ޖުޑިޝަލް ސާރވިސް ކޮމިޝަން (ޖޭއެސްސީ) ގައި ކަންކަން ހިނގާ ނުހިނގާ ގޮތް ރައްޔިތުންގެ މަޖިލީހުން ވަރަށް ގާތުން ބަލާނެކަމަށް 19 ވަނަ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު އަދި އެމްޑީޕީގެ ޗެއަރޕާސަން ހަސަން ލަތީފް ވިދާޅުވެއްޖެ އެވެ.
ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން ހަސަން ލަތީފު ވިދާޅުވީ ޖޭއެސްސީ ފުރިހަމަ ގޮތުގައި ހިނގައި ގަންނަން ފެށީ މި ސަރުކާރު އައި ފަހުން ކަމަށާއި ކުރިން އެ ކޮމިޝަނުގެ ކަންކަން ހިނގަނީ ކިހިނެއްކަން ވެސް ނޭނގޭ ކަމަށެވެ. ފާއިތުވި ހުރިހާ ދުވަސްތަކެއްގައި ކޮމިޝަނުގައި ހިންގާފައި ހުރީ ބޮޑެތި ސިއްރުތަކެއް ކަމަށާއި ނަމަވެސް މިހާރު މަސައްކަތްތައް ހިނގާ ނުހިނގާ ގޮތް ރައްޔިތުންނަށް އަންގައި ދިނުމަށް މަސައްކަތްކުރާ ކަމަށް އޭނާ ވިދާޅުވި އެވެ. އެއީ ޖޭއެސްސީގެ މަސައްކަތަށް އައި ވަރަށް ހެޔޮ ބަދަލެއް ކަމަށް އޭނާ ވިދާޅުވި އެވެ.
ޖުޑިޝަލް ސަރވިސް ކޮމިޝަނުގެ ގާނޫނުންވެސް އަދި ގާނޫނު އަސާސީންވެސް އެކޮމިޝަނުގެ މައްޗައް ލާޒިމްކުރާ ކަމެއް އެއީ ފަނޑިޔާރުގެތައް ހިނގާ ނުހިނގާ ގޮތް ބެލުމަކީ. ދެން އަޅުގަނޑުމެން ރައްޔިތުންގެ މަޖިލީހުން ބަލާނަން ޖުޑިޝަލް ސަރވިސްގެ މަސައްކަތް ތަކާއި ކަންކަން ހިނގަމުންދާ ގޮތް. އަދި ރައްޔިތުންނަށް އެކަންކަން ސާފުކޮށް ދޭނަން. އެގޮތުން އެ ކޮމިޝަނުގެ ބޭފުޅުންނާ ސުވާލުވެސް ކުރާނަން. އަދި ހާޒިރު ކުރަންޖެހިއްޖެ ހާލަތެއްގައި ހާޒިރުވެސް ކުރާނަނަން. މިހާރުވެސް މަޖިލީހަށް ހާޒިރުކޮށްފިން އެކޮމިޝަން. ކުރިއަށް އޮތްތާވެސް އެކަން ހިނގާނީ އެގޮތަށް،"ހަސަން ލަތީފު
މަޖިލީހުގެ މަސައްކަތްތައް ކުރިއަށް ދާގޮތުގެ މައްޗަށް އަލިއަޅުވާލައްވައި ހަސަން ވިދާޅުވީ މިވަގުތު ރައްޔިތުންގެ މަޖިލީހެއް އޮވެ މަސައްކަތް ކުރަންޖެހޭ އެންމެ ބަރުމީނުގައި 19 ވަނަ މަޖިލީހުން މަސައްކަތްތައް ކުރަމުން އަންނަ ކަމަށެވެ. ކުރާ މަސައްކަތްތަކާއި މަސައްކަތުގެ ސްޕީޑްވެސް މާބޮޑަށްވެސް ރަނގަޅު ކަމަށް އޭނާ ވިދާޅުވިއެވެ. އެ މަސައްކަތްތައް ކުރިއަށް ދަނީ ރޭވިގެން ރަނގަޅު އިންތިޒާމެއްގެ ދަށުންކަން ފާހަގަ ކުރަށްވަމުން ހަސަން ވިދާޅުވި މަޖިލީހުގެ މަސައްކަތްތައް އެހާ ރަނގަޅަށް އެހާ ބާރުމިނުގައި ކުރިއަށް ދަނީ މަޖިލީހުގެ މުވައްޒަފުންގެ ބުރަ މަސައްކަތުން އަދި އެމުވައްޒަފުންގެ ގާބިލުކަމާއި ހީވާގި ކަމުން ކަމަށެވެ.
އެމްޑީޕީގެ މަސައްކަތްތަކާބެހޭ ގޮތުން ހަސަން ވިދާޅުވީ މީގެ އެމްޑީޕީއަކީ ވަރަށް ބޮޑަށް އިންތިޒާމްކުރެވިގެން ރޭވިގެން ކަންކަންކުރާ ޕާޓީއެއް ކަމަށާއި އެހެން ވުމުގެ ސަބަބުން އެ ޕާޓީގެ އޮނިގަނޑާއި އެޕާޓީގެ ގުނަވަންތައްވެސް ވަރުގަދަވެފައިވާ ކަމަށެވެ.
ހަގީގަތުގައި އެމްޑީޕީ ޕާޓީ އަކަށްވީ އެޕާޓީގެ މެންބަރުންގެ ބުރަ މަސައްކަތުން. އެމްޑީޕީއަކީ ވަރަށް ބުރަ މަސައްކަތްކުރާ މެންބަރުން އުޅޭ ޕާޓީއެއް. ކޮންމެ ދުވަހަކު ހެނދުނު ހޭލައިގެން އޮފީހަށް ދާނެ ބަޔަކު ތިބޭ. ހަރުގެތަކަކާއި އޮފީސް ވެސް ހުންނާތީ، އަދި އެތަންތަނުގައި ކުރާނެ މަސައްކަތްވެސް ހުރޭ. އެހެންވެ ވޭތިވެގެން މިދިޔަ ސާދަ އަހަރު ދުވަހުގެ ތެރޭގައި ދިވެހިރާއްޖޭގެ ގިނަ ރައްޔިތުން ބަލައިގަންނަ ޕާޓީއަކަށް އެމްޑީޕީ ވީ،"ހަސަން ލަތީފު
ހަސަން ވިދާޅުވީ މި ވަގުތު އެމްޑީޕީގެ އެންމެ މުހިންމު އެއް މަސައްކަތަކީ އެކުލަވާލި މެނިފެސްޓޯއާއި އަދި އެޖެންޑާ 19 ގައި ހުރި ކަންކަން ތަންފިޒުވާނެ ގޮތެއް ރައްޔިތުންގެ މަޖިލީހުގެ ތެރެއިން ހަމަޖެހިގެން ދިއުން ކަމަށެވެ.
