ދެ ދުވަހުގެ ދަތުރުފުޅެއްގައި އިންޑިޔާގެ ބޮޑުވަޒީރު ނަރެންދުރަ މޯދީ ރާއްޖެ ވަޑައިގެންފިއެވެ.
ވެލާނާ އިންޓަނޭޝަނަލް އެއަރޕޯޓުން ބޮޑުވަޒީރު މޯދީ އަށް މަރުހަބާ ދެންނެވީ ޚާރިޖީ ވަޒީރު އަބްދުﷲ ޝާހިދާއި ވަޒީރުންނެވެ.
މޯދީ ރާއްޖެ ވަޑައިގެންނެވީ ދެ ވަނަ ދައުރަކަށް އިންތިޚާބުވެ ވަޑައިގެންނެވުމަށް ފަހު، ސަރަހައްދުގެ ގައުމުތަކައް ކުރައްވާ ދަތުރުފުޅުގެ ތެރެއިންނެވެ. މޯދީ ކުރައްވާފައިވާ ޓުވީޓެއްގައި ވިދާޅުވެފައިވަނީ މަގާމުގެ ހުވާކުރެއްވުމަށް ފަހު، ގައުމުން ބޭރަށް ކުރައްވާ ފުރަތަމަ ދަތުރުފުޅުގައި ރާއްޖެ ވަޑައިގެންނެވުމަށް ނިންމެވީ ރާއްޖެއަކީ އިންޑިޔާއާ އެންމެ ގާތް އަދި އެންމެ އަވައްޓެރި ގައުމަށްވާތީ ކަމަށެވެ.
ބޮޑުވަޒީރުގެ މި ދަތުރުފުޅުގައި ދެ ޤައުމުގެ ދެމެދުގައި ހަ އެއްބަސްވުމެއްގައި ސޮއި ކުރެއްވުމަށް ވަނީ ހަމަޖެހިފައެވެ. މި އެއްބަސްވުންތަކަކީ ރާއްޖޭގައި ހިއުމަން ރިސޯސްގެ ވަސީލަތްތައް ތަރައްގީ ކުރުމަށްވެވޭ އެއްބަސްވުންތަކެކެއެވެ.
މީގެ އިތުރުން ރައްޔިތުންގެ މަޖިލީހުގައި މޯދީ ތަގްރީރް ކުރެއްވުމަށް ވަނީ ހަމަޖެހިފައެވެ. މޯދީ ތަގްރީރް ކުރައްވާ ޖަލްސާ އޮތީ ހޮނިހިރުދުވަހުގެ ރޭގަނޑު 6.45 ގައެވެ.
ބޮޑުވަޒީރު މޯދީ ރާއްޖެ ވަޑައިގެންނެވި މިއީ ދެވަނަ ފަހަރުއެވެ. މޯދީ ވަނީ ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ހުވާ ކުރެއްވުމުގެ ރަސްމިއްޔާތައް ވަޑައިގެންފައެވެ.
