މަސްދޯނި ފަހަރުގައި މަސް ފިނިކުރާ ނިޒާމް ގާއިމު ކުރުމަށް ލޯނަށް އެދުމުގެ މުއްދަތު އިތުރުކޮށްފި
ލޯނުން ޖުމްލަ ދޫކުރެވޭނީ ތިން މިލިޔަން އައްޑިހަ ހަތަރު ހާސް ރުފިޔާ
މަސް ދޯންޏަކުން މަސް ގެންދަނީ
މަސްދޯނިފަހަރުގައި ލޮނުފެނުން މަސްފިނިކުރާ ނިޒާމް ޤާޢިމް ކުރުމަށް ފިޝަރީޒް ޑިވޮލޮޕްމަންޓް ޕްރޮގްރާމްގެ ދަށުން ހުޅުވާލި ލޯނަށް އެދުމުގެ މުއްދަތު އިތުރުކޮށްފިއެވެ.
ހޯމަ ދުވަހު މިނިސްޓްރީ އޮފް ފިޝަރީޒް، މެރީން ރިސޯސަސް އެންޑް އެގްރިކަލްޗަރ އިން ކުރި އިއުލާނެއްގައި ބުނެފައި ވަނީ މަސްދޯނި ފަހަރުގައި ލޮނުފެނުން މަސްފިނިކުރާ ނިޒާމް ޤާޢިމު ކުރުމަށް "ކަނޑުފަޅު ނަފާ" ގެ ނަމުގައި ދޫކުރާ ލޯނަށް އެދުމުގެ ފުރުޞަތު 25 ޖޫން 2019 އަށް ހަމަވެފައިވުމާ ގުޅިގެން 1 ޖުލައި 2019 އިން ފެށިގެން 1 މަސް ދުވަހުގެ މުއްދަތަށް ލޯނަށް އެދުމުގެ ފުރުސަތު އިތުރުކޮށްފައިވާ ކަމަށެވެ.
އެގޮތުން 1 އޯގަސްޓް 2019 ގެ ނިޔަލަށް ލޯނަށް ހުށައެޅުމުގެ މުއްދަތު ހުޅުވާލާފައިވާއިރު، މިނިސްޓްރީން ބުނީ، އެ ލޯނުގެ މަޤްޞަދަކީ މިހާރު ރާއްޖޭގެ އެކި އަތޮޅުތަކުގައި ޤާއިމްކޮށްފައި ހުރި އައިސް ޕްލާންޓްތަކުން މަސްވެރިން ބޭނުންވާ ވަރަށް އައިސް ނުލިބޭތީ އާއި އައިސް ހޯދުމަށް ކުރަންޖެހޭ ހޭދަ ކުޑަކޮށް މަސްވެރިކަމުގައި ބޭނޭ މަސް ގިނަވަގުތު ތާޒާކަންމަތީ ދޯނީގައި ރައްކާކުރުމަށް މަގުފަހިކޮށްދިނުން ކަމަށެވެ. އަދި ކަނޑުމަތީގައި ގިނަ ވަގުތު ހޭދަކުރެވޭ ގޮތް މެދުވެރިކޮށް މަސްވެރިކަން އިތުރަށް ތަރައްޤީ ކުރުމަށް އެހީތެރިވެ މަގުފަހި ކޮށްދިނުން ކަމަށް މިނިސްޓްރީން ބުންޏެވެ.
ފިޝަރީޒް މިނިސްޓްރީން ކުރި އިއުލާންގައިވާ ގޮތުން ލޯނުން ޖުމްލަ ދޫކުރެވޭނީ ތިން މިލިޔަން އައްޑިހަ ހަތަރު ހާސް (3,084,000.00) ރުފިޔާއެވެ.
މިނިސްޓްރީން ބުނީ، ލޯނާ ބެހޭ އުޞޫލާއި ލޯނަށް އެދޭ ފޯމް ސަރުކާރު ރަސްމީ ގަޑީގައި މިނިސްޓްރީންނާއި، ސްމޯލް އެންޑް މީޑިއަމް އެންޓަރޕްރައިސަސް ޑިވެލޮޕްމަންޓް ފައިނޭންސް ކޯޕަރޭޝަން (އެސް.ޑީ.އެފް.ސީ) އިން އަދި އެސް.ޑީ.އެފް.ސީ ގެވެބްސައިޓުން ލިބެން ހުންނާނެ ކަމަށެވެ.
