އީޔޫ ގައި ރާއްޖެ ހަމަ މަގަށް އެޅުވުމަށް އަޑުއުފުލި ޒެކޮވްސްކީ އަށް ޝާހިދުގެ ޝުކުރު
ޒެކޮވްސްކީ ވަނީ 2018 ވަނަ ރާއްޖެއަށް ސިއްރު ދަތުރުފުޅެއް ކުރައްވާފައި
ފޮރިން މިނިސްޓަރު ޝަހީދު އީޔޫ ޕާލިމެންޓަރީ މެމްބަރު ޒެކޮވްސްކީ އާއި އެކު
ކުރީގެ ރައީސް ޔާމީންގެ ސަރުކާރުގެ ދުވަސްވަރު އިދިކޮޅު ފަރާތްތަކަށް ލިބެމުން ދިޔަ އަނިޔާތަކާއި ދެކޮޅަށް އީޔޫ ގައި އަޑު އުފުލައި، ރާއްޖެއަށް ޑިމޮކްރެސި ގެނައުމަށް ބާރުއެޅުއްވި އީޔޫ ޕާލިމެންޓު މެމްބަރު ތޯމަސް ޒެކޮވްސްކީ އަށް ފޮރިން މިނިސްޓަރު އަބްދުﷲ ޝާހިދު ޝުކުރު އަދާ ކުރައްވައިފިއެވެ.
ޒެކޮވްސްކީ ވަނީ 2018 ވަނަ އަހަރުގެ އޮގަސްޓު މަހު ރާއްޖެއަށް ސިއްރު ދަތުރުފުޅެއް ކުރައްވައި، އިދިކޮޅު ސިޔާސީ ފަރާތްތަކާ ބައްދަލު ކުރައްވާފައެވެ.
އެ ދަތުރުފުޅަށް ފަހު ޒެކޮވެސްކީ ވަނީ، ރައީސް ޔާމީންގެ އިތުރުން ރާއްޖޭގެ ބައެއް ސިޔާސީ ލީޑަރުންނާ ދެކޮޅަށް ދަތިކުރުމުގެ ފިޔަވަޅު އަޅައިދިނުމަށް އެދި ރިޒްލޫޝަންގެ ޔޫރަޕްގެ ޕާލިމެންޓަށް ހުށައަޅައިފައެވެ.
ޒެކޮވްސްކީއާ އެކު ބޭއްވި ބައްދަލުވުމުގައި ޝާހިދު ވަނީ އޭނާ ރާއްޖެއަށް ހަމަ މަގަށް އެޅުވުމަށް ދެއްވި އެއްބާރުލުމަށް ޝުކުރު އަދާކުރައްވައިފައެވެ. ވަކިން ހާއްސަކޮށް ނިމިގެން ދިޔަ '' ހުދުމުހުތާރު'' ވެރިކަމާއި ދެކޮޅަށް ކުރެއްވި މަސައްކަތްތަކަށް ވެސް ޝުކުރު އަދާ ކުރެއްވިއެވެ.
ޝާހިދު ބެލްޖިއަމަށް ކުރައްވާ ދަތުރުފުޅުގައި އީޔޫ ޕާލިމެންޓުގެ އިސްފަރާތްތަކާއި ބައްދަލު ކުރެއްވުމަށް ހަމަޖެހިފައިވާ ކަމަށް ފޮރިން މިނިސްޓްރީން ބުނެއެވެ.
ބައްދަލުކުރެއްވުންތަކުގައި މޫސުމީ ބަދަލުތަކާއި، ޓެރަރިޒަމާއި ދެކޮޅަށް ކުރެވޭ މަސައްކަތްތަކާއި، ޑިމޮކްރަސީ ވަރުގަދަކުރުމުގެ އިތުރުން ގަވަރނަންސް އަދި އިދާރާތައް ހަރުދަނާކުރުމުގެ މަޝްވަރާތައް ކުރައްވާނެއެވެ.
މި ދަތުރުފުޅުގައި މިނިސްޓަރ ޝާހިދުގެ އަރިހުގައި މިނިސްޓަރ އޮފް ސްޓޭޓް ފޮރ ފޮރިން އެފެއަރޒް އަހުމަދު ޚަލީލުއާއި، ދިވެހިރާއްޖެ އިން ސްރީލަންކާއަށް ކަނޑައަޅުއްވާފައި ހުންނަވާ ސަފީރު އުމަރު އަބްދުއްރައްޒާޤްގެ އިތުރުން، މިނިސްޓްރީ އޮފް ފޮރިން އެފެއަރޒްގެ ޑިރެކްޓަރ ޝިއުނީން ރަޝީދު އަދި ޑެސްކް އޮފިސަރ މަރިޔަމް އާސިފް ބައިވެރިވެވަޑައިގަންނަވައެވެ.
