މަތީ ތައުލީމް ލޯން ލިބުނު ފަރާތްތަށް ދެ ހަފްތާތެރޭ އިއުލާން ކުރާނެކަމަށް ހަޔާރ އެޑިއުކޭޝަން މިނިސްޓްރީން ބުނެފި އެވެ.

ރާއްޖެ.އެމްވީއަށް މައުލޫމާތުދެއްވަމުން ޑެޕިއުޓީ މިނިސްޓާރ އައިޝަތު ޝަފީނާ ވިދާޅުވީ ލޯނަށް ދެވަނަ ފަހަރަށް ކުރިމަތިލުމަށް ފުރުސަތު ހުޅުވާލުމުން 960 ފަރާތަކުން ލޯނަށް ކުރިމަތި ލާފައިވާކަމަށެވެ. 960 ފަރާތުގެ ތެރެއިން ލޯނު ދޫކުރުމަށް ހަމަޖެހިފައިވަނީ 163 ޖާގަ އަށެވެ.

ޝިފާނާ ވިދާޅުވީ، 21 ޖޫންގެ ކުރިން ފޯމު ހުށަހަޅާފައިވާ ފަރާތްތަކުގެ ފޯމްގައި ރަނގަޅު ކުރަންޖެހޭކަމެއް ވާނަމަ ފޯމް ހުށަހަޅާފައިވާ ތާރީޚުން ފެށިގެން ތިން ދުވަސް ތެރޭގައި ރަނގަޅުކޮށް، 24 ޖޫންގެ ކުރިން އެޕްލިކޭޝަން ފުރިހަމަ ކުރަން އެންގިފައިވާނެ ކަމަށެވެ.

ލޯނަށް ކުރިމަތިލުމުގެ ދެވަނަ ފުރުސަތަށް ހުޅުވާލެވުނީ ޖޫން މަހުގެ 11 ވަނަ ދުވަހުއެވެ. ލޯނަށް ކުރިމަތި ލުމުގެ މުއްދަތު ހަމަވެފައިވަނީ ޖޫން މަހުގެ 24 ގައެވެ.

ލޯނަށް ކުރިމަތި ލުމަށް ދެވަނަ ފުރުސަތެއް ހުޅުވާލެވުނީ ފުރަތަމަ ފަހަރު ގިނަ ދަރިވަރުން އާންމުކުރެވުނު އުސޫލާ ހިލާފަށް އެޕްލިކޭޝަން ހުށަހެޅިފައި ވާތީ ގިނަ ފަރާތްތަކެއް ޑިސްކޮލިފައިވެފައިވުމުން އަލުން އެކުދިންނަށް ފުރުސަތު ދިނުމުގެ ބޭނުމުގައެވެ. ލޯނަށް ކުރިމަތިލުމަށް ފުރަތަމަ ފަހަރު ހުޅުވާލެވުނީ 21 މާރޗުގައެވެ.