މުއާހަދާގެ ސަބަބުން ރައްޔިތުންގެ ހައްގުތަކެއް ނުގެއްލޭނެ: އޭޖީ
އެ ބިލް މަޖިލީހުން ފާސްކޮށްފައި 65 ވޯޓުން
އެޓާނީ ޖެނެރަލް އިބްރާހިމް ރިއްފަތު
ޖިނާއީ ތަހުގީގުތަކަށް އެއްބާރުލުމަށް އިންޑިއާ އެކު ވެފައިވާ އެއްބަސްވުމުގެ ދަށުން ރައްޔިތުންގެ ހައްގުތަކަށް ނުގެއްލޭނެ ކަމަށް އެޓާނިީ ޖެނެރަލް އޮފީހުން ބުނެފިއެވެ.
އޭޖީ އޮފީހުން ހޯމަ ދުވަހު ނެރެފައިވާ ބަޔާނެއްގައި ބުނީ، ދިވެހިރާއްޖެ އާއި އިންޑިއާ އާ ދެމެދު ސޮއިކުރެވޭ މުއާހަދާއަށް ޢަމަލުކުރެވޭނީ، ގާނޫނާއި ގަވާއިދުތަކުގެ ތެރެއިން ކަމަށެވެ. އަދި ޝަރީޢަތް ހިންގުމަށްފަހު ހުކުމް އިއްވުމަށްޓަކައި އެއް ގައުމުން އަނެއް ގައުމަށް މީހުން ބަދަލުކުރުމަކީ، އެ މުޢާހަދާގެ ސްކޯޕްގެ ތެރޭގައި ހިމެނޭ ކަމެއް ނޫން ކަމަށް ބަޔާނުގައި ބުނެފައިވެއެވެ.
ޖިނާއީ އެހީތެރިކަން ބަދަލުކުރުމުގެ އެފަދަ މުޢާހަދާތަކުގެ ސަބަބުން ދިވެހިރާއްޖޭގައި ހިންގާ ޖިނާއީ ތަހުގީގުތަކަށް އެހީތެރިކަން ލިބި އެ މަސައްކަތް ހަރުދަނާވާނެ ޖިނާއީ މައްސަލަތައް ހަލުވިކަމާއެކު ނިންމުމަށް އިތުރު ބާރެއް ލިބިގެންދާނެކަން އޭޖީ އޮފީހުން ވަނީ ފާހަގަކޮށްފައެވެ.
އޭގެއިތުުރުން މުއާހަދާގެ ދަށުން ޝަރީއަތެއްގައި ހެކި ބަސް ދިނުމަށްޓަކައި ދިވެހި ރައްޔިތެއް އެހެން ގައުމަކަށް ގެންދެވޭނީ، ގާނޫނުގައި ކަނޑައަޅާފައިވާ އިޖުރާއަތުގެ ތެރެއިން ކަމަށް އޭޖީން ބުންޏެވެ. އޭޖީ އޮފީހުން ބުނީ، އިންޑިއާގެ އިތުރުން، ސްރީލަންކާ، ޔުނައިޓެޑް އަރަބް އެމިރޭޓްސް އާއި ރަޝިޔާ ފަދަ ގައުމުތަކާއެކުވެސް އެފަދަ މުޢާހަދާ ތަކުގައި ސޮއިކުރުމަށްޓަކައި، އެ ގައުމުތަކުން ހުށަހަޅައިގެން އެ ގައުމުތަކާއެކު ދިވެހި ސަރުކާރުން މަޝްވަރާ ކުރަމުންދާ ކަމަށެވެ.
ޓްރިޓީގައި ބައިވެރިވާން ފެންނަ ކަމަށް ރައްޔިތުންގެ މަޖިލީހުން ފާސްކޮށްފައިވަނީ ހޯމަ ދުވަހުއެވެ. އެ ބިލް ފާސްކުރަން 65 މެމްބަރުުން ވަނީ ވޯޓް ދެއްވާފައެވެ. ނުފެންނަކަމަށް 11 މެމްބަރަކު ވަނީ ވޯޓުދެއްވާފަ އެވެ.
