ބީޓްބޮކްސާ އަކޫ ލަވަ ކިއުމާ ދިމާލަށް

މޯލްޑިވިއަން އައިޑަލްގެ ތިން ވަނަ ސީޒަންގައި ފެނިގެންދިޔަ ބީޓްބޮކްސް ކުރުމަށް ހުނަރުވެރި ފަންނާނު އަކްރަމް އަދީލް ސައީދު (އަކޫ) ލަވަ ކިއުމާ ދިމާލަށް އިތުރު ފިޔަވަޅެއް އަޅައި، އޭނާގެ ފުރަތަމަ ލަވަ ނެރެފިއެވެ.

އަކޫ އޭނާގެ ފުރަތަމަ އަލްބަމް ފުރިހަމަ ކޮށްފައިވަނީ އަލަށް އުފެދުނު ރިކޯޑް ލޭބްލް އެއް ކަމަށްވާ "އިއްޔަ ރިކޯޑްސް" ގެ ދަށުންނެވެ. "އަކޫ" ގެ ނަމުގައި އުފެއްދި އެ އަލްބަމްގައި ހަތަރު ލަވައެއް ހިމެނެއެވެ. އެއީ "ސޮރީ ހަނީ" އާއި "ހަނދާން ވޭ" ގެ އިތުރުން "ޕަރީ" އަދި "ރަންނަމާރި" އެވެ.

"ސޮރީ ހަނީ" ރިލީސް ކޮށްފައިވަނީ 15 ޖޫން 2019 ގައެވެ. މި ލަވައަކީ ވީޑިއޯ ލަވައަކަށްވެފައި، ލަވަ ޑައިރެކްޓްކޮށްފައިވަނީ މޯލަޑިވިއަން އައިޑަލްގެ ދެވަނަ ސީޒަނުން ވިދާލި ތަރި ހަމޫދު އަހުމަދެވެ.

މި ލަވައިގެ ވީޑިއޯ އިން ފެނިގެންދަނީ އަކޫގެ އިތުރުން ޓިކްޓޮކް އިން ނަން މަޝްހޫރު ވެފައިވާ ދެތަރިން ކަމުގައިވާ ނަތާޝާ ޖަލީލް އާއި މުހައްމަދު ޔާމިން އަލީ (ޔާމްބެ) އެވެ.

އަކޫގެ ފުރަތަމަ ލަވައިގެ ވީޑީއޯ ރިލީސް ކޮށްފައިވަނީ ފޭސްބުކް އަށެވެ. އަދި ލަވައިގެ އޯޑިއޯ ރިލީސް ކޮށްފައިވަނީ "ލަވަފޮށި" އެޕްލިކޭޝަނަށެވެ.

އޭނަ ބުނިގޮތުގައި މިފަދަ ފުރުސަތެއް ލިބުނީ ހަމޫދުގެ ސަބަބުންނެވެ.

ކުރިއަށް އޮތް ތާނގައި އަކޫގެ އިތުރު ލަވަ ތަކެއް އިއްޔަ ރިކޯޑްސްގެ ދަށުން ނުކުންނާނެ ކަމަށް އޭނާ ބުންޏެވެ. އަދި މިއީ ފެށުން ކަމަށާ މި ހިސާބުން ނުހުއްޓޭނެ ކަމަށް ވެސް އޭނާ ބުނެފައިވެއެވެ.