ފުޑް އެންޑް ހޮސްޕިޓާލިޓީ އޭޝިޔާ މޯލްޑިވްސް ފެއާ އަންނަ ޖުލައި މަހު!
20 ޖޫން 2019 | ބުރާސްފަތި 06:49ފުޑް އެންޑް ހޮސްޕިޓާލިޓީ އޭޝިޔާ މޯލްޑިވްސް ފެއާ ޖުލައި މަހު ބޭއްވުމަށް ހަމަޖެހުން
ކުރިން ބޭއްވި ފެއާގެ ތެރެއިން
ފަތުރުވެރިކަމުގެ ދާއިރާގެ އުފެއްދުންތަކާއި ޚިދުމަތްތައް އާއްމުންނަށް ދައްކާލުމުގެ ގޮތުން ކޮންމެ އަހަރަކު ވެސް ބާއްވަމުން އަންނަ ފުޑް އެންޑް ހޮސްޕިޓަލިޓީ އޭޝިއާ މޯލްޑިވްސް (އެފްއެޗްއޭއެމް) ޖުލައި މަހު ބޭއްވުމަށް ހަމަޖައްސައިފިއެވެ.
ދިވެހި ސާރވިސެސް އެކްސްޕޯ އާއި ސީޑީސީ އިން އިންތިޒާމްކުރާ ފެއާ ބާއްވަން ހަމަޖެހިފައި ވަނީ އަންނަ މަހު، ޖުލައި 15 އިން 17 އަށް ދަރުބާރު ގޭގައެވެ. ފުޑް އެންޑް ހޮސްޕިޓަލިޓީ އޭޝިއާ މޯލްޑިވްސް ފެއާގައި ދިވެހި އަދި ބޭރުގެ 50 ކުންފުންޏަކުން ބައިވެރިވާއިރު 110 ސްޓޯލް މިއަހަރު ފެނިގެން ދާނެއެވެ.
އެފްއެޗްއޭއެމް ފެއާއަކީ ރާއްޖޭގެ ޓުއަރިޒްމް މިނިސްޓްރީ އާއި މިނިސްޓްރީ އޮފް އިކޮނޮމިކް ޑިވެލޮޕްމެންޓްގެ އިތުރުން ޝެފް ގްރިލްޑް އޮފް މޯލްޑިވްސް އާއި ޝެފް ގްރިލްޑް އޮފް ސްރީލަންކާ އިން ގުޅިގެން ބާއްވަމުންގެންދާ ފެއާއެކެވެ.
ދިވެހި ސާރވިސެސް އެކްސްޕޯ އިން މައުލޫމާތު ދީފައިވާ ގޮތުގައި އެފްއެޗްއޭއެމް ފެއާގެ އެންމެ ބޮޑު ބޭނުމަކީ ފަތުރުވެރިކަމުގެ ސިނާއަތުގައި އުޅުއްވާ އެކި ފަރާތްތަކާއި ކުންފުނިތަކުގެ އެންމެ ފަހުގެ އުފެއްދުންތައް ދައްކާލާ އެ ފަރާތްތަކުގެ ހިދުމަތްތައް ކުރިއެރުވުމެވެ. މީގެ އިތުރުން މި ސިނާއަތުގައި މަސައްކަތް ކުރާ އެކި ފަރާތްތަކަށާއި މި ދާއިރާ އަށް ޝައުގުވެރިވާ ފަރާތްތަކަށް އެކި ފުރުސަތުތައް ހޯދަދިނުމަކީ މި ފެއާގެ މައިގަނޑު ބޭނުން ކަމަށެވެ.
އެގޮތުން ޓުއަރިޒަމް ދާއިރާގައި މަސައްކަތް ކުރާ، އަދި މަސައްކަތް ކުރަން ބޭނުންވާ ފަރާތްތަކަށް އަމާޒު ކޮށްގެން ރޭވިފައިވާ އެކި މުބާރާތްތައް ފެއާގެ ތެރެއިން ފެނިގެންދާނެއެވެ. އެ ގޮތުން ގިނަ ޝެފުންގެ މެދުގައި މަގުބޫލް، ކަލިނަރީ ޗެލެންޖް މި އަަހަރު ވެސް ބޭއްވުމަށް ވަނީ ހަމަޖެހިފައެވެ. މީގެ އިތުރުން ބަރިސްޓާ ޗެލެންޖާއި، މޮކްޓެއިލް ހެދުމުގެ މުބާރާތަކާއި ހައުސްކީޕިންގް މުބާރާތެއް ވެސް ބޭއްވުމަށް ހަމަޖެހިފައިވާ ކަމަށް ދިވެހި ސާރވިސެސް އެކްސްޕޯ އިން ބުނެއެވެ.
