ޝައިމްގެ މައްސަލައިގަ ސަރުކާރުން އިހުމާލުވިތޯ ބަލަނީ
ޖެންޑަރ މިނިސްޓްރީގެ އިސްވެރިން މަޖިލީހަށް ހާޒިރުކުރަން ޖެހިއްޖެނަމަ އެކަންވެސް ކުރައްވާނެ
ގެއްލިގެން ހޯދަމުންދާ ޝައިމް
ދައުލަތުގެ ބެލުމުގެ ދަށުގައި ހުއްޓާ ގެއްލުނު ޝައިމް އަބްދުﷲގެ މައްސަލައިގަ އިޙުމާލުވެފައިވާ ވަނީ ކޮން ބައެއްތޯ ބެލުމުގެ ގޮތުން މަޖިލީހުގެ ހިއުމަން ރައިޓްސް ކޮމިޝަނުން، ޖެންޑާ މިނިސްޓްރީއަށް ސިޓީއެއް އަރުވަން ނިންމައިފިއެވެ.
އުމުރުން 14 އަހަރުގެ ޝައިމް ގެއްލުމުގައި، ސަރުކާރުގެ އިދާރާއެއްގެ އިހްމާލުވޭތޯ ސާފުކުރުމަށް ޖެންޑާ މިނިސްޓްރީ އާއި ފުލުހުންގެ އިތުރުން ކަމާ ގުޅުންހުރި އިދާރާތަކުން މައުލޫމާތު ހޯދުމަށް ކޮމެޓީން ވަނީ ފާސްކޮށްފައެވެ.
ފުވައްމުލަކު ދެކުނު ދާއިރާގެ މެންބަރު މުޙައްމަދު މުމްތާޒްއެވެ ހުށަހެޅި މި ހުށަހެޅުމަށް ވަނީ ކޮމިޓީގެ ހުރިހާ މެންބަރުންގެ ތާއީދު ލިބިފައެވެ.
ކޮމެޓީން ނިންމާފައިވަނީ، މި މައްސަލަ އާއި ގުޅިގެން ޖެންޑަރ މިނިސްޓްރީގެ އިސްވެރިން މަޖިލީހަށް ހާޒިރުކުރަން ޖެހިއްޖެނަމަ އެކަންވެސް ކުރައްވާށެވެ.
ޝައިމް ގެއްލިފައިވަނީ ވިލިނގިލީގައި ހުންނަ އަމާން ހިޔާގައި ޖެންޑާ މިނިސްޓްރީގެ ބެލުމުގެ ދަށުގައި ހުއްޓައެވެ. އަދި އޭނާ ގެއްލިގެން ހޯދާތާ ހަ ދުވަސް ވެފައިވާއިރު މީގެ ކުރިން ސަރުކާރުގެ އެއްވެސް އިދާރާއަކުން އެކުއްޖާ އަކީ ދައުލަތުގެ ބެލުމުގެ ދަށުގައި ހުއްޓާ ގެއްލުނު ކުއްޖެއްކަން ކުރިން ހާމަކޮށްފައެއް ނުވެއެވެ..
ޖއަމާން ހިޔާގައި ޝައިމް ބަލަހައްޓަމުންދިޔަކަން ހާމަކޮށްފައި ވަނީ އެ ކުއްޖާއަކީ ޖެންޑަރ މިނިސްޓްރީން ބަލަހައްޓަމުންދިޔަ ކުއްޖެއްކަމަށް ބުނެ ސޯޝަލް މީޑިއާގައި އެ ވާހަކަތައް ދައުރުވާން ފެށިފަހުންނެވެ.
ޝައިމް ގެއްލިފައިވަނީ އޭނާއަކީ ކުށުގެ ވެހިން އައިސްފައިވާ ކުއްޖަކަށް ވާތީ، އެ މިނިސްޓްރީން ހަދަމުންދާ އެސެސްމެންޓެއް ހެދުމަށް ހިޔާގެ ބެލުމުގެ ދަށުގައި ވަގުތީ ގޮތުން ބަހައްޓާފައިވަނިކޮށް ކަމަށް އެ މިނިސްޓްރީން ވިދާޅުވިއެވެ.
އަދި ޝައިމް އަމާން ހިޔާ އަށް ގެނެވުނީ އެތަނުގައި ދަފްތަރު ކުރަން ނޫން ކަމަށާ އެ ހިޔާގައި އޭނާ ބަހައްޓަފައި ހުރި ދުވަސްވަރުވެސް އެތަނުގެ ކުދިންނާ އޭނާ އެއްތަން ކޮށްފައި ނުވާނެ ކަމަށެވެ.
ޝައިމް ގެއްލިގެން ފުލުހުން އޭނާ ހޯދުމުގެ މަސައްކަތް ކުރަން ފަށާފައިވަނީ މިމަހުގެ 18 ވީ އަންގާރަ ދުވަހުއެވެ.
ފުލުހުން ވަނީ ޝައިމް ހޯދުމަށް ތިން ގެއެއް މިހާތަނަށް ބަލާ ފާސްކޮށްފައިވާކަމަށް ބުނެފައެވެ. އަދި ސީސީޓީވީ ފޫޓޭޖް ބަލައިގެންވެސް ކުއްޖާ ހޯދުމުގެ މަސައްކަތް ކުރަމުންދާކަމަށެވެ. .
