ފުލުހުންނަށް ފިލަން ކަނޑަަށް ފުންމާލީ މީހަކު ގެއްލިގެން ހޯދަނީ
9 ޖޫން 2019 | އާދީއްތަ 18:58އެމީހާ ހޯދަން ދިޔަ މީހުން ވަނީ ސަލާމަތްވެފައި
ފުންމާލީ މާވާރަލު ކައިރިއަށް
ގދ. ތިނަދޫން ފުރައިގެން ގއ. ކަނޑުހުޅުދޫ އަށް ދިޔަ ފެރީއަކުން މަސްތުވާތަކެތި ހިފައިގެން އައިކަމަށް ބެލޭވޭ މީހަކު ކަނޑަށް ފުންމާލުމުން އެމީހާ ގެއްލިގެން ހޯދަމުންދާ ކަމަށް ފުލުހުން ބުނެފިއެވެ.
ފުލުހުން ބުނީ، ގއ. ކަނޑުހުޅުދޫ އަށް ދިޔަ ފެރީއަކުން މަސްތުވާތަކެތި ހިފައިގެން މީހަކު އަންނަ ކަމުގެ މައުލޫމާތު ލިބުމާއި ގުޅިގެން ކަނޑުހުޅުދޫ ގައި ފުލުހުން ހަރަކާތްތެރިވާކަން ފެރީގަ ހުރި މީހާއަށް އެނގިގެން ކަނޑުހުޅުދޫ ކައިރީ އޮންނާ މާވާރަލު ކައިރިއަށް މޫދަށް ފުންމާލީ މީހަކު ގެއްލިގެން ހޯދަމުންދާ ކަމަށެވެ. އަދި އެމީހާ ހޯދަން ދިޔަ ބޮއްކުރާ ބަންޑުން ޖަހާލައިގެން އޭގައި ތިބި ތިން މީހުންގެ ތެރެއިން އެކަކު ފަތާފައި މާވާރާލަށް އަރާ، އަނެއް ދެ މީހުން ހޯދުމުގެ މަސައްކަތް ފުލުހުންނާއި، އެ ރަށުގެ ރައްޔިތުންގެ ބަޔަކުވެގެން ކުރަނިކޮށް އެ ދެ މީހުން ފެނިފައިވާކަމަށް ފުލުހުން ބުންޏެވެ.
މިހާރު އެ ތިން މީހުންވެސް ތިބީ ފުލުހުންގެ ބެލުމުގެ ދަށުގައި ކަމަށް އެ ރަށު ކައުންސިލްގެ ރައީސް އަހްމަދު ޝަހީމް ވިދާޅުވިއެވެ. ޝަހީމް ވިދާޅުވީ، އެ ފެރިއަކީ ގައްދޫ އިން ފުރައިގެން ކަނޑުހުޅޫދޫ އަށް ދިޔަ ފެރީއެއް ކަމަށާއި ފުންމާލީ މިހާއަކީ 30 އަހަރާއި 35 ދެމެދު އުމުރުގެ މަސްތުވާތަކެތީގެ ރިކޯޑް އޮންނަ މީހެއް ކަމަށެވެ. އެމީހާ ހިކަފަސްތަނަކަށް ފަތާފައި އަރާފައިވާ ކަމަށް ފެރީގައި ތިބި މީހުން މައުލޫމާތު ދީފައިވާ ކަމަށް އޭނާ ވިދާޅުވިއެވެ.
ފުލުހުންނާ އެރަށު މީހުން ވެގެން ދަނީ އެެ މީހާ ހޯދުމުގެ މަސައްކަތް ކުރަމުންނެވެ.
