ވެސްޓް އޭޕްރަންގެ ފުރަތަމަ ބައިގައި ފުލައިޓް ޓެސްޓްކޮށްފި

ވެލާނާ އިންޓަރނޭޝަނަލް އެއަރޕޯޓުގެ ހުޅަނގު ފަރާތުގައި ތަރައްޤީކުރާ ވެސްޓް އޭޕްރަންގެ ފުރަތަމަ ބައިގެ މަސައްކަތް ނިންމާ ފްލައިޓް އޮޕަރޭޝަން ޓެސްޓު ކޮށްފިއެވެ.

ފްލައިޓް އޮޕަރޭޝަން ޓެސްޓްކޮށްފައިވަނީ އޭޕްރަންގައި ޖޫން މަހުގެ 26 ވަނަ ދުވަހު ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފައި ވެއެވެ.

މީގެ އިތުރުން އެކުންފުނިން އައި.ސީ.އޭ.އޯ ސޭފްޓީ ރިކުއަރމެންޓްސްއަށް ފެތޭނެހެން އޭޕްރަންގެ ގްރައުންޑް ހޭންޑްލިން އިކުއިޕްމަންޓްތައް ވެސް ޓެސްޓް ކޮށްފައިވާއިރުޕޭވްމަންޓާއި ޓެކްސީލޭން ހިމެނޭހެން ފަރުމާ ކޮށްފައިވާ މި އޭޕްރަންގައި ކޯޑް-އީ މަރުކާގެ 5 އެއަރކްރާފްޓާއި، ކޯޑް-ސީ މަރުކާގެ 7 އެއަރކްރާފްޓް ހިމެނޭހެން ޖުމްލަ 12 އެއަރކްރާފްޓު ޕާކުކުރެވޭނެ ކަމަށް އެކުންފުނިން ބުނެފައިވެއެވެ

ވޭލާނާ އިންޓަރނޭޝަނަލް އެއަރޕޯޓުގެ ވެސްޓް އޭޕްރަން ބޮޑުކުރުމުގެ މަސައްކަތް އެމް.އޭ.ސީ.އެލުން ފަށާފައިވަނީ މިދިޔަ އަހަރުގެ ޖެނުއަރީމަހުގެ ތެރޭގައެވެ.

މި މަސައްކަތް ވެސް ކުރަމުންދަނީ އެއަރޕޯޓުގެ އައު ރަންވޭގެ މަސައްކަތް ކޮށްފައިވާ ޗައިނާގެ ބެއިޖިންގ އަރބަން ކޮންސްޓްރަކްޝަން ގްރޫޕް، ބީ.ޔޫ.ސީ.ޖީއިންނެވެ.

ވީ.އައި.އޭއަށް ދިމާވެފައިވާ ޖާގައިގެ ދަތިކަން ހައްލުކުރުމަށްޓަކާ އަލަށް ތަރައްޤީ ކުރާ ވެސްޓް އޭޕްރަންއަކީ 70 ހާސް އަކަމީޓަރުގެ ޖާގައިގެ އޭޕްރަނެކެވެ.