އިމާރާތަކުން ދަނގަޑެއް ވެއްޓި މީހެއްގެ ބޯފަޅައިގެން ހިނގައްޖެ
ހާދިސާ ހިނގީ އަންގާރަ ދުވަހުގެރޭ
ހަދަމުންދާ އިމާރާތެއްގައި ބިދޭސީންތަކެއް ހަރަކާތްތެރިވަނީ | ޓްވިޓަރ
މާލެގައި ހަދަމުން ދިޔަ އިމާރާތަކުން ދަނގަޑެއް ވެއްޓި މީހަކުގެ ބޯފަޅައިގެން ހިނގައްޖެއެވެ. އެ ހާދިސާ ހިނގާފައިވަނީ އަންގާރަ ދުވަހުގެރެއެވެ.
ފުލުހުން ބުނީ، ހެންވޭރުގައި އިމާރާތް ކުރަމުން ދިޔަ ސައިޓެއްގެ ސޭފްޓީއަށް ޖަހާފައި ހުރި ދަނގަޑެއް ވަޔަށް ވެއްޓި އެ ވަގުތު އެ މަގުގެ ނުބައި ލޭނުން ދަތުރުކުރި ސައިކަލެއްގެ ފަހަތުގައި އިން މީހެއްގެ ބޮލުގައި ޖެހި ބޯފަޅައިގެން ގޮސްފައިވާ ކަމަށެވެ.
އަނިޔާ ލިބުނު މީހާއަށް އައިޖީއެމްއެޗް ގައި ފަރުވާދެމުންދާ ކަމަށާއި، އެ ހާދިސާއާ ގުޅިގެން އިތުރަށް ބަލަން ޖެހޭ ކަންތައްތައް ފުލުހުން ދަނީ ބަލަމުންނެވެ.
މާލެގައި މިފަހަކަށް އައިސް އިމާރާތްތަކުން އެއްޗެހި ވެއްޓޭ ހާދިސާތައް ވަނީ ގިނަވެފައެވެ. މިދިޔަ ހަފްތާގެ ބުރާސްފަތި ދުވަހު ހުޅުމާލޭގައި ހަދަމުންދިޔަ އިމާރާތުން ޖަމްބޯ ބޭގެއް ވެއްޓި މީހަކު ވަނީ މަރުވެފައެވެ. އެފަދަ ހާދިސާތައް އިތުރުވާތީ ހަދަމުންދާ އިމާރާތްތަތަކުގައި ސަލާމަތީ ގޮތުން އަޅަންޖެހޭ ހުރިހާ ފިޔަވަޅުތައް އެޅުމަށް ކަމާއި ބެހޭ އިދާރާތަކުން ދަނީ ތަކުރާރުކޮށް އަންގަމުންނެވެ.
