އިތުރު ދެހޮސްޕިޓަލަކުން ހިލޭ ކަކުލު ހުޅުގެ އޮޕަރޭޝަންތައް ކުރެވޭ ގޮތް އާސަންދައިން ހަމަޖައްސައިފި
28 ޖޫން 2019 | ހުކުރު 10:34އޮޕްރޭޝަން ޕެކޭޖުގެ އަގެއްގެ ގޮތުގައި ކަނޑައަޅާފައިވަނީ 65،000 ރުފިޔާ
އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގެ ތެރެއިން
އިތުރު ދެހޮސްޕިޓަލަށް ކަކުލުހުޅުގެ އޮޕަރޭޝަންތައް އާސަންދައިން ކަވަރު ކުރެވޭ ގޮތަށް އެއްބަސްވުމެއްގައި ސޮއިކޮށްފިއެވެ.
ޓްރީޓޮޕް ހޮސްޕިޓަލާއި މެޑިކާ ހޮސްޕިޓަލާއެކު އާސަންދައިން ވެފައިވާ މިއެއްބަސްވުމުގެ ދަށުން ކަކުލުހުޅު ބަދަލު ކުރުމަށް އާސަންދައިން ކަވަރު ކުރާނެއެވެ. މީގެ ކުރިން ކަކުލުހުޅު އޮޕަރޭޝަން ކުރުމަށް އާސަންދަ ޚިދުމަތް ލިބެނީ އައިޖީއެމްއެޗުން އެކަންޏެވެ. އާސަންދައާއެކު ހެދި އެއްބަސްވުމުގެ ދަށުން އޮޕްރޭޝަން ޕެކޭޖުގެ އަގެއްގެ ގޮތުގައި ކަނޑައަޅާފައިވަނީ 65،000 ރުފިޔާއެވެ.
އައިޖީއެމްއެޗްގައި ބޭއްވި ރަސްމިއްޔާތެއްގައި އެ ހޮސްޕިޓަލުގެ ފަރާތުން އާސަންދައާއެކު ސޮއި ކުރެއްވީ ހޮސްޕިޓަލުގެ ސީއީއޯ އިބްރާހިމް ސަލީމެވެ. އާސަންދައިގެ ފަރާތުން މެނޭޖިން ޑައިރެކްޓަރު މަރިޔަމް ޝަފީގެވެ. ޓްރީ ޓޮޕްގެ ފަރާތުން ސޮއިކުރެއްވީ ސީއީއޯ ޑޭވިޑް ފެއިންބާގެވެ. އަދި މެޑިކެއާއިން ސޮއިކުރެއްވީ އެ ހޮސްޕިޓަލް ހިންގާ ދަމާސް ކުންފުނީގެ މެނޭޖިން ޑިރެކްޓަރު އަހުމަދު ސޯލިހްއެވެ.
މީގެ އިތުރުން އައިޖީއެމްއެޗުން ބުނީ އެ ހޮސްޕިޓަލްގައި ހުޅާއި އުނަގަނޑު ބަދަލުކުރުމުގެ އޮޕަރޭޝަންތަކުގެ ވެއިޓް ލިސްޓުގައި މިހާރުވެސް 177 އަށްވުރެ ގިނަ މީހުން އެބަތިބި ކަމަށާއި، މިއެއްބަސްވުމުގެ ސަބަބުން މެޑިކާއާ ޓްރީޓޮޕުން އާސަންދައިން މިޚިދުމަތް ލިބޭނެ ކަމަށެވެ. އަދި މިއީ ރައްޔިތުންނަށް ލުއި ފަސޭހަކޮށްދީ ފަރުވާ އަވަސްކޮށްދިނުމުގެ ގޮތުން އެޅުނު ވަރަށް މުހިންމު ފިޔަވަޅެއް ކަމަށެވެ.
އޮޕަރޭޝަނާ ގުޅިގެން ދިމާވާ އިތުރު މައްސަލަތަކަށް ކުރަން ޖެހޭ ފަރުވާގެ ހަރަދު އާސަންދައިން ކަވަރުކޮށްދޭއިރު ޕްރައިވެޓް ރޫމްގެ ހަރަދު އާސަންދައިން ކަވަރެއް ނުކުރާނެ އެވެ.
