކަމަށް އޭނާ ވިދާޅުވިއެވެ.

ރިމްނާގެ ވާހަކަ އަށް އިތުރަށް ބާރުދެއްވަމުން ކާސާ ހޯލްޑިންގެ އެއް ހިއްސާދާރު ކަމަށްވާ އިބްރާހިމް ނޫރައްދީން ވިދާޅުވީ، ކުންފުނީގެ މާލީ ހާލަތު ދަށްވެގެން ދިޔައި މައިގަނޑު އެއް ސަބަބަބަކީ ކުރިން އެއާޕޯޓް ދަށުން ގަމުގައި ހިންގަމުން ގެންދިޔަ އިކުއޭޓާ ވިލެޖުން ލިބެން ޖެހޭ ފައިސާ ނުލިބުމުން ކަމަށެވެ.

ނޫރައްދީން ވިދާޅުވީ، އެއާޕޯޓް އޮތީ 1984 ވަނަ އަހަރު އޮސްޓްރޭލިއަން އެއިޑްގެ ދަށުން އެތަން އަޕްގްރޭޑް ކުރި ގޮތަށް ކަމަށާއި، ޓަވަރުވެސް އެހެރީ އޭރު ހެދި ހާލަތުގައި ކަމަށާއި އެ އެއާޕޯޓް ބޭނުންކުރުމަކީ ބޮޑު ''ރިސްކެއް'' ކަމަށް ނޫރައްދީން ވިދާޅުވިއެވެ. އޭނާ ވިދާޅުވީ، މިހާތަނަށް އެ އެއާޕޯޓް ތަރައްގީ ކުރުމަށް އެއްވެސް ބަޔަކު މަސައްކަތް ކޮށްފައިނުވާ ކަމަށެވެ.