ސާބިއާއިން ރާއްޖޭގެ ވޮލީ ކުރިއެރުވުމަށް ގިނަ އެހީތަކެއް!
27 ޖޫން 2019 | ބުރާސްފަތި 04:38ސާބިއާގައި ވޮލީ ޓީމު ކޭމްޕްކުރަން ވަނީ ހަމަޖެހިފައި
މިނިސްޓަރ މަހްލޫފް (ކ) އަދި ސާބިއަން ވޮލީ ފެޑެރޭޝަންގެ ރައީސް (ވ)
ސާބިއާއިން ރާއްޖޭގެ ވޮލީ ކުރިއެރުވުމަށް ގިނަ އެހީތަކެއް ހަމަޖައްސައިދީފިއެވެ.
ޔޫތު މިނިސްޓަރ އަހުމަދު މަހްލޫފް ސާބިއާއަށް ކުރެއްވި ދަތުރުފުޅުގައި ރާއްޖޭގެ ވޮލީ ކުރިއެރުވުމަށް އެ ގައުމުން ވަނީ ގިނަ އެހީތަކެއްވެދޭން ނިންމައިފައެވެ.
އެގޮތުން އިންޑިއަން އޯޝަން އައިލޭންޑް ގޭމްސްގެ ކުރިން ގައުމީ ވޮލީ ޓީމު ސާބިއާގައި ކޭމްޕްކުރުމުގެ އިންތިޒާމު ހަމަޖެހުނުއިރު، މިއީ ރާއްޖޭގެ ވޮލީ ޓީމެއް ޔޫރަޕްގައި ކޭމްޕްކުރާ ފުރަތަމަ ފަހަރެވެ.
ސާބިއާގައި ވޮލީ ޓީމު ކޭމްޕް ކުރުމަށް ހަމަޖެހިފައިވަނީ އަންނަ ޖުލައި މަހުގެ ތިން ވަނަ ދުވަހުން ފެށިގެން 14 ވަނަ ދުވަހުގެ ނިޔަލަށެވެ. މިއީ ރާއްޖޭގެ ގައުމީ ޓީމެއް ޔޫރަޕްގައި ކޭމްޕްކުރާ ފުރަތަމަ ފަހަރަށް ވެގެންދާނެއެވެ.
މި ޓްރެއިނިން ކޭމްޕްގައި ގައުމީ ވޮލީ ޓީމަށް ޔޫރަޕްގެ މަތީފަންތީގެ ކޯޗުން އިރުޝާދު ދިނުމަށް ހަމަޖެހިފައިވާއިރު، ކުވައިތު އަދި ސާބިއާގެ ޓީމުތަކާ ދެކޮޅަށް ރަހުމަތްތެރިކަމުގެ މެޗުތަކެއް ކުޅުމަށް ވެސް ވަނީ ހަމަޖެހިފައެވެ.
މީގެއިތުރުން ސާބިއަން ވޮލީ ފެޑެރޭޝަނުން ވަނީ ރާއްޖޭގެ ހަތަރު ކޯޗެއް އެގައުމުގައި ތަމްރީން ހެދުމުގެ ފުރުސަތުވެސް ތަނަވަސްކޮށްދީފައެވެ. އަދި ރާއްޖޭގައި ވޮލީ ކުރިއެރުވޭނެ ގޮތް ބަލައި، ވޮލީގެ ހާލަތު ދެނެގަތުމަށް ސާބިއަން ވޮލީ ފެޑެރޭޝަނުން ޓީމެއް ރާއްޖެ އައުމަށް ވަނީ ހަމަޖެހިފައެވެ.
މުޅި ދުނިޔޭގައި ވެސް ވޮލީގައި އެންމެ މަތީފަންތީގައި ގުނާލެވޭ ސާބިއާގެ ދީލަތި އެހީތަކާއެކު ރާއްޖޭގެ ވޮލީ ޓީމަށް ގިނަ ކުރިއެރުންތަކެއް ލިބިގެންދާނެ ކަމަށް ބެލެވެއެވެ.
