ވާދޫގައި ފިތުރު އީދާ ދިމާކޮށް ''ކަލާ ރަން'' އެއް ބާއްވައިފި
100 އަށް ވުރެ ގިނަ މީހުން ބައިވެރި
މުބާރާތުން އެއްވަނަ ހޯދީ 12 އަހަރުގެ ކުއްޖެއް
ގދ. ވާދު ޔޫތާއި، ހުވަދޫ އެސޯސިއޭޝަން ފޯ ޓޫރިޒަމް (ހެޓް)އާ ގުޅިގެން ''ކަލާރ ރަން''ގެ ނަމުގައި ދުވުމެއް ބުރާސްފަތި ދުވަހު ބާއްވައިފިއެވެ.
ފިތުރު އީދާ ދިމާކޮށް ކުރިޔަށް ގެންދިޔަ އެ ހަރަކާތުގައި ރަށުގެ އެކި އުމުރު ފުރާގެ މީހުން ބައިވެރިވި ކަމަށް ވާދު ޔޫތުއިން ބުންޏެވެ. ބުރާސްފަތި ދުވަހު ހަވީރު ކުރިޔަށް ގެންދިޔަ ހަރާކާތުގައި ޖުމްލަ 100 އަށް ވުރެ ގިނަ މީހުން ވަނީ ބައިވެރިވެފައެވެ.
ވާދޫ ޔޫތުން ބުނީ، ދުވުމުގައި ބައިވެރިވި އެކި އުމުރުފުރައިގެ މީހުންގެ ތެރެއިން 1 ވަނަ އަދި 2 ވަނަ އަދި 3 ވަނަ އަށް ދިޔަ ފަރާތްތަކަށް ސެޓްފިކެޓް ދީފައިވާނެ ކަމަށާއި، އޭގެ ބޭނުމަކީ އެފަދަ ކަންތައްތަކަށް މީހުން ޝައުގުވެރި ކުރުމާއި އެކު ހިތްވަރު ދިނުން ކަމަށެވެ.
މުޅި ރަންއިން އެއްވަން ހޯދާފައިވަނީ ޒައްފާން ހަސަން މަނިކުއެވެ. އަންހެން ކެޓަގަރީއިން އާމިނަތު ރަޔާ މުހައްމަދު އެއްވަނަ ހޯދާފައިވާއިރު، ފިރިހެން ކެޓަގަރީން އެއްވަނަ ހޯދާފައިވަނީ އަހުމަދު ނަރީޝް ސައީދުއެވެ.
މުބާރާތުގައި ބައިވެރިވި ފަރާތްތަކުން ބުނީ، އެއީ އެފަދަ ގޮތަކަށް ވާދޫ ގައި ބޭއްވުނު ފުރަތަމަ މުބާރަތް ކަމަށާއި، އެހެން ކަމުން މުބާރާތާ މެދު ވަރަށް ހިތްހަމަ ޖެހޭ ކަމަށެވެ.
ވާދޫ ޔޫތު އިން ބުނީ، އެ މުބާރާތަކީ ވަރަށް ކާމިޔާބު ހަރާކަތެއް ކަމަށާއި، ރަށުގެ ހުރިހާ އުމުރުފުރާއެއްގެ މީހުންގެ ފަރާތުން އެކަމަށް ވަރަށް ބޮޑު ތާއިދެއް ލިބިފައިވާ ކަމަށެވެ. އަދި އިތުރަށް މިކަހަލަ އިތުރު ހަރަކާތްތައް ކުރިޔަށް ގެންދިއުމަށް ވިސްނުން ހުރިކަމަށްވެސް ވާދޫ ޔޫތު އިން ބުންޏެވެ.
