ރިޔާސީ ކޮމިޝަންތަކުގެ ބިލް މަޖިލީހަށް ހުށަހެޅުއްވީ އަލިފުށީ ދާއިރާގެ މެމްބަރު މުޙައްމަދު ރަޝީދު
ރިޔާސީ ކޮމިޝަންތަކުގެ ބިލަށް ތާއީދުކުރައްވާ ހުރިހާ މެމްބަރުން ވަނީ ވާހަކަ ދައްކަވާފައި
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަނާއި، ކޮރަޕްޝަނުގެ މައްސަލަތައް ބަލަން ރައީސް އިބްރާހިމް މުހައްމަދު ސޯލިހު އުފެއްދެވި ދެ ރިޔާސީ ކޮމިޝަނަށް ބާރުދޭ ބިލު ރައްޔިތުންގެ މަޖިލީހުން ބަލައިގެންފި އެވެ.
ރިޔާސީ ކޮމިޝަންތަކުގެ ބިލް މަޖިލީހަށް ހުށަހެޅުއްވީ އަލިފުށީ ދާއިރާގެ މެމްބަރު މުޙައްމަދު ރަޝީދު ހުސައިންއެވެ. މި ބިލް 18 ވަނަ މަޖިލީހަށް ވެސް ސަރުކާރުން ހުށަހެޅިއެވެ. 18 ވަނަ މަޖިލީހަށް ވެސް މި ބިލް ހުށަހެޅުއްވީ އަލިފުށީ ދާއިރާގެ މެމްބަރު މުޙައްމަދު ރަޝީދުއެވެ. ހަތަރު ފަހަރު މަޖިލީހުގެ ތަޅުމަށް ފޮނުވުމުން ވެސް،18 ވަނަ މަޖިލީހުން މި ބިލް ފާސްކޮށްފައެއް ނުވެއެވެ.
މި ބިލްގެ ބަހުސް ތިން ދުވަސް ވަންދެން ކުރިއަށް ގެންގޮސްފައިވާއިރު، ހުރިހާ މެމްބަރުން ވެސް ވަނީ ބިލަށް ތާއީދުކުރައްވާ ވާހަކަފުޅު ދައްކަވާފައެވެ.
ބިލްގެ ބަހުސް މަރުހަލާގައި ތުޅާދޫ ދާއިރާގެ މެމްބަރު ހިސާން ހުސެއިން ވަނީ އިސްލާހުތަކެއް ހުށަހަޅުއްވާފައެވެ. އެ ގޮތުން ރިޔާސީ ކޮމިޝަނެއް އުވާލަން ރައީސުލް ޖުމްހޫރިއްޔާ ނިންމަވާއިރު، ކޮމިޝަންތަކުން ހޯދާފައި ހުންނަ މައުލޫމާތުތަކާއި ހެކިތަކާއި، އަދި އެ ނޫން ވެސް ނަގާފައި ހުންނަ ހެކި ބަސް އެއީ ސައްހަ އެއްޗެހި ގޮތުގައި ދެމި އޮތުމަށް، ކޮމިޝަނުން ކުރަމުންދިޔަ މަސައްކަތްތަކުގެ ތެރޭން ނުނިމި ހުރި މަސައްކަތްތައް ބަދަލުކުރާނެ މުއައްސަސާއެއް ބިލްގައި ކަނޑައެޅުމަށް ވަނީ ހުށަހަޅުއްވާފައެވެ.
ޖިނާއީ އިޖުރާއަތުގެ ގާނޫނުން ކަނޑައަޅާފައިވާ ބާރުތައް ކޮމިޝަންތަކައް ލިބިދޭން އޮންނައިރު، އެ ބާރުތައް އެންމެ ފުރިހަމަ ގޮތުގައި ބޭނުންކުރެވޭ ގޮތަށް އެ އިހްތިޔާރު ކޮމިޝަންތަކަށް ދިނުމަށް ބިލްގައި ލިޔަންޖެހޭ ކަމަށް ވެސް ހިސާން ވަނީ ވިދާޅުވެފައެވެ.
ކޮމިޝަންތަކުން ތަހްގީގުކުރާ މައްސަލަތަކުގައި ތެރޭ ހިމެނޭ މަދަނީ މައްސަލަތަކުގައި ނުވަތަ ސިވިލް މައްސަލަތަކުގައި މިހާރު ވެސް ދިވެހިރާއްޖޭގެ ގާނޫނީ ނިޒާމްގެ ތެރެއިން، އޮނިގަނޑުގެ ތެރެއިން ތަބާވާންޖެހޭ މަދަނީ އިޖުރާއަތްތަކައް ކޮމިޝަނުން ތަހްގީގް ކުރަމުންދާއިރު، ތަބާވަންޖެހޭނެ ކަމަށް ކަނޑައެޅިގެން ބިލްގައި ބަޔާންކުރުން މުހިއްމު ކަމަށް ދެކިވަޑައިގަންނަވާ ކަމަށް ހިސާން ވަނީ ވިދާޅުވެފައެވެ.
މިދިޔަ ނޮވެމްބަރު 17 ވަނަ ދުވަހު ރައީސް އިބްރާހިމް މުހައްމަދު ސޯލިހު ކޮމިޝަން އުފެއްދެވީ ޖެނުއަރީ 1، 2012 އިން ފެށިގެން ނޮވެމްބަރު 17، 2018 އާ ދެމެދު މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބެލުމަށެވެ. އެގޮތުން އެ މުއްދަތުގެ ތެރޭގައި ހިނގާފައިވާ 24 މައްސަލައެއް ބޭރުގެ ތަޖުރިބާކާރުންގެ އެހީއާއެކު ކޮމިޝަނުން އަންނަނީ ތަހުގީގު ކުރަމުންނެވެ.
