ޝައިމްގެ މައްސަލައިގައި ޖެންޑަރ މިނިސްޓަރ، މިރޭ ކޮމިޓީއަށް ހާޒިރު ކުރަނީ
29 ޖޫން 2019 | ހޮނިހިރު 08:34ފުލުހުން ވަނީ ޝައިމް ހޯދުމަށް މިހާތަނަށް ތިން ގެއެއް ބަލާ ފާސްކޮށްފައި
ގެއްލިގެން ހޯދަމުން އަންނަ ކުޑަކުއްޖާ ޝައިމް އަބްދުﷲ | މޯލްޑިވްސް ޕޮލިސް ސާރވިސް
ދައުލަތުގެ ބެލުމުގެ ދަށުގައި ހުއްޓާ ގެއްލިގެން ހޯދަމުން އަންނަ ޝައިމް އަބްދުﷲ މައްސަލައިގައި މިނިސްޓްރީ އޮފް ޖެންޑަރ ފެމިލީ ސޯޝަލް ސާރވިސަސް ޝިދާތާ ޝަރީފް ރައްޔިތުންގެ މަޖިލިހުގެ ހިއުމަން ރައިޓްސް އެންޑް ޖެންޑަރ ކޮމިޓީއަށް ހާޒިރުކުރަން ނިންމައިފިއެވެ.
މި ބައްދަލުކުރެއްވުން އޮތީ ހޮނިހިރުދުވަހުގެ ރޭ އަށެއް ޖަހާއިރުއެވެ.
ކޮމިޓީގެ ބައްދަލުވުމުގައި ދައުލަތުގެ ބެލުމުގެ ދަށުގައި ހުއްޓާ ޝައިމް ގެއްލުނު މައްސަލަ އާއި ގުޅޭ ގޮތުން މިނިސްޓަރ އަރިހުން މައުލޫމާތު ސާފުކުރުމާއި، މި މައްސަލަ ކޮމިޓީން ދިރާސާ ކުރުން ހިމެނެއެވެ.
ޝައިމް ގެއްލިފައިވަނީ ވިލިނގިލީގައި ހުންނަ "އަމާން" ހިޔާގައި ޖެންޑަރ މިނިސްޓްރީގެ ބެލުމުގެ ދަށުގައި ހުއްޓައެވެ. އުމުރުން 14 އަހަރުގެ ޝައިމް ގެއްލިގެން ފުލުހުން އޭނާ ހޯދުމުގެ މަސައްކަތް ކުރަން ފަށާފައިވަނީ މިމަހުގެ 18 ވީ އަންގާރަ ދުވަހުއެވެ. އަދިވެސް އޭނާ ފެނިފައެއް ނުވެއެވެ.
ޝައިމް ގެއްލިގެން ހޯދަމުން އަންނަކަން މިނިސްޓްރީން ހާމަކޮށްފައިވަނީ، ސޯޝަލް މީޑިޔާގައި އެ ވާހަކަތައް ދައުރުވާން ފެށުމުންނެވެ.
ސޯޝަލް މީޑިޔާގައި އެ ވާހަކަތައް ދައުރުވާން ފެށުމުން ، މިނިސްޓްރީން ބުނެފައިވަނީ ޝައިމް ގެއްލިފައިވަނީ އޭނާއަކީ ކުށުގެ ވެށިން އައިސްފައިވާ ކުއްޖަކަށް ވާތީ، އެ މިނިސްޓްރީން ހަދަމުންދާ އެސެސްމެންޓެއް ހެދުމަށް ހިޔާގެ ބެލުމުގެ ދަށުގައި ވަގުތީ ގޮތުން ބަހައްޓާފައިވަނިކޮށް ކަމަށެވެ.
އަދި އޭނާ ހިޔާ އަށް ގެނެވުނީ އެތަނުގައި ދަފްތަރު ކުރަން ނޫން ކަމަށާ އެ ހިޔާގައި އޭނާ ބަހައްޓަފައި ހުރި ދުވަސްވަރުވެސް އެތަނުގެ ކުދިންނާ އޭނާ އެއްތަން ކޮށްފައި ނުވާނެ ކަމަށެވެ.
ފުލުހުން ވަނީ ޝައިމް ހޯދުމަށް މިހާތަނަށް ތިން ގެއެއް ބަލާ ފާސްކޮށްފައެވެ. އަދި ސީސީޓީވީ ފޫޓޭޖް ބަލައިގެންވެސް ކުއްޖާ ހޯދުމުގެ މަސައްކަތް ކުރަމުންދާ ކަމަށް ފުލުހުން ވަނީ ބުނެފައެވެ
