ދީދީ ފަނޑިޔާރު ކަމުން ވަކިކުރަން މަޖިލީހަށް ހުށައަޅަން ތަހްގީގު ކޮމެޓީން ޖޭއެސްސީގައި އެދިއްޖެ
30 ދުވަސް ފަހުން ޖޭއެސްސީން ގޮތެއް ނިންމާނެ
ފަނޑިޔާރު އަބްދުﷲ ދީދީ
ސަސްޕެންޑް ކޮށްފައިވާ ސުޕްރީމް ކޯޓުގެ ފަނޑިޔާރު އަބްދުﷲ ދީދީ ފަނޑިޔާރު ކަމުން ވަކިކޮށްދިނުމަށް މަޖިލީހަށް ހުށައަޅައިދޭން ތަހުގީގު ކޮމިޓީން ޖުޑީޝަލް ސަރވިސް ކޮމިޝަން ( ޖޭއެސްސީ) ގައި އެދިއްޖެއެވެ.
ޖޭއެސްސީން ހޯމަ ދުވަހު ނެރެފައިވާ ބަޔާނެއްގައި ބުނީ، ދީދީގެ މައްސަލަ ތަހުގީގު ކުރާ ކޮމިޓީން ނިންމި ހުށައެޅި ރިޕޯޓުން ޖޭއެސްސީން ބަލައިގަތުމަށް ނިންމާފައިވާ ކަމަށެވެ. ތަހުގީގު ކޮމިޓީން ޖޭއެސްސީގައި އެދިފައިވަނީ ދީދީ މަގާމުން ވަކިކުރަން މަޖިލީހަށް ހުށައެޅުމަށެވެ.
ރާއްޖެ.އެމްވީ އަށް މައުލޫމާތު ދެމުން ޖޭއެސްސީގެ ޑިރެކްޓަރ ހަސަން ޒަހީން ވިދާޅުވީ، ދީދީ އަށް ޖަވާބުދާރިވުމަށް 30 ދުވަހުގެ މުއްދަތު ދީފައިވާ ކަމަށެވެ.
އެ މުއްދަތުގެ ތެރޭގައި އެ ކޮމިޝަނަށް ހާޒިރުވެ ނުވަތަ ލިޔުމުން އަމިއްލަ ދިފާއުގައި ދީދީ އަށް ޖަވާބުދާރިވާން ފުރުސަތު ލިބޭނެއެވެ. އޭގެ ފަހުން ޖޭއެސްސީން އެ މައްސަލައިގެ ގޮތެއް ނިންމާނެއެވެ.
ޖޭއެސްސީގެ ތަހުގީގު ކުރިޔަށް ދަނިކޮށް އަމިއްލަ ދަތުރުފުޅެެއްގައި ދީދީ މެލޭޝިޔާއަށް ޖޫން މަހުގެ 28 ވަނަ ދުވަހު ވަޑައިގަތެވެ.
ދީދީގެ މައްޗަށް ކުރެވޭ ތުހުމަތުގެ ތެރޭގައި އެމްއެމްޕީއާރްސީ ހިޔާނަތުގައި ހިމެނޭ މީހުންގެ އަތުން ފައިސާ ހޯއްދެވުމުގެ އިތުރުން މަގާމު ބޭނުން ކުރައްވައިގެން ނާޖާއިޒު މަންފާ ހޯއްދެވުން ވެސް ހިމެނެއެވެ. އެ ހުރިހާ ތުހުމަތުތަކަކަށް ދީދީ އިންކާރު ކުރައްވައެވެ.
