އީދު ބައިބަލާ 1440: ވީކޭ ބަލިކޮށް ކުޑަ ހެންވޭރުން ތަށި އުފުލާލައިފި
14 ޖޫން 2019 | ހުކުރު 10:10ފައިނަލް މެޗު ކުޑަ ހެންވޭރުން ކާމިޔާބުކުރީ ގަދަހިފުމަކަށް ގޮސްގެން
ކުޑަ ހެންވޭރުން ބައިބަލާގެ ތަށި އުފުލާލަނީ
ބައިބަލާ އެސޯސިއޭޝަނުން އިންތިޒާމުކޮށްގެން ބޭއްވި "އީދު ބައިބަލާ 1440" ގައި ވީކޭ ސްޕޯޓްސް ކްލަބް ބަލިކޮށް ކުޑަ ހެންވޭރު ޔުނައިޓެޑް ޗެމްޕިއަންކަން ހޯދައިފިއެވެ.
ބުރާސްފަތި ދުވަހުގެ ރޭ ކުޑަހެންވޭރު އަދި ވީކޭ ބައްދަލުކުރި ފައިނަލް މެޗުގެ ފުރަތަމަ ގޭމު ވީކޭއިން ކާމިޔާބުކުރިއިރު، ދެވަނަ ގޭމް ކުޑަ ހެންވޭރުން ވަނީ ކާމިޔާބުކޮށްފައެވެ.
އެގޮތުން ނަތީޖާ ނެރުމަށް ކުޅުނު ގަދަ ހިފުމުގައި ކުޑަހެންވޭރުން ވަނީ ވީކޭގެ މައްޗަށް ކުރިހޯދާފައެވެ. މެޗުގެ މޮޅު ކުޅުންތެރިޔަކަށް ހޮވުނީ ކުޑަ ހެންވޭރުގެ އަލީ ވިޖުދާންއެވެ.
މުބާރާތުގެ ފައިނަލަށް ވީކޭ ދަތުރުކުރީ ސެމީގައި ކްލަބް ޓީނޭޖާ ވާދަކޮށް ސީދާ ދެ ގޭމުން މެޗު ކާމިޔާބުކޮށްގެންނެވެ. ކުޑަހެންވޭރު ފައިނަލަށް ދަތުރުކުރީ ސެމީގައި ގަދަ ހިފުމަކަށްފަހު، ކްލަބް ގްރީން ސްޓްރީޓްސް ބަލިކޮށްގެންނެވެ.
މުބާރާތުގެ އެންމެ މޮޅު ފަސް ކުޅުންތެރިންނަށް ހޮވިފައިވަނީ ވީކޭގެ ހަމްދު އަލީ އަދި މިފްރާހް ޔާސިރު އާއި ގްރީންގެ ފަރަހް ޝާމް އަދި މުހައްމަދު މިރުސާލް ޔާސިރު އާއި ކުޑަ ހެންވޭރުގެ ވިޖުދާންއެވެ.
މުބާރާތުގެ އެންމެ މޮޅު ކޯޗަކަށް ކުޑަ ހެންވޭރުގެ ނާއްޓޭ ހޮވުނުއިރު، މިސްޓަ ބައިބަލާއަކަށް ހޮވުނީ ކުޑަ ހެންވޭރުގެ އަހުމަދު ފިރާޒް މޫސާއެވެ. މިސްޓަ ބައިބަލާ ފިރާޒްއަށް 10،000 ރުފިޔާގެ ފައިސާގެ އިނާމެއް ވަނީ ދީފައެވެ.
މުބާރާތުގެ ޗެމްޕިއަން ކުޑަ ހެންވޭރަށް އެއް ލައްކަ ރުފިޔާގެ ފައިސާގެ އިނާމެއް ލިބިފައިވާއިރު، ދެވަނައަށްދިޔަ ވީކޭއަށް 40،000 ރުފިޔާގެ ފައިސާގެ އިނާމެއް ވަނީ ދީފައެވެ. އަދި ފެއާ ޕްލޭ ޓީމު ވީކޭއަށް 15،000 ރުފިޔާގެ ފައިސާގެ އިނާމެއް ވަނީދ ދީފައެވެ.
