ޖޭއެސްސީގެ ނިންމުމަށް ތާއީދުކޮށް، ޖުޑީޝަރީ ކޮމެޓީގެ ނިންމުން މަޖިލީހަށް ހުށަހަޅަން ފާސްކޮށްފި
އެގޮތަށް ފާސްކުރީ މިރޭ ބޭއްވި ޖުޑީޝަރީ ކޮމެޓީގެ ބައްދަލުވުމުގައި
ރައްޔިތުންގެ މަޖިލީހުގެ ޖުޑީޝަރީ ކޮމެޓީގެ ބައްދަލުވުމުގެ ތެރެއިން
ސުޕްރީމް ކޯޓުގެ ފަނޑިޔާރު އަބްދުﷲ ދީދީ ސަސްޕެންޑްކުރުމަށް ޖުޑީޝަލް ސާރވިސް ކޮމިޝަނުން ނިންމި ނިންމުމަށް ތާއީދު، ޖުޑީޝަރީ ކޮމެޓީގެ ރިޕޯޓު މަޖިލީހަށް ހުށަހެޅުމަށް ފާސްކޮށްފި އެވެ.
އެގޮތަށް ފާސްކުރީ މިރޭ ބޭއްވި ރައްޔިތުންގެ މަޖިލީހުގެ ޖުޑީޝަރީ ކޮމެޓީގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އަޤުލަބިއްޔަތުންނެވެ.
ކޮމެޓީން ނިންމި ނިންމުމުގައި ބުނެފައިވަނީ ސުޕްރީމް ކޯޓުގެ ފަނޑިޔާރު އަބްދުﷲ ދީދީ ސަސްޕެންޑްކުރުމަށް ޖޭއެސްސީން ނިންމި ނިންމުމަކީ، އެ ކޮމިޝަނަށް ލިބިފައިވާ ޤާނޫނީ ބާރުވެރިކަމުގެ ތެރެއިން ނިންމާފައިވާ ނިންމުމެއް ކަމަށެވެ. އަދި ޖޭއެސްސީގެ ބާރުގެ ތެރެއަށް ސުޕްރީމް ކޯޓުން ނުވަނުމަށް އެ ކޯޓަށް އިލްތިމާސްކުރުމަށްވެސް ފާސްކޮށްފައިވެއެވެ.
ހާޒިރުވެވަޑައިގަތް މެމްބަރުންގެ ތެރެއިން ވޯޓު ނުދެއްވާ ހަމައެކަނި މެމްބަރަކީ ކެންދޫ ދާއިރާގެ މެމްބަރު އަލީ ހުސައިން އެވެ. ވޯޓަށް އެހުމުގެ ކުރިން އެ ކޮމިޓީގައި ހިމެނިވަޑައިގަންނަވާ ގުރައިދޫ ދާއިރާގެ މެމްބަރު އިބްރާހިމް ރިޒާވަނީ ކޮމިޓީ ދޫކޮށް ވަޑައިގެންފައެވެ.
ސުޕްރީމް ކޯޓުގެ ފަނޑިޔާރު ދީދީ ސަސްޕެންޝަން ދެމިއޮންނާނެ ކަމަށް މި މަހުގެ 12 ވަނަ ދުވަހު ޖޭއެސްސީން ނިންމި ނިމްމުމަކީ ސައްހަ ނިންމުމެއް ކަމަށް ރައްޔިތުންގެ މަޖިލީހުން ކަނޑައަޅައި ދިނުމަށް ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ހުށައެޅި ހުށައެޅުއްވުމަށް ވާހަކަ ދައްކަވަމުން އަލީ ހުސައިން ވިދާޅުވީ، ކަމެއް ކޮމިޝަނުން ނިންމުމަށް ފަހުގައި އެކޮމިޝަނެއްގެ ނިންމުމަކީ ރަނގަޅު ނިންމުމެއްކަން ނުވަތަ ގާނޫނާ އެއްގޮތަށް ނިންމާފައިކަން ނުވަތަ ނޫންކަން ނިންމާނީ ކޯޓުތަކުން ކަމަށެވެ. އަދި އެކަމަށް ރައްޔިތުންގެ މަޖިލީހުން ގޮތެއް ކަނޑައެޅޭނެ ކަމާއި މެދެ ގަބޫލު ނުކުރައްވާ ކަމަށް ވިދާޅުވިއެވެ.
ހަސަން ލަތީފް ހުށަހަޅުއްވާފައިވާ ދެވަނަ ކަމަކީ، މިނިވަން މުއައްސަސާތަކާއި ދައުލަތުގެ އެއް ބާރުން އަނެއް ބާރު ގާނޫނުގެ ބޭރުން އެ ފޯރުވާ ނުފޫޒު ނުފޯރުވުމެވެ. ހަސަން ލަތީފްގެ ދެ ހުށައެޅުމަށް ފޮނަދޫ ދާއިރާގެ މެމްބަރު މޫސާ ސިރާޖު ވަނީ ތާއިދުކުރައްވާފަފައެވެ.
