ސައުދީއަށް ހަތިޔާރު ވިއްކުން ހުއްޓުވަން އެމެރިކާގެ ކޮންގްރެސް ތެދުވެއްޖެ

ސައުދީ އަރަބިއާ، ޔޫއޭއީ އަދި އުރުދުންއަށް ވިއްކަން ނިންމާފައިވާ 8 ބިލިއަން ޑޮލަރުގެ ހަތިޔާރުގެ މުއާމަލާތް ހުއްޓުވަން ޑިމޮކްރެޓުންނާއި ރިޕަބްލިކަން މެމްބަރުން ގުޅިގެން އިސްލާހެއް ހުށައަޅަން މަސައްކަތް ކުރަމުން އަންނަ ކަމަށް ކޮންގްރެސްގެ މެމްބަރުންތަކެއް ވިދާޅުވެއްޖެއެވެ.

އިރާނާ ދެމެދު އުފެދިފައިވާ ނުތަނަވަސްކަމާއި ގުޅިގެން "ކުއްލި ހާލަތެއް" ކަމަށް ބުނެ، މިދިޔަ މޭ މަހުގެ ތެރޭގައި ޓްރަމްޕް ސަރުކާރުން ވަނީ 22 އަސްކަރީ އެއްބަސްވުމެއްގެ ދަށުން ހަތިޔާރު ވިއްކަން ނިންމާފައިވާ ކަމަށް ކޮންގްރެސްގެ ކޮމިޓީތަކަށް އަންގާފައެވެ. މިފަދަ އެއްބަސްވުންތަކަށް ކޮންގްރެސްގެ ރުހުން ހޯދަން ޖެހުނު ކަމުގައިވީ ނަމަވެސް، ކުއްލި ހާލަތުގައި އެ ގައުމުގެ ރައީސްއަށް ލިބިދޭ ބާރުގެ ދަށުން އެކަން ނުކޮށް ހަތިޔާރުތައް ވިއްކާލެވޭނެއެވެ.

ޓްރަމްޕްގެ ނިންމުމާއި ގުޅިގެން ދެ ޕާޓީއަށް ނިސްބަތްވާ މެމްބަރުން ނުރުހުން ފާޅުކުރަމުން އެ ފަރާތްތަކުން ބުނީ މިހެން އަމަލުކުރަން ފުރުސަތު ދެއްވައިފިނަމަ، މުސްތަގުބަލުގައި ރައީސްކަމަށް އަންނަ ފަރާތަކަށް ވެސް ބޭނުން ގައުމަކަށް ހަތިޔާރު ވިއްކާނެ ފުރުސަތު ހުޅުވިގެން ދާނެ ކަމަށެވެ. އަދި އެއީ ގައުމީ މަސްލަހަތަށް އެންމެ ރަނގަޅު ގޮތް ނޫންކަމަށް ބުނެ ކޮންގްރެސްގެ މެމްބަރުން ކަންބޮޑުވުން ފާޅުކުރެއްވިއެވެ.

އަށް ބިލިއަން ޑޮލަރުގެ އެއްބަސްވުންތަކުގެ ދަށުން އެ ގައުމުތަކަށް ވިއްކަން ހަމަޖެހިފައިވާ ހަތިޔާރުތަކުގެ ތެރޭގައި އަމާޒަށް ވާސިލުވާ ގޮތަށް ހުންނަ ހަތިޔާރާއި، މޯޓަރު ބަޑި އަދި ހަނގުރާމަ މަތީ މަތިންދާބޯޓުގެ އިންޖީނު ހިމެނެއެވެ. މިކަމާ ދެކޮޅު މެމްބަރުން ވިދާޅުވީ އުފައްދަން އެތައް ދުވަހެއް ނަގާ ހަތިޔާރުތައް ވިއްކަން އެއްބަސްވުމުން، އެކަމުގައި ކުއްލި ހާލަތެއް ދިމާ ނުވާކަން ހާމަވާ ކަމަށެވެ.

ޑިމޮކްރެޓުން ކޮންޓްރޯލް ކުރާ ހައުސް އޮފް ރެޕްރެޒެންޓޭޓިވްސް (ކޮންގްރެސް) އަށް ހުށައެޅި ބިލުގައި ވަނީ، ޓްރަމްޕް ސަރުކާރުން ހަތިޔާރު ވިއްކަން ދީފައިވާ 22 ލައިސަންސް ކެންސަލްކުރުމަށް ފަހު، ކުރިން ވެސް އަމަލު ކުރަމުން އައި އުސޫލުގެ ތެރެއިން އެކަނި ކުރަން ހުށައަޅަން އެންގުމަށެވެ. އެ އުސޫލުގެ ތެރޭގައި 30 ދުވަހުގެ ކޮންގްރެޝަނަލް ރިވިއުއެއް ހިމެނެއެވެ.

މީގެ އިތުރުން 1976 ވަނަ އަހަރު ހަދާފައިވާ "އާމްސް އެކްސްޕޯޓް ކޮންޓްރޯލް އެކްޓް" ގައި ހިމަނާފައިވާ ކަންކަން ބަދަލުކުރަން ހުށައެޅުމާ ދޭތެރޭ ވިސްނަމުންދާ ކަމަށް ވެސް ކޮންގްރެސްގެ މެމްބަރުންތަކެއް ބުނެފައިވެއެވެ. އެގޮތުން އެ ގާނޫނުގައި ހިމެނިފައިވާ "އެމަރޖެންސީ އޮތޯރިޓީ" ރައީސްއަށް ބޭނުންކުރެވޭނެ ފުރުސަތު ހަނިކުރަން ވިސްނަމުންދާ ކަމަށް އެ ފަރާތްތަކުން ބުނެފައިވެއެވެ.