ތަމްރީން ދަތުރެއްގައި ޓީސީ ސައުދީއަށް ފުރައިފި
14 ޖުލައި 2019 | އާދީއްތަ 08:08ތަމްރީން ދަތުރަށްފަހު ޓީސީ އެނބުރި ރާއްޖެ އަންނާނީ މި މަހު 25 ގައި
ޓީސީ ސްޕޯޓްސް ކްލަބް
ތަމްރީން ދަތުރެއްގައި ބައިވެރިވުމަށް ޓީސީ ސްޕޯޓްސް ކްލަބް ސައުދީ އަރަބިޔާއަށް ފުރައިފިއެވެ.
އާދީއްތަ ދުވަހު ޓީސީ ސައުދީއަށް ފުރާފައިވާއިރު، އެޓީމު އެނބުރި ރާއްޖެ އައުމަށް ހަމަޖެހިފައިވަނީ މި މަހުގެ 25 ވަނަ ދުވަހެވެ.
އެފްއޭއެމުން ޓީސީއަށް ތަނަވަސްކޮށްދިން މި ފުރުސަތަކީ މިދިޔަ އަހަރު އޭއެފްސީ ކަޕުން އެޓީމަށް ޖާގަ ލިބި މުބާރާތް ކުޅުމުގެ ފުރުސަތު ގެއްލުމުން، އޭގެ ބަދަލެއްގެ ގޮތުންނެވެ.
މައުލޫމާތު ލިބޭގޮތުގައި ޓީސީ ސައުދީއަށް ކުރާ މި ތަމްރީން ދަތުރުގައި ރަހުމަތްތެރިކަމުގެ މެޗުތަކެއް ވެސް ކުޅުމަށް ވަނީ ހަމަޖެހިފައެވެ. މި ދަތުރުގައި ޓީސީގައި ހިމެނޭ ގައުމީ ޓީމު ކުޅުންތެރިން ބައިވެރިނުވާނެއެވެ.
ޓީސީގެ އިތުރުން މާޒިޔާއަށް ވެސް ވަނީ ސައުދީގައި ތަމްރީން ހެދުމުގެ ފުރުސަތު ލިބިފައެވެ. އެގޮތުން އެޓީމުން ވަނީ މިދިޔަ މަހު ސައުދީގައި ތަމްރީން ދަތުރެއް ފުރިހަމަ ކޮށްފައެވެ.
މި ސީޒަނުގައި ކުޅުނު ފުރަތަމަ މުބާރާތް ކަމަށްވާ ޗެރިޓީ ޝިލްޑް ށ. ފޯކައިދޫއާ ވާދަކޮށް ކާމިޔާބު ކޮށްފައިވާ ޓީސީން ވަނީ ދިވެހި ޕްރިމިއާ ލީގުގައި މިހާތަނަށް ފަސް މެޗު ކުޅެފައެވެ.
އެގޮތުން ލީގުގައި ޓީސީ ކުޅުނު ފަސް މެޗުގެ ތެރެއިން ދެ މެޗު ކާމިޔާބު ކޮށްފައިވާއިރު، އެއް މެޗުން ވަނީ ބަލިވެފައެވެ. އަދި އަނެއް ދެ މެޗު އެއްވަރުވެގެން ނިމުނުއިރު، އެޓީމު އޮތީ ތިންވަނައިގައެވެ.
